Dual Panel1Dhabuna PANGERAN ka Mosa,
2"Agabay tarompet dhadhuwa’ dhari salaka tempa’an kaangguy ngolok makompola ra’yat, otabana mon nyorowa reng-oreng abungkara kemah mon mangkada.
3Mon tarompet se dhadhuwa’ jareya epamonye jang-lanjang, artena ommat Isra’il kodu akompol kabbi e sakalenglengnga ba’na e adha’anna labangnga Tang Kemah.
4Tape mon se epamonye pera’ settong, artena pera’ para pamimpinna se kodu akompol e sakalenglengnga ba’na.
5Mon tarompedda epamonye epapandha’ monyena, jareya artena ku-suku se akemah e bagiyan temor kodu mangkat.
6Mon epamonye dha’-pandha’ kadhukaleyanna, ku-suku se e bagiyan lao’ se kodu mangkat. Daddi monye se dha’-pandha’ artena ommat kodu mangkat,
7dineng monye se lanjang artena ommat kodu akompol.
8Pet-tarompet jareya kodu epamonye bi’ mam-imam, na’-ana’na Harun. Jareya atoran se kodu eestowagi bi’ ba’na salanjangnga.
9Ban mon ba’na aperrang e nagarana ba’na dibi’ nahana serranganna moso, tope tarompet se dhadhuwa’ jareya. Mon pet-tarompet jareya la epamonye, Sengko’, PANGERAN Allahna ba’na, nolonga ban masalamedda ba’na dhari so-mosona.
10Bariya keya bila’a bai mon ba’na teppa’na neng-sennengngan, iya areya e bakto araya’agi Bulan Anyar ban e bakto araya’agi parengeddanna re-are raja laenna, tarompet jareya kodu epamonye e bakto ba’na ngatorragi kurban obbaran ban kurban salameddan ka Sengko’. Mon jareya etoro’ kabbi, Sengko’ nolonga ba’na. Sengko’ reya PANGERAN, Allahna ba’na."
11E dhalem taon se kapeng dhuwa’ saellana bangsa Isra’il nyengla dhari Messer, e tanggal dhu polo bulan dhuwa’, ondhem e attassa Kemah Socce ongga ka attas.
12Oreng Isra’il laju padha mangkat dhari Sagara Beddhi Sinay, ban ondhem jareya ambu e bakto reng-oreng jareya napa’ ka ra-ara Paran.
13Jareya se dha’-adha’na bangsa Isra’il mangkat menorot papakonna PANGERAN kalaban parantara’anna Mosa.
14Sabban mangkat toro’ gilirra epapaggun terros, e dha’-adha’ kadibi’ laskar se ngangguy bul-ombulla suku Yehuda, gan kan-sapasukan, epimpin Nahason, ana’na Aminadab.
15Netane’el ana’na Zuwar mimpin barisanna suku Isakhar,
16ban Eliyab ana’na Helon mimpin barisanna suku Zebulon.
17Saellana jareya Kemah Socce pas ebungkar, kaom Gerson ban Merari se mekol Kemah jareya pas mangkat e budhiyanna.
18Laskar se ngangguy bul-ombulla suku Ruben mangkat e budhiyanna, gan kan-sapasukan, epimpin Elizur ana’na Syedeyur,
19Selumiyel ana’na Zurisyadai se mimpin barisanna suku Simeyon,
20ban Elyasaf ana’na Rehuwel se mimpin barisanna suku Gad.
21E budhiyanna jareya reng-oreng Kehat se mekol rang-barang se socce. Mon reng-oreng jareya napa’ ka kennengnganna parkemahan samarena jareya, Kemah Socce la mare epasang pole.
22Saellana jareya nyosol laskar se ngangguy bul-ombulla suku Efraim, gan kan-sapasukan, Elisama ana’na Amihud se mimpin barisanna suku Efraim,
23Gamaliyel ana’na Pedazur se mimpin barisanna suku Manasye,
24ban Abidan ana’na Gideyoni se mimpin barisanna suku Benyamin.
25E dhi-budhi kadibi’ laskar se ngangguy bul-ombulla kasatuwanna suku Dan. Reng-oreng jareya se daddi pangawal budhina sakabbinna kasatuwan laenna. Reng-oreng jareya ajalan gan kan-sapasukan, Ahiyezer ana’na Amisyadai se mimpin barisanna suku Dan.
26Pagiyel ana’na Okhran se mimpin barisanna suku Asyer,
27ban Ahira ana’na Enan se mimpin barisanna suku Naftali.
28Jareya toro’ gilirra barisanna oreng Isra’il, kan-sapasukan, sabban mangkat nerrossagiya parjalananna.
29Mosa adhabu ka eparra, iya areya Hobab ana’na Rehuwel oreng Midian, "Sengko’ ban tang bangsa mangkada ka kennengngan se menorot dhabuna PANGERAN eparengngagiya ka tang bangsa. PANGERAN la ajanji madaddiya bangsa Isra’il bangsa se ma’mor. Daddi mara, ba’na noro’, ba’na e dhissa’ epamelowa bagiyan dhari kama’moranna tang bangsa jareya."
30Saodda Hobab, "Bunten, sakalangkong, kaula terro palemana ka kampong."
31"Ella, ba’na ja’ abali ka kampongnga," dhabuna Mosa, "ba’na tao noduwagi jalan ka tang bangsa, sabab ba’na tao e dhimma se ekenneng paddeggi kemah e ra-ara beddhi reya.
32Mon ba’na noro’, bi’ sengko’ ba’na epamelowa pa-apa se becce’ se eparengngagi PANGERAN ka tang bangsa."
33Saellana mangkat dhari Gunong Sinay, gunong kalenggiyanna PANGERAN, bangsa Isra’il pas ajalan tello are abidda. Petthe Parjanjiyan ros-terrosan esaba’ e adha’ kaangguy nyare kennengngan paambuwan se maddegga kemah.
34Mon reng-oreng jareya mangkat dhari kennengnganna parkemahanna, ondhemma PANGERAN ros-terrosan badha e attasanna reng-oreng jareya e bakto seyang.
35Sabban Petthe Parjanjiyan jareya egiba mangkat, Mosa adhabu, "Ngereng ngadek, GUSTE; pasalbuddagi mosoepon Junandalem sopaja oreng se baji’ ka Junandalem padha’a buru."
36Mon Petthe Parjanjiyan jareya napa’ ka paambuwan, Mosa adhabu, "Ngereng abali, GUSTE, ka ommat Isra’il se abun-ebun ka’dhinto."