Dual Panel1Sapa se ta’ endha’ apolong ban oreng laenna artena pera’ mekkere aba’na dibi’ malolo; sabban panemmona oreng laen elaban terros.
2Oreng budhu ta’ endha’ eberri’ pangarteyan; se ekaterro pera’ ngedirragiya essena atena.
3Oreng dusa nespa odhi’na; mon la juba’ nyamana, tanto eya-seya.
4Cacana oreng bisa daddi somberra kabicaksana’an, dhalem akantha tase’ raja, kobassa akantha aeng se agili.
5Ta’ bagus noro’ ka oreng se daraka ban nendhes oreng se ta’ sala.
6Mon oreng budhu acaca matokaran, ban menta eokom menangka pangajaran.
7Cacana oreng budhu maancor aba’na; aba’na tajira’ bi’ cacana dibi’.
8Petenna reya nyaman rassana, mon ekalodhu’ ekarassa kobassa.
9Oreng se ngenthengngagi kawajibanna padha juba’na ban oreng se dujan marosak.
10PANGERAN reya akantha manara se koko; ka jadhiya reng-oreng se jujur entar ban nemmo kennengngan se aman.
11Tape oreng sogi nyangka artana panyalamedda aba’na akantha geddhung tenggi ban koko e sakalenglengnga kottha.
12Oreng se angko bakal ngalotora, oreng se andhap asor bakal ehormadana.
13Nyaot sabellunna ngedhingngagi reya tamaso’ lalakon se budhu ban ta’ teppa’.
14Oreng se terro odhi’a kellar nanggung kasossa’an; mon pangaterro jareya tadha’, elang keya pangarebban.
15Oreng se tenggi buddina terro nyareya elmo terros; oreng bicaksana terro olleya pangajaran malolo.
16Tor-ator reya pamokka’na jalan mon nyabisa ke oreng raja.
17Oreng se acaca dha’-adha’ e pangadilan katonna bendher cacana, tape cacana etemmo bendher salana mon la dhateng mosona.
18Ngangguy ellot tokar bisa epamare, la’-mala’ partantangan e antara oreng se kobasa sakale bisa eahere.
19Taretan se esake’e atena mon esemma’ana amalaradan dhari kottha se kowat; tokar reya akantha palangnga labang sakethengnga kottha se abinteng.
20Kaangguy ca’-oca’ se ekoca’agi, badha ollena se kodu ekarassa.
21Jila andhi’ kobasa masalamet otaba marosak odhi’na manossa; oreng kodu nanggung hasella cacana.
22Oreng se nemmo bine, olle kaontongan; bine reya paparengnga PANGERAN.
23Oreng mesken nyo’on kalaban tatakrama; oreng sogi nyaot sambi tak-nyentak.
24Badha kanca se ta’ esto, badha keya se alebbidan ban taretan.