Dual Panel1E taon se kapeng dhuwa’ pamarenta’anna Rato Darius e Persiya, e tanggal settong bulan ennem, PANGERAN adhabu kalaban parantara’anna Nabbi Hagai. Pessenna PANGERAN jareya etojjuwagi ka Zerubabil pottrana Seyaltiyel, gubennor Yehuda, ban ka Imam Agung Yusak pottrana Yozadak.
2PANGERAN Se Mahakobasa adhabu ka Hagai, "Bangsa reya ngoca’ ja’ gi’ banne baktona se maddegga Tang Padalemman."
3Saellana jareya kalaban parantara’anna Nabbi Hagai, PANGERAN adhabu ka ommadda,
4"He, Tang ommat, apa sateya reya la baktona ba’na enneng e dhalem bengko se kowat ban koko, mangkana Tang Padalemman gi’ aropa jur-gujuran?
5Mara, abassagi kabadha’anna ba’na!
6Ba’na nabur ne-bine sabannya’na, tape hasel se ekaolle ba’na pera’ sakone’. Ba’na andhi’ se ekakana, tape ta’ cokop makennyang tabu’na. Ba’na andhi’ anggur, tape ta’ cokop matobuk ba’na. Ba’na andhi’ angguy, tape ta’ cokop maanga’ badanna. Ban opa se etarema reng-oreng derrebban ta’ cokop egabay panyambungnga odhi’na.
7Apa ba’na ta’ apangrasa, arapa me’ kantha jareya?
8Sateya, kassa’ ongga ka mo’-gumo’ ngala’ kaju, pas paddek Tang Padalemman rowa; Sengko’ tanto pas senneng ban Sengko’ bakal esemba’a pole kalaban cara se samasthena. Kodda’, abassagi kabadha’anna ba’na jareya!
9Ba’na ngarep hasella tamennan se talebat bannya’na, o-tao se ekaolle ba’na coma ce’ sakone’na; bi’ ba’na egiba mole, tape bi’ Sengko’ eserrop, daddi eabber angen tadha’ karena. Arapa me’ epakantha jareya bi’ Sengko’? Polana Tang Padalemman gi’ aropa jur-gujuran, mangkana ba’na padha repot maddek bengkona bang-sebang.
10Daddi jareya sababba arapa ojan me’ ta’ endha’ toron sampe’ tadha’ men-tamennan se bisa tombu.
11Sengko’ makerreng tana ban mo’-gumo’, gal-teggalla gandum ban bun-kebbun anggur sarta bun-kebbun jaitun, ban sakabbinna bu-tombuwan e tana reya, la’-mala’ manossa sarta keban ban sakabbinna se ekaehteyar ba’na."
12Saellana jareya Zerubabil ban Yusak sarta saneyap ommat Isra’il se la abali dhari pambuwangan e Babil pas atoro’ ka dhabuna Hagai, otosanna PANGERAN rowa. Apa se epakonnagi PANGERAN elakone, sabab reng-oreng jareya tako’ ka PANGERAN.
13Hagai pas notorragi ka reng-oreng jareya pa-apa se epessennagi PANGERAN, iya reya ja’ PANGERAN la ajanji ngaobana ommat jareya.
14PANGERAN maguli atena Gubennor Zerubabil, Imam Agung Yusak sarta sakabbinna oreng se la abali dhari pambuwangan, sopaja padha’a alako maddek Padalemman Socce se eatorragi ka PANGERAN Se Mahakobasa, iya reya Allahna reng-oreng jareya.
15Reng-oreng jareya molae alako e tanggal pa’ lekor, bulan ennem e taon se kapeng dhuwa’ jamanna pamarenta’anna Rato Darius.