Dual Panel1Edhingngagi, he, babine’an Samaria se atamba lempo akantha sape se po-lempo e Basan! Ba’na nyecce’ oreng se ta’ andhi’ kakowadan, merres oreng se ta’ andhi’, sarta maksa menta ka lakena sopaja ba’na terros esadhiyai nom-enoman kerras!
2Sengko’, GUSTE Allah Se Mahatenggi reya Pangeran se socce, ban Sengko’ la ajanji ja’ pagi’ ba’na bakal eereda bi’ e’-kae’; ba’na kabbi bakal padha’a ban juko’ se ekae’ panceng.
3Ba’na bakal eereda ka Hermon ban eontallagi ka lowar, lebat e lobang e ke’-lekke’na geddhung se paleng semma’ ka aba’na bang-sebang. Sengko’, PANGERAN, la ngoca’."
4GUSTE Allah Se Mahatenggi adhabu, "He ommat Isra’il! Kassa’ ba’na entar ka kennengnganna kabakteyan e Betel bai, pas agabay dusa e jadhiya! Kassa’ entar ka Gilgal, pas agabay dusa sakarebba ba’na! Mara atorragi kurban sabban gi’ laggu, sarta ngeba saparsapolonna hasella ba’na tello are sakaleyan!
5Mara ngatorragi roti menangka sakalangkongnga ba’na ka Sengko’, sarta mara pas asebbal ja’ ba’na la ngeba tamba’anna tor-ator! Tanto lalakon cara jareya se ekaleburi ba’na!
6Sengko’ se madhateng laep ka sakabbinna kotthana ba’na, tape ba’na ta’ abali ka Sengko’.
7Bi’ Sengko’ ojan ta’ epatoron e bakto men-tamennanna ba’na ce’ parlona ka aeng. Kottha se settong bi’ Sengko’ epadhatengnge ojan dineng kottha settonganna enja’. Teggal se settong kaojanan dineng teggal laenna sampe’ kerreng.
8E pan-barampan kottha, pandhudhu’ se la ta’ andhi’ kakowadan dhari pelka’na, nyare aeng ka kottha laen, tape aeng e jadhiya ta’ cokop. Maske la kantha jareya, ba’na gi’ ta’ abali ka Sengko’ keya.
9Sengko’ madhateng angen panas ban ngerem panyaket se marosak men-tamennan ban bun-kebbunna anggurra ba’na. Ka-bungkana ara, ban ka-bungkana jaitunna ba’na la obus ekakan balang. Tape maske kantha jareya ba’na gi’ ta’ abali keya ka Sengko’.
10Sengko’ madhateng wabah panyaket ka ba’na akantha se epadhateng ka Messer bi’ Sengko’. Ngangodhadanna ba’na bi’ Sengko’ epamate e dhalem paperrangan, ban ran-jaranna ba’na erampas. Parkemahanna ba’na bi’ Sengko’ eesse’e babathang se bauna abatthowangan. Maske la kantha jareya, ba’na gi’ ta’ abali ka Sengko’ keya.
11Sabagiyan dhari ba’na bi’ Sengko’ epamate akantha reng-oreng e Sodom ban Gomora. Se gi’ odhi’ e antarana ba’na padha ban tomperra kaju se ekala’ dhari apoy. Maske la kantha jareya ba’na gi’ ta’ abali ka Sengko’ keya.
12Daddi, he, ommat Isra’il, bi’ Sengko’ ba’na eokoma. Daddi, mara ba’na aya-sadhiya se ngadhebbana okoman se bi’ Sengko’ eteba’agiya ka ba’na!"
13Gunong ban angen reya, se nyepta’agi Pangeran; apa se daddi kasokanna enyata’agi ka manossa. Pangeran abadhi seyang ban malem; Salerana alomampa e co’-konco’na bume. PANGERAN, Allah Se Mahakobasa, jareya asmana.