Dual Panel1Saellana jareya Samuwel mondhut gendhi se aesse mennya’ jaitun, mennya’ jareya pas eselen ka cethagga Saul. Samuwel nyeyom Saul sambi adhabu, "Ba’na bi’ PANGERAN la elanti’ epadaddi ratona ommadda, iya areya bangsa Isra’il. Ba’na marenta’a ommadda sarta alindhungana ommat jareya dhari so-mosona. Areya’ tandhana ja’ PANGERAN ongguwan se mele ba’na daddi ratona ommadda:
2Dhaggi’ mon ba’na la apesa ban sengko’ e are teya, ba’na bakal tageppoga ban oreng lalake’ kadhuwa e seddi’na makamma Rahel e Zelzah e dhaerana Benyamin. Oreng se kadhuwa jareya bakal ngoca’a kantha reya ka ba’na: Mar-hemar se esare sampeyan ampon epanggi. Samangken eppa’na sampeyan ta’ kobater mekkere ban-keban ganeka, tape terros posang mekkere kadi ponapa se nyareya sampeyan."
3Samuwel adhabu pole, "Dhari jadhiya ba’na terros ajalan sampe’ ka bungkana kajuwan karamat kennengnganna kabakteyan e Tabor. E jadhiya ba’na bakal tatemmowa ban oreng lalake’ katello se teppa’na entara ka Betel ngatorragiya kurban ka Allah. Se kasorang nonton budhu’na embi’ tatello’, settonganna ngeba roti tatello’, ban se settonganna pole ngeba kanthong kole’ se aesse anggur.
4Oreng se katello jareya bakal aberri’a salam ka ba’na sarta aberri’ roti dhadhuwa’ ka ba’na; roti jareya kodu etarema bi’ ba’na.
5Saellana jareya ba’na kodu entar ka gumo’na Allah e Gibeya, kennengnganna parkemahanna oreng Filistin. E labang sakethengnga kottha ba’na bakal lep-salebana ban bi-nabbi se toron dhari gumo’ pangurbanan. Bi-nabbi jareya atangdang ban ra’-era’an, sambi amaen gambus, terbang, soleng ban calempong.
6E bakto jareya ba’na bakal ekobasa’ana Errohna Allah ban ba’na bakal noro’a dang-tangdangan sarta ra’-era’an keya; ba’na pas andhi’a tabi’at se anyar, aoba ta’ akantha ba’-lamba’na.
7Mon jareya la kalakon kabbi, apa’a bai se bi’ ba’na ekarassa becce’, jalannagi, sabab ba’na etonton bi’ Allah.
8Saellana jareya ba’na kodu entar ka Gilgal ban anante’ e jadhiya sampe’ pettong are abidda. Sengko’ entara dha’ essa’, ngatorragiya kurban obbaran ban kurban karokonan; e jadhiya sengko’ mala’ana ba’na apa se kodu elakone ba’na."
9Ta’ abit saellana apesa ban Samuwel, Saul pas narema babatek anyar dhari Allah. Ban pa-apa se edhabuwagi Samuwel, kadaddiyan kabbi onggu e are jareya keya.
10Sanapa’na ka Gibeya, Saul ban barengnga tatemmo ban bi-nabbi sarombongan. E bakto jareya keya Saul ekobasae Errohna Allah pas noro’ adang-tangdang ban ra’-era’an akantha bi-nabbi jarowa.
11Reng-oreng se la kennal ka Saul jareya, nangale’e tengkana se aoba jareya, padha saleng atanya, "Arapa ana’na Kis reya? Apa Saul daddi nabbi keya?"
12Badha oreng se abengko e jadhiya atanya, "Baramma bi-nabbi laenna reya? Mon ca’na ba’na, sapa eppa’na reng-oreng jareya?" Jareya asal molana badha parebasan reya, "Apa Saul daddi nabbi keya?"
13Saellana Saul mare adang-tangdang ban ra’-era’an, pas entar ka mezba e attassa gumo’.
14Majadhi’ lake’na Saul nangale’e Saul ban barengnga jareya, pas atanya ka se kadhuwa jareya, "Ba’na dhari dhimma bai?" saodda Saul, "Nyare mar-hemarra eppa’ se elang, ban e bakto paggun ta’ epanggi, kaula pas entar ka Samuwel kadhuwa’an."
15"Apa dhabuna Samuwel jareya ka ba’na?" ca’na majadhi’na.
16Saodda Saul, "Ca’epon, ban-keban ganeka ampon epanggi sadaja." Tape Saul ta’ abala ka majadhi’na jareya ja’ salerana la elanti’ epadaddi rato bi’ Samuwel.
17Samuwel makompol ra’yat Isra’il e Mizpa,
18pas adhabu ka reng-oreng jareya, "PANGERAN, Allahna ommat Isra’il, adhabu kantha reya, ‘Bi’ Sengko’ ba’na la egiba dhari Messer ban epabebas dhari kakobasa’anna bangsa Messer ban sa-bangsa laenna se nyeksa ba’na.
19Sengko’ la ngangkes ba’na dhari sakabbinna kasossa’an ban kasangsara’an, tape sateya ba’na ta’ endha’ ka Sengko’, Guste Allahna ba’na, sabab ba’na menta sopaja eberri’ana rato. Mon cara jareya, iya mara, mara kabbi padha akompol e adha’anna Sengko’, PANGERANna ba’na, apolong menorot sukuna ban kaomma bang-sebang.’"
20Samuwel pas makon sakabbinna suku sopaja padha maju, se kapele suku Benyamin.
21E bakto ga-kalowargana suku Benyamin esoro maju, se kapele kalowargana Matri. Dhi-budhina lalake’an dhari kalowargana Matri esoro maju, se kapele Saul, ana’na Kis. Reng-oreng padha nyare’e Saul, tape ta’ etemmo.
22Daddi reng-oreng jareya atanya ka PANGERAN, "Adhu, Guste, ponapa oreng gapaneka badha e ka’dhinto?" Dhabuna PANGERAN, "Saul ngetek e budhiyanna rang-barang parlengkaban rowa."
23Daddi reng-oreng jareya duliyan ngone’e Saul, pas egiba ka nga’-tengnga’anna ra’yat. Saul manjeng e antarana reng-oreng jareya, nyatana Saul jareya se paleng tenggi; reng-oreng laenna pera’ sampe’ gan bauna.
24Dhabuna Samuwel ka reng-oreng jareya, "Areya’ oreng se epele PANGERAN! Tadha’ oreng laenna e antarana ba’na se padha ban oreng reya." Reng-oreng se badha e jadhiya kabbi padha asorak, "Hidup rato!"
25Samuwel nerrangngagi ka ra’yat jareya parkara ha’ ban kawajibanna rato, hal jareya pas etoles e dhalem ketab se pas esempen e kennengngan se socce. Saellana jareya reng-oreng jareya kabbi esoro mole ka bengkona bang-sebang.
26Saul mole keya ka bengkona e Gibeya, eaterragi reng-oreng se kowat ban bangalan se atena la epaguli bi’ Allah.
27Tape badha reng-oreng jahat se ngoca’ kantha reya, "Oreng reya ta’ kera badha gunana ka bangsa Isra’il." Reng-oreng jareya ta’ marduli ka Saul sarta ta’ tor-ngatore pa-apa. Tape Saul o-mata’tao.