Dual Panel1Saellana jareya Daud nyengla dhari kottha Gat laju ngetek e guwa e seddi’na kottha Adulam. E bakto ka’-kaka’na ban la-balana se laen padha ngedhing ja’ Daud badha e jadhiya, kabbi laju padha entar ka salerana.
2Bariya keya reng-oreng se odhi’na eseksa, se andhi’ otang ban se ta’ senneng ngarassa’agi kabadha’an, padha agabung ka Daud kabbi, dineng Daud daddi pamimpinna. Bannya’na oreng se noro’ Daud jareya badha ra-kera pa’ ratos oreng.
3Dhari guwa jareya Daud meyos ka Mizpa e Mo’ab sarta laju adhabu ka rato Mo’ab, "Abdidalem nyo’ona edi rama sareng ebu abdidalem alenggiya sareng junandalem, kantos abdidalem ngaonenge ponapa se kodu elakone abdidalem menorot kasokanna Allah."
4Daddi oreng towana Daud jareya laju ebakta ka rato nagara Mo’ab jareya, sarta pas neptep e jadhiya saabidda Daud ngetek e dhalem guwa.
5E settong are badha nabbi se asmana Gad manggi’i Daud laju adhabu, "Panjennengngan ja’ alenggi e guwa ka’dhinto; samangken duli meyos ka tana Yehuda." Daddi Daud laju meyos sarta laju maso’ ka alas Keret.
6E settong are Saul teppa’na alenggi e baba’anna bungkana tamariska e attassa gumo’ e Gibeya; Saul ngastane tombagga, dineng sakabbinna parwirana padha manjeng e sakalenglengnga. E bakto meyarsa ja’ pangetegganna Daud ban reng-orengnga la etemmo,
7Saul adhabu ka para parwirana jareya, "Mara padha edhingngagi, reng-oreng Benyamin! Apa kerana bi’ Daud ba’na eberri’ana teggal ban kebbun anggur? Apa ba’na padha eangkada epadaddiya parwirana kabbi e dhalem angkadan perrangnga?
8Apa jareya se daddi lantaranna ba’na asakongkel ngamoso sengko’ ban tadha’ settonga se malae sengko’ ja’ tang ana’ dibi’ noro’ nolonge Daud jareya? Tadha’ settonga e antarana ba’na se mekkere sengko’ otabana se malae sengko’ ja’ Daud, tang baba’an dibi’, sateya reya teppa’na anante’ kasempadan mateyana sengko’, ban ja’ tang ana’ Yonatan maraja atena Daud jareya!"
9Doëg, kapalana tokang ngowanna ebinna Saul rowa, teppa’na badha e jadhiya keya apolong ban para parwirana Saul; atorra Doëg, "Abdidalem ampon nengale Daud manggi’i Ahimelekh pottrana Ahitub e Nob.
10Ahimelekh nyo’on petodu ka PANGERAN parkara ponapa se kodu elampa’agi Daud. Laen dhari ka’dhinto Daud jugan esangowe teddha’an sareng eparenge peddhangnga Goliyat, oreng Filistin ka’dhissa’."
11Rato Saul laju makon oreng ngolok Imam Ahimelekh ban la-balana se padha daddi imam e Nob; reng-oreng jareya kabbi padha ngadhep.
12Dhabuna Saul ka Ahimelekh, "Mara edhingngagi, ana’na Ahitub!" Saodda, "Ka’dhinto, guste."
13Dhabuna Saul, "Arapa ba’na me’ asakongkel ban Daud ngamoso sengko’? Arapa bi’ ba’na Daud me’ esangowe roti sarta eberri’i peddhang ban pole enyo’onnagi petodu ka Allah? Daddi sateya Daud nganggep moso ka sengko’ sarta anante’ kasempadan mateyana sengko’."
14Ahimelekh mator, "Daud ka’dhinto gu ta’ parwirana junandalem se paleng esto? Mantoepon junandalem, kapalana pangawal pribadhiepon junandalem, jugan sanget ehormadi sareng sadajana oreng e karatonnepon junandalem.
15Pajat lerres, abdidalem nyo’onnagi petodu dhari Allah, namong parkara abdidalem nyo’on petodu ka Allah ka’dhinto banne namong samangken. Parkara reng-oreng se asakongkel ngamoso junandalem, junandalem ja’ ngarane abdidalem otabana pasera’a saos e dhalem sabala’anna abdidalem. Abdidalem ta’ oneng pa-ponapa parkara gapaneka!"
16Tape rato adhabu, "Ahimelekh! Ba’na ban la-balana kodu mate."
17Rato laju apareng parenta ka sakabbinna pangawal se badha e jadhiya, dhabuna, "Mara, pate’e mam-imamma PANGERAN jareya! Reng-oreng jareya padha asakongkel ban Daud. Padha tao ja’ Daud buru, tape tadha’ se abala’a ka sengko’." Tape para pangawal jareya tadha’ se endha’a mate’e mam-imamma PANGERAN jareya.
18Daddi Saul laju adhabu ka Doëg, "Mara duliyan! Ba’na bai se mate’e!" Daddi Doëg laju maju, pas mate’e mam-imam jareya. E are jareya Doëg mate’e ballung polo lema’ imam se andhi’ ha’ ngangguy efod.
19Saul apareng parenta keya sopaja sakabbinna oreng e Nob, kotthana mam-imam jareya padha epate’e: lalake’ ban babine’, na’-kana’ ban babaji’, bariya keya sape, hemar, ban dumba kabbi epatadha’ karena.
20Se lopot pera’ settong, iya areya Abyatar, sala settong dhari pottrana Ahimelekh. Abyatar buru ka Daud,
21pas malae ja’ Saul la mate’e mam-imamma PANGERAN.
22Daddi Daud laju adhabu ka Abyatar jareya, "E bakto sengko’ nangale’e Doëg e dhissa’ barampan areyanna rowa, sengko’ la tao ja’ oreng jareya tanto areppot ka Saul. Daddi sedana la-balana ba’na jareya polana sengko’.
23Dina ba’na neng ban sengko’, ta’ osa tako’. Saul amaksod mateyana ba’na, tape terro mateyana sengko’ keya. Daddi, ba’na aman badha e tang kennengngan."