Dual Panel1PANGERAN adhabu, "Pandhudhu’ Mo’ab la pan-barampan kale agabay dusa, daddi bi’ Sengko’ masthe eokom. Oreng Mo’ab jareya ya-nyeya Rato Edom se la mate rowa, makamma ebungkar, lang-tolangnga ekala’ pas eobbar epadaddi abu.
2Daddi Sengko’ madhatengnga apoy ka nagara Mo’ab, sarta ngobbara teng-bintengnga Keriyot epasampe’a tadha’ karena. Oreng Mo’ab bakal mateya e dhalem paperrangan, sabatara oreng nope tarompet sarta ngorakkagi cerrengnga paperrangan.
3Pangobasana Mo’ab sarta om-kaom oreng agungnga pamarenta’anna bi’ Sengko’ epateyana."
4PANGERAN adhabu, "Oreng Yehuda la pan-barampan kale agabay dusa, daddi bi’ Sengko’ masthe eokom. Oreng Yehuda jareya ta’ atoro’ ka sabarang se eparenta’agi Sengko’ sarta ta’ marduli ka pa-apa se eajarragi Sengko’. Reng-oreng jareya epasala jalan bi’ la’-alla’an se esemba para bangatowana.
5Daddi Sengko’ madhatengnga apoy ka Yehuda sarta ngobbara teng-bintengnga Yerusalim epasampe’a tadha’ karena."
6PANGERAN adhabu, "Oreng Isra’il la pan-barampan kale agabay dusa, daddi bi’ Sengko’ masthe eokom. Oreng se jujur se ta’ kellar nyerrae enjamanna, bi’ oreng Isra’il ejuwal epadaddi dunor. Oreng se ta’ andhi’ se ta’ kellar majar otangnga epakantha jareya keya, maske otangnga jareya bannya’na pera’ padha ban argana sandhal sapasang.
7Oreng se ta’ andhi’ kakowadan ban se ta’ bisa apa-rapa etendhes, reng-oreng se mesken epanyese. Dunor bine’ ekapolong tedhung bi’ eppa’, ban eamponge ana’na, sampe’ macemmer Tang nyama se socce.
8E saneyap kennengnganna kabakteyan oreng tedhung ngangguy kalambi se egabay tanggunganna otangnga oreng mesken. E Padalemman Socce, reng-oreng jareya ngenom anggur ollena ngala’ andhi’na oreng se aotang ka reng-oreng jareya.
9Maske kantha jareya, he, Tang ommat, kaangguy ba’na Sengko’ mate’e oreng Amori se tenggina padha ban bungkana comara ban kowadda padha ban bungkana terpentin.
10Bi’ Sengko’ ba’na la egiba kalowar dhari Messer, sarta etonton lebat e sagara beddhi pa’ polo taon abidda. Tanana oreng Amori bi’ Sengko’ la ebagi ka ba’na epadaddi nagarana ba’na dibi’.
11E antarana na’-ana’na ba’na bi’ Sengko’ badha se epele epadaddi bi-nabbi, dineng e antarana ngangodhadanna bi’ Sengko’ badha se epele epadaddi reng-oreng Nazir. Gu ta’ bendher cara jareya, ya, oreng Isra’il? Sengko’, PANGERAN la ngoca’.
12Tape bi’ ba’na oreng Nazir epangenom anggur, sampe’ reng-oreng jareya mongkere janjina. Ban ba’na alarang bi-nabbi manapa’ Tang pessen.
13Sateya bi’ Sengko’ ba’na ececce’a sampe’ nalpe’ ka tana, sampe’ ba’na aserrowan padha ban kareta se sarat ebuwa’i gandum.
14Oreng se santa’ paberka’na sakale ta’ kera lopot; oreng se kowat bakal kaelangana kakowadanna, ban oreng se kowat ban bangalan ta’ kera bisa masalamet aba’na dibi’.
15Tokang pana ta’ kera kellar terros, ban oreng se santa’ paberka’na ta’ kera bisa buru, ban tokang nompa’ jaran ta’ kera lopot.
16E are jareya parjurit se paleng bangal sakale bakal buruwa, adina’agi sanjatana. Sengko’, PANGERAN, la ngoca’."