Alkitab Mobile SABDA
[VER] : [MADURA]     [PL]  [PB] 
 <<  Daniel 5 >> 

1E settong are Rato Belsiyazar ngonjang pangraja saebu oreng ka jang-onjangan raja; reng-oreng jareya ngenom anggur areng-bareng.

2Teppa’na reng-oreng nom-ngenom, Belsiyazar makon oreng ngala’ la-piala emmas ban salaka se erampas Nebukadnezar, ramana, dhari Padalemman Socce e Yerusalim. Maksodda Rato Belsiyazar iya reya sopaja ja-pangraja ban binena sarta ler-sellerra, bariya keya salerana dibi’, padha’a ngenom ngangguy la-piala jareya.

3La-piala jareya eatorragi ka salerana, ban reng-oreng jareya laju padha ngenom ngangguy pakakas jareya.

4Sambi ngenom reng-oreng jareya amolja’agi ba-diba se ekagabay dhari emmas, salaka, dimbaga, kaju ban bato.

5O-tao pas badha tanangnga manossa les-noles e geddhungnga karaton e kennengngan se paleng tera’ ekenneng sonarra damar, sampe’ rato ngoladi tolesan jareya ce’ terrangnga.

6Rato jareya laju pote olay ban talebat tako’na sampe’ to’odda ngetter.

7Rato jareya aera’ makon oreng ngolok para ahli nojum, tokang seher ban ahli parbintangan. E bakto kabbi padha dhateng, rato adhabu, "Sapa se bisa maca tolesan rowa ban nerrangngagi artena ka sengko’, bi’ sengko’ eberri’ana pangangguy karaja’an aropa juba bungo terrong ban kalong emmas tandha kahormadan. Laen dhari jareya oreng jareya bi’ sengko’ eangkada epadaddiya pangobasa se nomer tello’ e tang karaja’an."

8Reng-oreng se penter padha maju, tape tadha’ se bisa’a maca tolesan jareya otaba se taowa nerrangngagi artena ka rato.

9Rato Belsiyazar sajan ketter ban atamba pote olay; bariya keya ja-pangrajana padha kabingongan.

10Meyarsa cerrengnga rato ban ja-pangrajana, ebuna rato maso’ ka kennengnganna jang-onjangan jareya, pas adhabu kantha reya, "Moga-moga guste rato eparengngana molja salanjangnga! Paayem pekkeranna, ban ta’ osa pote olay.

11Sabab e dhalem karaja’anna ba’na badha lalake’ se etorone errohna ba-diba se socce. E jaman pamarenta’anna ramana ba’na, oreng jareya nyata andhi’ kapenterran, pangarteyan ban hekmat, se akantha hekmadda para diba. Ramana ba’na Rato Nebukadnezar ngangkat oreng jareya epadaddi pamimpinna para ahli parbintangan, para tokang seher, reng-oreng se andhi’ elmo ban reng-oreng ahli parbintangan.

12Oreng jareya talebat penterra ban bicaksana sarta ahli e dhalem nerrangngagi mempe, mokka’ roseya ban nyare jalan e dhalem ra-parkara se malarat. Nyamana Daniyel, tape bi’ rato enyamae Beltsazar. Olok ra, me’ olle oreng jareya nerrangngagi ka ba’na apa artena tolesan jareya."

13Daniyel duli epangadhep ka rato. Rato pas mareksane ka salerana, "Ba’na ya, Daniyel, oreng Yahudi buwangan, se eangko’ tang rama dhari nagara Yehuda?

14Sengko’ ngedhing ja’ ba’na etorone errohna ba-diba se socce, ban ja’ ba’na andhi’ kapenterran, pangarteyan ban hekmat se talebat rajana.

15Reng-oreng penter ban kang-tokang seher la ngoddi maca tolesan jareya sopaja bisa’a nerrangngagi artena ka sengko’. Tape padha ta’ bisa.

16Sengko’ gi’ buru ngedhing ja’ ba’na bisa mokka’ sakabbinna roseya ban nyare jalan e dhalem ra-parkara se malarat. Mon ba’na tao maca tolesan reya ban bisa nerrangngagi artena ka sengko’, bi’ sengko’ ba’na eberri’ana pangangguy karaja’an aropa juba bungo terrong ban kalong emmas tandha kahormadan. Laen dhari jareya bi’ sengko’ ba’na eangkada epadaddiya pangobasa se nomer tello’ e dhalem tang karaja’an."

17Atorra Daniyel, "Abdidalem ta’ mabi parenge papareng gapaneka, parengngagi ka oreng laen saos. Abdidalem maca’agiya tolesan ka’issa’ sareng ngatorana oneng artena ka junandalem.

18Sareng Allah Se Mahatenggi Nebukadnezar, ramaepon junandalem, epadaddi rato se agung sarta eparenge kamolja’an sareng epakasohor.

19Salerana talebat agung, kantos reng-oreng dhari sadajaepon bangsa, suku bangsa sareng basa, tako’ ka salerana. Manabi salerana mateyana oreng, pas epate’e; manabi masalamedda oreng, pas epasalamet. Salerana matenggi otabana ngababa’agi oreng menorot kasokanna.

20Namong e bakto salerana daddi sombong, cengkal sareng kejjem, salerana epagulu’ dhari tahtaepon karaja’anna kantos salerana kaelangan kaagungannepon.

21Salerana eojuk dhari masarakattepon manossa, dineng akkallepon aoba daddi akadi akkallepon burun alas. Salerana odhi’ apolong sareng hemar alas, adha’ar rebba akadi sape sareng asaren e tana e baba’annepon langnge’ kantos bacca kaebbunan. Dhi-budhina salerana ngakone ja’ Allah Se Mahatenggi kobasa ka karaja’annepon manossa ban karaja’an gapaneka eparengngagi ka pasera’a saos se epele Salerana.

22Namong pottraepon, enggi ka’dhinto junandalem dibi’, ta’ kasokan marendha, sanare ngagali parkara gapaneka.

23Junandalem matenggi aba’ e ajunannepon Pangeran e sowarga sareng bangal makon ngeba maso’ la-piala se erampas dhari Padalemman Socce. Junandalem sareng ja-pangraja, para raji sareng sellerrepon junandalem adha’ar aeng anggur dhari la-piala gapaneka. Junandalem ji-moji ba-diba se dhari emmas, salaka, dimbaga, besse, ju-kaju sareng bato, ba-diba se ta’ bisa ngoladi, ta’ bisa ngedhing ban ta’ ngarte pa-ponapa. Junandalem ta’ hormat ka Allah se nantowagi odhi’ sareng sedana junandalem sareng nantowagi jalannepon odhi’na junandalem.

24Gapaneka sabappepon aponapa Allah me’ ngeremmagi tanang ka’dhissa’ kaangguy nolessagi pessennepon.

25Tolesan ka’dhissa’ monyena sapaneka, ‘Ebitong, ebitong, etembang, ebagi.’

26Arteepon sapaneka: Ebitong, jamannepon pamarenta’anna junandalem ampon ebitong sareng Allah ban ampon epaambu;

27etembang, junandalem ampon etembang ban epanggi ja’ ta’ sae;

28ebagi, karaja’annepon junandalem egi-bagi ban eparengngagi ka oreng Mediya sareng Persiya."

29Belsiyazar duli makon ba-ponggabana ngagemmagi juba bungo terrong ka Daniyel ban masangngagi kalong emmas e guluna. Daniyel pas eangkat epadaddi pangobasa nomer tello’ e karaja’anna.

30E malem jareya keya Belsiyazar rato Babil epate’e.

31(6-1) Saellana Belsiyazar epate’e, karaja’anna erebbu’ bi’ Darius oreng Mediya. E bakto jareya yuswana Darius sabidak dhuwa’ taon.


  Share Facebook  |  Share Twitter

 <<  Daniel 5 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran