Dual Panel1Oreng Filistin aperrang ban oreng Isra’il e pagunongan Gilboa. Bannya’ oreng Isra’il se mate e jadhiya se gi’ odhi’, tamaso’ Rato Saul ban tra-pottrana padha buru.
2Tape bi’ oreng Filistin eserser; pottrana Saul katello ekenneng pate’e, iya areya Yonatan, Abinadab ban Malkisuwa.
3Perrang e sakalenglengnga Saul ce’ rammena, ban Saul dibi’ ekenneng na-panana mosona sampe’ loka ce’ berra’na.
4Saul adhabu ka oreng ngodha se ngeba’agi sanjatana, "Mara onos peddhangnga ba’na, cocowagi ka sengko’ me’ olle sengko’ ta’ egabay en-maenan bi’ oreng Filistin se ta’ kennal ka Pangeran rowa." Tape oreng ngodha jareya ta’ endha’ nyoco Saul polana ce’ tako’na. Daddi Saul laju mondhut peddhangnga dibi’, sarta laju marobbu ka attassa peddhang jareya.
5E bakto nangale’e ja’ Saul la seda, oreng ngodha jareya marobbu keya ka attassa peddhangnga dibi’, laju mate keya.
6Daddi Saul seda abareng ban pottrana se katello, ban toronanna laju obus.
7E bakto oreng Isra’il se neng e cora Yizre’el padha ngedhing ja’ tantara Isra’il la padha buru, sarta ja’ Saul ban tra-pottrana la tebas, laju padha buru dhari tha-kotthana. Tha-kottha jareya laju ekobasae oreng Filistin.
8Kalagguwanna e bakto arampasa angguy ban sanjatana yit-mayyit, reng-oreng Filistin nemmo jinazana Saul ban pottrana se katello se tebas e pagunongan Gilboa.
9Pangangguy perrangnga Saul ebukka’, serana eketthok, laju egiba. Saellana jareya reng-oreng buru laju ngerem otosan ka saantero nagara Filistin esoro mabalattra kabar se bagus jareya ka bangsa ban ba-dibana.
10Pangangguy perrangnga Saul esempen e dhalem settong kowel, serana egantong e dhalem bengko se egabay kennengnganna Dagon, dibana.
11E bakto reng-oreng Yabes e Gileyad ngedhing sabarang tengkana oreng Filistin ka Saul ban tra-pottrana,
12reng-oreng se paleng bangal e antarana laju entar ngala’ jinazana Saul ban tra-pottrana jareya, pas egiba ka Yabes. Jinaza jareya kabbi esareyagi e babana kajuwan raja, saellana jareya reng-oreng jareya laju apowasa pettong are abidda.
13Saul seda lantaran ta’ esto ka PANGERAN, ban ta’ atoro’ ka papakonna. Saul nyo’on petodu ka errohna reng-oreng mate, banne ka PANGERAN. Daddi bi’ PANGERAN eokom, ban karaja’anna epassra’agi ka Daud pottrana Isay.
14(10:13)