Dual Panel1Saellana jareya para pamimpinna ku-suku Isra’il padha nyabis ka Daud se alenggi e Hebron sarta pas mator kantha reya, "Ku-suku Isra’il ka’dhinto gi’ neng-ngenneng ka junandalem.
2Ngabidi gi’ dhimen, la’-mala’ e bakto Saul gi’ jumenneng rato, manabi tantara Isra’il entar aperrang gi’ junandalem jugan se mimpin, sarengngan pole PANGERAN ampon adhabu ka junandalem ja’ junandalem se badhi mimpina sareng badhi daddiya ratona ommattepon."
3E Hebron, Daud abadhi parjanjiyan ban para pamimpin Isra’il jareya, bi’ para pamimpin buru Daud pas eangkat epajumenneng rato Isra’il.
4Daud yuswana tello polo taon e bakto jumenneng rato jareya, ban marenta pa’ polo taon abidda.
5E Hebron Daud marenta Yehuda pettong taon satengnga, ban e Yerusalim marenta saantero Isra’il ban Yehuda tello polo tello’ taon abidda.
6E settong are Rato Daud meyos nyerrangnga Yerusalim esarengnge reng-orengnga. Oreng Yebus pandhudhu’na kottha jareya, apekker ja’ Daud ta’ kera bisa makala Yerusalim. Daddi reng-oreng jareya ngoca’ ka Daud, "Ba’na ta’ kera ngenneng maso’ dha’ enna’; oreng buta ban dippang bai tanto bisa ngojuk ba’na dhari dhinna’."
7Daud adhabu ka reng-orengnga, "Ba’ badha’a e dhinna’ reya oreng se baji’ ka oreng Yebus pada ban sengko’? Kabaji’anna jareya ba’ cokoba raja sampe’ terro mateyana oreng Yebus jareya? Mon badha, mara maso’ ka kottha jareya lebat e tarowonganna aeng; serrang kabbi oreng dippang ban oreng buta se ekabaji’i sengko’ jareya." (Jareya sababba arapa oreng me’ ngoca’, "Oreng buta ban oreng dippang ta’ olle maso’ ka Padalemman Socce.") Daud ahasel arebbu’ binteng Siyon; binteng jareya pas ekobasae. Kottha jareya pas enyamae "Kottha Daud". Kottha jareya epaddek e sakalenglengnga binteng jareya, molae dhari temorra gumo’ se etembuk ban tana.
8(5:7)
9(5:7)
10Sajan abit Daud sajan kowat, sabab etolonge PANGERAN, Allah Se Mahakobasa.
11Rato Hiram dhari nagara Tirus ngerem ta-dhutana ka Daud, bariya keya kaju comara Libanon ban kang-tokang kaju sarta kang-tokang bato kaangguy maddek karaton.
12Daddi Daud arassa yakin ja’ PANGERAN makoko kakobasa’anna menangka rato Isra’il, ban makoko karaja’anna kaangguy kaparlowanna ommadda PANGERAN.
13Saellana ngalle dhari Hebron ka Yerusalim, Daud araji pole sampe’ pan-barampan kale sarta mondhut pan-barampan oreng babine’ ekaseller; daddi pottrana sajan bannya’.
14Tra-pottra lake’na se lahir e Yerusalim iya areya: Syamuwa, Sobab, Natan, Sulaiman,
15Yibhar, Elisua, Nefeg, Yafiya,
16Elisama, Elyada ban Elifelet.
17E bakto ngedhing ja’ Daud epajumenneng rato Isra’il, oreng Filistin pas dhateng nangkebba Daud. Tape Daud meyarsa kabar jareya, pas meyos ka binteng.
18Oreng Filistin napa’ ka Cora Refa’im pas ngobasane tana jareya.
19Daud mator ka PANGERAN, "Ponapa abdidalem kodu nyerrang oreng Filistin ka’dhinto? Ponapa sareng Junandalem abdidalem eparengngana kamennangan?" "Kassa’ serrang!" dhabuna PANGERAN. "Bi’ Sengko’ ba’na epamennanga!"
20Daud pas meyos ka Ba’al-Perasim, e jadhiya pasukan Filistin epakala. Dhabuna Daud, "PANGERAN la magujur partahananna tang moso, padha ban banjir se magujur barang se badha e adha’anna e dhalem bakto saparngedep." Daddi kennengngan jareya enyamae Ba’al-Perasim.
21Pasukan Filistin padha buru sampe’ ta’ kober ngeba ca-arca brahalana. Ca-arca jareya epondhut bi’ Daud ban reng-orengnga.
22Ta’ abit saellana jareya oreng Filistin abali pole ngobasane Cora Refa’im jareya.
23Daud nyo’on petodu sakaleyan aggi’ ka PANGERAN. Dhabuna PANGERAN, "Ja’ nyerrang dhari dhinna’, tape moter ka budhiyanna, pas serrang dhari budhi, e semma’na bungkana morbei.
24Mon ba’na ngedhing monye padha ban monyena sokona oreng abaris e konco’na ka’-bungka’an jareya, ba’na pas maju, sabab Sengko’ ajalana e adha’na ba’na makala’a tantara Filistin."
25Daud alampa’agi apa se edhabuwagi PANGERAN, ban Daud ahasel ngojuk tantara Filistin dhari Geba sampe’ gan Gezer.