Dual Panel1E taon se kapeng dhubellas pamarenta’anna Rato Ahas e Yehuda, Hoseya pottrana Ela jumenneng rato Isra’il, ban marenta e Samaria sangang taon abidda.
2Hoseya dusa ka PANGERAN, tape bannya’na dusana ta’ sampe’ akantha bannya’na dusana to-rato Isra’il se marenta sabellunna.
3Hoseya eperrange sarta epatellok bi’ Salmaneser rato Asyur, daddi sabban taon ewajibbagi majar pesse opet ka rato Asyur jareya.
4Tape e settong bakto, Hoseya ngerem otosan ka So rato Messer nyo’on bantowanna, sarta laju ta’ majar pesse opet taonanna ka Asyur. E bakto Salmaneser ngaonenge bab jareya, Hoseya laju etangkep sarta epenjara.
5Saellana jareya Salmaneser rato Asyur alorok Isra’il sarta ngeppong Samaria. E taon se kapeng tello’ e dhalem pangeppongan jareya,
6iya areya e taon se kapeng sanga’ pamarenta’anna Hoseya Samaria erebbu’ bi’ Salmaneser. Oreng Isra’il laju eangko’ egabay tawanan ka Asyur. Sabagiyan dhari oreng Isra’il se etawan jareya esaba’ e kottha Halah, sabagiyan e seddi’na Songay Habor e dhaera Gozan, ban sabagiyan pole e tha-kottha e nagara Madai.
7Samaria gaggar lantaran oreng Isra’il dusa ka PANGERAN, Guste Allahna, panyalamet bangsa jareya dhari rato Messer, sarta ngeba bangsa Isra’il kalowar dhari nagara jareya. Oreng Isra’il nyemba la’-alla’an
8ban nerowe kabiyasa’anna sa-bangsa se la eojuk PANGERAN e bakto bangsa Isra’il maju merrange sa-bangsa jareya. Bangsa Isra’il norodi adad se eteptebbagi bi’ to-rato Isra’il,
9sarta ngalakone sabarang se elarang PANGERAN, Guste Allahna. Neng e tha-kottha se kene’ otabana se raja bangsa Isra’il maddek kennengnganna panyemba’anna diba.
10E attassa saneyap gumo’, ban e babana saneyap kajuwan se rampa’, epaddeggi gu-tugu ban ca-arcana Dewi Asyera.
11Bangsa Isra’il ngobbar dupa kaangguy diba, se eobbar e sakabbinna mezbana, akantha kabiyasa’anna sa-bangsa se la eojuk PANGERAN dhari nagara Kana’an. Oreng Isra’il nyemba brahala, maske bi’ PANGERAN la elarang. Sakabbinna lalakon se jahat se elakone bangsa jareya maduka panggaliyanna PANGERAN.
12(17:11)
13PANGERAN ngotos reng-oreng otosanna ban bi-nabbina ka ommat Isra’il ban Yehuda epakon manapa’ parengeddan reya: "Mara ambuwi lalakonna se jahat ban toro’ sabadhana parenta ban hokom se bi’ Sengko’ ebagi ka bangatowana ba’na ban ka ba’na dibi’ kalaban parantara’anna para nabbi, Tang di-abdi rowa."
14Tape Isra’il ban Yehuda ta’ endha’ ngedhingngagi. Sa-bangsa jareya cengkal akantha bangatowana se ta’ parcaja ka PANGERAN, Guste Allahna.
15Isra’il ban Yehuda ta’ endha’ atoro’ ka kon-papakonna PANGERAN ban ta’ esto ka parjanjiyan se ebadhi PANGERAN bi’ para bangatowana. Bangsa Isra’il ban Yehuda ta’ parduli maske li-baliyan eparengeddi, ban nyemba la-brahala se tadha’ gunana, sampe’ sa-bangsa jareya dibi’ daddi ta’ aguna keya. Bangsa Isra’il ban Yehuda jareya nero contona sa-bangsa e kangan kacerra, maske bi’ PANGERAN la elarang.
16Ta’ atoro’ ka kom-hokomma PANGERAN, Guste Allahna, sarta agabay sape dhari logam dhadhuwa’ se esemba’a. Bangsa se dhuwa’an jareya agabay arcana Dewi Asyera, nyemba tang-bintang ban abakte ka Diba Ba’al.
17Na’-ana’na egabay kurban obbaran ka diba. Reng-oreng jareya ngangguy elmo gaib ban menta petodu ka kon-dhukon se tao ahubungan ban roh-erroh, ce’ bajengnga ngalakone pa-apa se ta’ masenneng panggaliyanna PANGERAN
18sampe’ PANGERAN ce’ dukana. Bangsa Isra’il ban Yehuda jareya bi’ PANGERAN ta’ eparduli pole, ebuwang dhari nagara se eparengngagi ka reng-oreng jareya; se gi’ badha pera’ kare karaja’an Yehuda.
19Reng-oreng Yehuda ta’ ta’at keya ka kom-hokomma PANGERAN, Guste Allahna. Reng-oreng jareya atoro’ ka kabiyasa’an-kabiyasa’anna oreng Isra’il.
20Daddi PANGERAN ta’ kasokan pole ngakone ommat Isra’il, bangsa jareya eokom epassra’agi ka so-mosona se kejjem. Bangsa jareya ta’ eparduli, la’-mala’ ebuwang dhari tana se la eparengngagi ka bangsa jareya.
21Saellana bi’ PANGERAN Isra’il epesa dhari Yehuda, oreng Isra’il mele Yerobeyam pottrana Nebat epadaddi ratona. Yerobeyam pas daddi lantaranna ra’yadda mongkore PANGERAN sarta ngalakone sa-dusa se raja.
22Reng-oreng jareya nerowe Yerobeyam sarta terros ngalakone sakabbinna dusa se elakone ratona,
23sampe’ dhi-budhina bangsa jareya bi’ PANGERAN ta’ eparduli pole, la’-mala’ ebuwang dhari tana se la eparengngagi ka bangsa jareya. Kadaddiyan jareya cocok ban parengeddanna Pangeran ka bangsa jareya se epanapa’ kalaban parantara’anna di-abdina, para nabbi. Daddi oreng Isra’il egiba ka pambuwangan e Asyur, ban reng-oreng jareya terros neng e jadhiya sampe’ sateya.
24Menangka gantena reng-oreng Isra’il se eangko’ ka pambuwangan rowa, rato Asyur ngangko’ oreng dhari Babil, Kuta, Awa, Hamat ban Sefarwaim esaba’ e tha-kottha Samaria. Reng-oreng jareya ngobasane tha-kottha jareya sarta neptep e jadhiya.
25E bakto buru neng e jadhiya reng-oreng jareya ta’ hormat ka PANGERAN; daddi PANGERAN laju madhateng can-macan epanyeppa’ sabagiyan dhari reng-oreng jareya.
26Rato Asyur narema reppodan ja’ reng-oreng se esaba’ e tha-kottha e Samaria jareya ta’ tao ka kom-hokomma dibana nagara jareya, daddi diba jareya madhateng can-macan epanyeppa’ reng-oreng jareya.
27Daddi rato Asyur laju adika’agi sopaja nyare imam kasorang dhari antarana para tawanan se ebuwang ka Asyur; imam jareya epakon pabali ka Samaria. "Soro abali imam jareya ka bengkona ban soro neng e jadhiya, soro ngajarragi kom-hokomma dibana nagara jarowa ka reng-oreng dhissa’," dhabuna rato.
28Daddi badha settong imam Isra’il, se la eangko’ dhari Samaria ka Asyur, imam jareya epamole sarta laju neng e Betel. E jadhiya imam jareya ngajarragi ka ra’yat baramma sabendherra carana nyemba PANGERAN.
29Tape reng-oreng se neng e Samaria jareya paggun agabay la-brahalana dibi’ se esaba’ e wel-kowel gabayanna reng-oreng Isra’il se lamba’na neng e jadhiya. Saneyap golongan agabay brahalana bang-sebang e kottha se ekennengnge:
30Oreng Babil agabay arcana Diba Sukot-Benot; oreng Kuta agabay arcana Nergal; oreng Hamat arcana Asima;
31oreng Awa arcana Nibhas ban Tartak; ban oreng Sefarwaim ngobbara na’-ana’na menangka kurban obbaran ka Diba Adramelekh ban Anamelekh.
32Salaenna nyemba ba-diba jareya, reng-oreng jareya gi’ nyemba ka PANGERAN. Reng-oreng jareya mele reng-oreng se acem-macem e antarana aba’na dibi’ epadaddiya imam ban epangatorragiya kurban e wel-kowella brahala.
33Daddi, reng-oreng jareya nyemba ka PANGERAN, tape gi’ nyemba ka ba-dibana dibi’, menorot adadda nagara asalla.
34Sampe’ are teya reng-oreng jareya gi’ paggun ajalannagi adadda se kantha jareya. Reng-oreng jareya ta’ nyemba ka PANGERAN ban ta’ atoro’ ka kom-hokomma ban kon-papakonna se eparengngagi ka toronanna Yakub, se enyamae keya Isra’il.
35PANGERAN la abadhi parjanjiyan kantha reya ban ommat Isra’il, "Ba’na ja’ abakte ka la’-alla’an; ja’ asojud nyemba la’-alla’an jareya otaba aladine la’-alla’an jareya, otabana ngeba kurban ka la’-alla’an jareya.
36Ba’na kodu hormat ka Sengko’, PANGERAN, se ngeba ba’na kalowar dhari Messer kalaban kobasa se raja; ba’na kodu nyemba ka Sengko’ ban ngeba kurban ka Sengko’.
37Toro’ Tang kom-hokom ban Tang parenta se bi’ Sengko’ la etoles kaangguy ba’na. Ba’na ja’ abakte ka la’-alla’an laen,
38ban ja’ paloppa ka parjanjiyan e antarana Sengko’ ban ba’na.
39Pata’at ka Sengko’, Guste Allahna ba’na, ban ba’na bi’ Sengko’ epasalamedda dhari so-mosona."
40Tape pandhudhu’ Samaria ta’ endha’ ngedhingngagi, gi’ paggun neggu’i dad-adadda.
41Daddi, reng-oreng jareya nyemba ka PANGERAN, tape gi’ nyemba ka la-brahalana. Sampe’ sateya toronanna gi’ paggun ngalakone se kantha jareya.