Dual Panel1Rato dhari Syeba meyarsa kakalonta’anna Sulaiman, daddi laju meyos ka Yerusalim, terro ngojiya Sulaiman ban partanya’an se rat-malarat. Se meyos eereng oreng sabannya’na dhari Syeba, sarta abakta onta sabannya’na keya; onta jareya ebuwa’i pa-palappa, mamatan ban emmas se talebat bannya’na. E bakto apanggi ban Sulaiman, rato jareya atanya acem-macem parkara sabarang se badha e panggaliyanna.
2Partanya’an jareya bi’ Sulaiman ekenneng jawab kabbi, tadha’ settonga se ekarassa malarat.
3Rato Syeba meyarsa dibi’ saapa bicaksanana Sulaiman sarta ngoladi karaton se epaddek Sulaiman jareya,
4tata lalakonna ba-ponggabana karaton, saragamma ban paroma’anna. Rato Syeba ngoladi kakanan se eangka’agi, sarta kalambina reng-oreng se aladine e dhalem pesta; bariya keya ban-kurban se eatorragi Sulaiman e Padalemman Socce. Jareya kabbi andaddiyagi rato nagara Syeba kasambu’ tor cengngeng.
5Dhabuna rato nagara Syeba jareya ka Rato Sulaiman, "Sadaja se ekarasan oreng e nagara kaula parkara panjennengngan ban kabicaksana’anna panjennengngan lerres onggu!
6Gi’ dhimen kaula ta’ parcaja, tape saamponna kaula entar ka’anja dibi’ sarta nyaksene sareng mata kaula dibi’, buru kaula yakin. Sanyatana sadaja se ekaedhing kaula e ka’issa’ ta’ napa’ saparona dhari se etangale kaula e ka’dhinto. Nyatana kabicaksana’an sareng kasogiyanna panjennengngan araja’an dhari se ecareta’agi oreng ka kaula.
7Pojur onggu reng-oreng se aladine panjennengngan, se ros-terrosan badha e ajunanna panjennengngan, daddi kengeng mereng dhari panjennengngan dibi’ sadaja pangajaran se bicaksana!
8Poji PANGERAN, Allahna panjennengngan! Panjennengngan epadaddi rato, epamarenta kalaban asmana, gapaneka noduwagi saponapa leburra Pangeran ka panjennengngan. Lantaran taresna ka ommat Isra’il, sareng menorot kasokanna sopaja ommat ka’dhinto teptep badha saterrossa, panjennengngan epadaddi ratona ommat paneka, sopaja panjennengngan kengenga majaga hokom sareng kaadilan."
9Saellana jareya rato nagara Syeba jareya ngatorragi ka Sulaiman le-ollena se aropa: emmas se bannya’na lebbi dhari pa’ ebu kilo sarta mamatan ban pa-palappa. Sulaiman ta’ tao narema pole palappa se bagus akantha tor-atorra rato nagara Syeba jareya.
10(Reng-orengnga Rato Hiram ban Rato Sulaiman se ngeba emmasdhari Ofir se eatorragi ka Sulaiman, ngeba keya mamatan ban kaju candhana.
11Kaju jareya bi’ Rato Sulaiman ekagabay dhak-ondhak e Padalemman Socce ban e karatonna, sarta ekagabay calempong ban gambus se eangguya para panyanyena. Ta’ tao badha se kantha jareya e nagara Yehuda.)
12Laen dhari papareng babales se biyasana eparengngagi bi’ Rato Sulaiman, rato dhari Syeba jareya bi’ Rato Sulaiman eparenge keya sabarang se daddi parnyo’onanna. Saellana jareya rato dhari Syeba jareya laju gubar ka nagarana abareng ban pangerengnga kabbi.
13Sabban taon Rato Sulaiman narema emmas para’ tello lekor ebu kilo,
14gi’ ta’ kabitong jek-pajek dhari gar-sodagar ban gang-dagang. To-rato Arab ban nor-gubennor Isra’il ngatorragi keya emmas ban salaka.
15Sulaiman abadhi tameng raja dhu ratos meggi’ dhari emmas tempa’an. Emmas se ekagabay saneyap tameng jareya bannya’na lebbi korang pettong kilo.
16Laen dhari jareya Sulaiman gi’ abadhi tameng se akene’an tello ratos meggi’ dhari emmas tempa’an keya. Emmas se egabay saneyap tameng se kene’ jareya lebbi korang tello kilo. Meng-tameng jareya esaba’ e balay se anyama Mandhapa Alas Libanon.
17Rato abadhi keya korse karaja’an se raja dhari gaddhing ban erengga bi’ emmas morne.
18Korse jareya badha lengngenna ban e kangan kacerra badha arcana macanna. Korse jareya badha dhak-ondhagga nem-ennem, ban panongko’anna sokona se ekole’e emmas. Panongko’anna soko jareya epacekka’ masettong ban korsena.
19E konco’ kacer ban konco’ kanganna saneyap dhak-ondhagga korse jareya badha arcana macanna — daddi kabbi badha dhubellas arca. Ta’ tao badha korse se kantha jareya e karaja’an dhimma’a bai.
20Ker-cangker ban pialana Sulaiman dhari emmas kabbi, ban pakakas se eangguy e Mandhapa Alas Libanon dhari emmas morne kabbi keya. E jamanna Sulaiman salaka eanggep tadha’ argana.
21Sulaiman kaagungan kapal ja-raja sabannya’na, se alajar e tase’ raja abareng ban pal-kapalla Rato Hiram. Tello taon sakaleyan pal-kapal jareya mole ngeba emmas, salaka, gaddhing, mothak ban mano’ merrak.
22Rato Sulaiman lebbi sogi ban lebbi bicaksana dhari rato se kemma’a bai e dunnya reya.
23To-rato kabbi padha aehteyar terro tatemmowa ban Sulaiman, terro ngedhingngagiya pangajaranna se bicaksana, paparengnga Allah ka salerana.
24To-rato jareya kabbi padha nyabis sambi abakta le-olle ka Sulaiman. Le-ollena to-rato jareya aropa rang-barang dhari salaka, emmas, kalambi, sanjata, palappa, jaran ban jaran buwadan. Kantha jareya dhari taon ka taon.
25Rato Sulaiman kaagungan keya kandhangnga jaran ban karetana, bannya’na pa’ ebu meggi’. Jaran perrangnga badha dhubellas ebu. Sabagiyan esaba’ e Yerusalim, laenna e tha-kottha pangkalanna ta-kareta perrangnga.
26Sulaiman ngobasane to-rato se badha e dhaera molae dhari Songay Efrat sampe’ ka nagara Filistin ban batessa Messer.
27E dhalem jaman pamarenta’anna Sulaiman, salaka maso’ barang se biyasa e Yerusalim, tadha’ bidana ban bato, ban kaju comara Libanon talebat bannya’na akantha kaju ara biyasa.
28Sulaiman madhateng jaran dhari Messer ban saneyap nagara laenna.
29Careta laenna parkara Rato Sulaiman dhari adha’ sampe’ ka budhi la ecathet e dhalem ketab Caretana Nabbi Natan ban e dhalem ketab Nobuwadda Ahiya oreng Silo, sarta e dhalem ketab Wahyuna Nabbi Ido, se aesse keya caretana pamarenta’anna Yerobeyam rato Isra’il.
30Pa’ polo taon abidda Sulaiman marenta e Yerusalim ngobasane saantero Isra’il.
31Saellana jareya Sulaiman seda sarta esareyagi e Kottha Daud. Sasedana Sulaiman laju egante Rehabeyam, pottrana.