Dual Panel1Oreng jahat buru maske ta’ eserser oreng, tape oreng jujur bangal akantha macan.
2Mon bangsa andhi’ dusa, pangobasana ate-gante salanjangnga; mon pamimpin bicaksana, bangsa kowat ban jaja saterrossa.
3Pangobasa se nendhes oreng mesken, akantha ojan lebat se marosak hasella anye.
4Sapa se ngenthengngagi hokom, noro’ ka oreng jahat; se atoro’ ka hokom nangtang oreng se bejjat.
5Oreng daraka ta’ ngarte ka kaadilan, tape oreng se abakte ka PANGERAN ngarte ongguwan.
6Lebbi becce’ mesken tape bagus atena etembang oreng sogi tape ta’ jujur tengkana.
7Oreng ngodha se ta’at ka hokom reya oreng bicaksana. Tape se abarengngan ban oreng se wang-mowang pesse matodhusan eppa’na.
8Oreng se sogi ollena ngala’ budhu’na pesse ban ngoro’ kaontongan sabannya’na, dhi’-andhi’na bakal gaggara ka oreng se neser ka oreng mesken.
9Mon ba’na ta’ atoro’ ka hokomma Allah, Allah bakal baji’a keya ka du’ana ba’na.
10Sapa se nyacae oreng jujur eajak alako jahat, aba’na dibi’ bakal maso’a ka dhalem jebbak. Oreng se berse atena bakal eberkadana sampe’ senneng odhi’na.
11Oreng sogi ros-terrosan apangrasa aba’na bicaksana, tape oreng mesken se tenggi buddina tao sapa sanyatana aba’na.
12Mon oreng becce’ kobasa, kabbi padha perak, mon oreng jahat marenta, ra’yat ngetek ta’ kalowaran.
13Sapa se ngerrep dusana ta’ kera ontong odhi’na. Sapa se ngakone dusana ban ta’ agabay dusa pole bakal ekabellasana Pangeran.
14Hormadi terros PANGERAN, tanto ba’na senneng odhi’na. Mon ba’na ta’ atoro’ ka Salerana, ba’na tanto calaka’.
15Oreng jahat se ngobasane oreng se kakorangan, akantha macan se agaung otaba baruwang se nyerranga.
16Pangobasa se nendhes oreng laen, ta’ andhi’ akkal se baras; pangobasa se baji’ ka sabarang se ta’ jujur bakal marenta’a sampe’ ataonan.
17Sapa se mate’e oreng bakal apangrasa’a eserser terros sampe’ ajalla; tadha’ oreng se bisa’a ngalang oreng jareya.
18Oreng se odhi’na tadha’ calena bakal salamedda, oreng se ta’ loros odhi’na bakal labuwa.
19Oreng tane se alako berra’ cokop se ekakana, tape se wang-mowang bakto bakal kakorangana.
20Oreng se jujur bakal eberkadana Pangeran, tape oreng se terro ceppedda sogi, ta’ lopot dhari okoman.
21Ta’ becce’ ada’-bida’agi oreng; tape badha keya hakim se roce pera’ kaangguy ngaolle pesse sakone’.
22Oreng se dhakka terro duliya sogi; oreng jareya ta’ apangrasa ja’ aba’na bakal lekkassa mesken.
23Sapa se maenga’ kasala’anna oreng laenna dhi-budhina lebbi eargai etembang oreng se lem-ngalem.
24Sapa se ngeco’ dhi’-andhi’na oreng towana ban nyangka jareya ta’ dusa, tadha’ bidana ban maleng laenna.
25Oreng se pera’ mekkere aba’na dibi’ matokaran; ba’na aontongan mon parcaja ka PANGERAN.
26Sapa se ngandellagi pekkeranna dibi’, akkalla ta’ baras. Sapa se atoro’ ka pangajaranna oreng bicaksana bakal salamedda.
27Sapa se aberri’ ka oreng mesken ta’ kera kakorangan. Sapa se notop matana ka kabutowanna oreng mesken bakal ekennenga babaston.
28Mon oreng jahat neggu’ kakobasa’an, ra’yat ngetek ta’ kalowaran; mon oreng jahat mate, oreng se adil bakal bebasa mimpin ra’yat.