Alkitab Mobile SABDA
[VER] : [MADURA]     [PL]  [PB] 
 <<  Daniel 9 >> 

1E taon se kapeng settong pamarenta’anna Darius oreng Mediya, pottrana Ahasyweros e karaja’an Babil, sengko’ Daniyel, ca-maca ku-buku agama. Sengko’ mekker ja’ menorot dhabuna ALLAH ka Nabbi Yeremiya, kottha Yerusalim bakal pagguna gujur pettong polo taon abidda.

2(9:1)

3Sengko’ pas adu’a epagu-onggu ka Guste Allah, ban nyo’on kabellasanna. Laen dhari jareya sengko’ apowasa ban ngangguy kalambi karong sarta toju’ e attassa abu.

4Sakabbinna dusana tang bangsa bi’ sengko’ eakone e ajunanna tang Guste ALLAH. Ca’na sengko’, "Guste, Junandalem agung, sarengngan abdidalem sadaja amolja’agi Junandalem. Junandalem ros-terrosan neptebbi parjanjiyan sareng noduwagi kataresna’an se langgeng ka reng-oreng se taresna ka Junandalem sareng se ajalannagi sadaja dhabuepon Junandalem.

5Abdidalem sadaja dusa, daraka, sareng alako sala. Abdidalem sadaja ampon aberonta’ sareng nerrak papakonnepon Junandalem sarta ta’ atoro’ ka sadajana atorannepon Junandalem.

6Abdidalem sadaja ta’ merengngagi para nabbi, abdiepon Junandalem se abu-dhabu bit asmaepon Junandalem ka to-rato abdidalem sadaja, ka para pamimpin sareng ka para bangatowa sareng ka sadajana bangsa abdidalem.

7Guste, sadaja se elampa’agi Junandalem lerres sareng adil terros, namong abdidalem sadaja ros-terrosan madhateng malo ka aba’ dibi’, enggi ka’dhinto abdidalem sadaja se enneng e Yudea sareng Yerusalim, ban sadajana oreng se sabangsa sareng abdidalem sadaja se sareng Junandalem epabalessadan ka ra-nagara se jau sareng se semma’ polana ta’ esto ka Junandalem.

8To-rato abdidalem sadaja, para pamimpin sareng bangatowa abdidalem sadaja ampon padha ngalakone sabarang se matodhusan sareng ampon dusa ka Junandalem, Guste.

9Junandalem talebat bellas ase sareng gampang nyapora, sanare abdidalem sadaja alaban ka Junandalem.

10Abdidalem sadaja ta’ merengngagi sowaraepon Junandalem, Guste ALLAH, e bakto Junandalem makon abdidalem sadaja atoro’ ka kom-hokom se eparengngagi Junandalem ka abdidalem sadaja kalaban parantara’annepon para nabbi, di-abdiepon Junandalem ka’dhissa’.

11Saantero Isra’il nerrak kom-hokommepon Junandalem sareng ta’ poron merengngagi sowaraepon Junandalem. Abdidalem sadaja dusa ka Junandalem, daddi sareng Junandalem etebane babaston se ampon eserrat e dhalem Ketab Mosa, abdiepon Junandalem.

12Se elampa’agi Junandalem lerres akadi se ampon ejanjiyagi Junandalem ka abdidalem sadaja sareng ka sadajaepon rato se ngobasane abdidalem sadaja. Yerusalim sareng Junandalem ampon eokom aberra’an dhari kottha se ka’dhimma’a saos e dunnya ka’dhinto.

13Sadajaepon balai se kasebbut e dhalem Hokommepon Mosa sareng Junandalem eteba’agi ka abdidalem sadaja. Sanare saka’dhinto, Guste ALLAH, abdidalem sadaja gi’ ta’ poron masennengnga panggaliyannepon Junandalem. Abdidalem sadaja paggun ta’ poron adinggallagi dusa sareng ta’ poron agateyagi sadajana pangajarannepon Junandalem.

14Junandalem, Guste ALLAH, ampon ngokom abdidalem sadaja sareng balai se ampon esadhiya’agi sareng Junandalem; se elampa’agi Junandalem salanjangnga lerres sareng adil, namong abdidalem sadaja ta’ merengngagi sowaraepon Junandalem.

15Guste Allah, Pangeran kaula, Junandalem ampon noduwagi kobasaepon Junandalem kalaban abakta ommattepon kalowar dhari Messer, dineng kobasaepon Junandalem gapaneka paggun ekaemodi oreng. Abdidalem sadaja dusa sareng abadhi sala.

16Junandalem ampon abillai abdidalem sadaja gi’ jaman dhimen, daddi samangken ja’ duka pole ka Yerusalim, kotthaepon Junandalem dibi’, gumo’epon Junandalem se socce. Lantaran dusa abdidalem sadaja sareng kajahadannepon bangatowa abdidalem sadaja, daddi reng-oreng se badha e sabingkerrepon abdidalem sadaja padha nganggep rendha ka Yerusalim sareng ka ommattepon Junandalem.

17Guste Allah, moga Junandalem kasokana meyarsa’agi du’a sareng parnyo’onan abdidalem. Padalemmannepon Junandalem se ampon epamosna ka’dhinto ngereng pabaliyagi akadi asalla pole, palerressagi sopaja sadajana oreng padha’a oneng ja’ Junandalem Allah.

18Peyarsa’agi abdidalem sadaja, Guste Allah, oladi abdidalem sadaja, oladi kasangsara’an abdidalem sadaja sareng karosagannepon kottha se enyamae ngangguy asmaepon Junandalem. Abdidalem sadaja adu’a ka Junandalem banne lantaran sa-jasaepon abdidalem sadaja, namong lantaran Junandalem raja bellas asena.

19Guste, peyarsa’agi abdidalem sadaja, parenge sapora abdidalem sadaja, oladi abdidalem sadaja, ngereng duli tolong! Ja’ bit-abit, sopaja sadajana oreng padha oneng ja’ Junandalem Allah. Sabab Yerusalim sareng ommattepon Junandalem kaagungannepon Junandalem malolo."

20Sengko’ terros adu’a ban ngakone dusa sarta dusana tang bangsa, ban nyo’on ka tang Guste ALLAH sopaja Padalemmanna se socce epabali epakantha asalla.

21Sabatara sengko’ adu’a, Jibra’il se etangale’e sengko’ e dhalem tang pangaton se lamba’ rowa, ngabber ka tang kennengngan. E bakto jareya teppa’na oreng ngatorragiya kurban asar.

22Jibra’il pas nerrangngagi ka sengko’ kantha reya, "Daniyel, sengko’ dha’ enna’ nolongana ba’na sopaja ba’na ngarte maksodda ramalan jareya.

23E bakto ba’na molae nyo’on ka Allah, Salerana apareng jawaban. Sengko’ dha’ enna’ manapa’a jawaban jareya sabab Salerana taresna ka ba’na. Sateya mara edhingngagi pagu-onggu sabatara sengko’ nerrangngagi apa artena pangaton jareya.

24Pettong kale pettong polo taon jareya bakto se eteptebbagi Allah kaangguy mabebasa bangsana ban kotthana ba’na se socce rowa dhari dusa ban kajahadan. Sakabbinna dusa bakal esapora’a ban kaadilan se langgeng bakal ejalannagiya, sampe’ pangaton ban ramalan jareya daddi kanyata’an, ban Padalemman Socce bakal ebakteyagiya ka Pangeran pole.

25Mara cathet ban pahame reya: Molae dhari bakto kalowarra parenta kaangguy maddek pole Yerusalim sampe’ parabuna settong pamimpin peleyanna Allah, abidda pettong kale pettong taon. Pettong kale sabidak dhuwa’ taon abidda rong-lorong ban teng-binteng Yerusalim bakal epaddegga pole, tape bakto se abidda sajareya gella’ possa’ ban kasossa’an.

26Samarena bakto jareya pamimpin peleyanna Allah gella’ bakal epateyana, mangkana ta’ sala pa-apa. Daddi pas dhateng tantarana settong rato se kowat, mamosna Yerusalim sarta Padalemman Socce. Aherra jaman jareya bakal dhatengnga akantha banjir se ngeba perrang ban maancor apa’a bai, akantha se la eteptebbagi bi’ Allah.

27Rato jareya bakal mabadha’a parjanjiyan se kowat bi’ oreng sabannya’na pettong taon abidda. E partengnga’anna jaman jareya, rato jareya bakal maambuwa oreng ngeba kurban ban tor-ator. Saellana jareya pas bakal badha’a kadaddiyan se talebat nako’e, iya reya se enyamae Kajahadan se maancor bakal esaba’a e Padalemman Socce ban bakal pagguna badha e jadhiya sampe’ oreng se nyaba’ jareya e jadhiya katebanan pate akantha se la eteptebbagi Allah kaangguy aba’na."


  Share Facebook  |  Share Twitter

 <<  Daniel 9 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel