Dual Panel1Badha oreng lalake’ anyama Mikha, bengkona e pagunongan e baba kakobasa’anna Efraim.
2E settong are Mikha jareya mator ka ebuna, "Ebu, e bakto sampeyan kaelangan saebu saratos pesse salaka, kaula ngedhing sampeyan abasto malengnga. Paneka’, bu, pessena. Kaula se ngeco’." Saodda ebuna, "Moga-moga ba’na eberkadana PANGERAN, na’!"
3Mikha mabali pesse jareya ka ebuna, ban ebuna adhabu, "Sopaja ba’na lopoda dhari tang babaston jareya, sengko’ dibi’ ngatorragi salaka reya ka PANGERAN, me’ olle ekagabay arca dhari kaju se ekole’e salaka. Daddi bi’ sengko’ pesse jareya epabaliya ka ba’na."
4Daddi saellana Mikha mabali pesse jareya ka ebuna, bi’ ebuna pesse salaka jareya ekala’ dhu ratos, pas ebagi ka tokang salaka. Ebuna nyoro tokang salaka jareya agabay arca dhari kaju se ekole’e salaka jareya. Arca jareya laju esaba’ e bengkona Mikha.
5Mikha dibi’ la andhi’ kennengnganna pamojja’an, la agabay ca-arca brahala ban efod salambar, sarta mele ana’ lalake’na kasorang epadaddi imam.
6E bakto jareya bangsa Isra’il ta’ andhi’ rato; saneyap oreng ngala’ sakarebba dibi’.
7E jaman jareya badha keya oreng ngodha kasorang dhari suku Lewi. Lamba’na bengkona e Betlehem e baba kakobasa’anna Yehuda.
8Tape sateya la ngalle dhari kottha jareya, ban teppa’na ajalan nyare kennengngan laen. E dhalem parjalananna jareya oreng ngodha buru napa’ ka bengkona Mikha e dhaera pagunongan e baba kakobasa’anna Efraim.
9Mikha atanya ka oreng jareya, "Sampeyan oreng ka’imma?" Saodda oreng jareya, "Kaula oreng Lewi dhari Betlehem e Yehuda. Kaula nyare kennengngan se ekennengngana kaula."
10Ca’na Mikha, "Apolong ban kaula saos e ka’dhinto, daddi panasehat sareng imam e ka’iya. Bi’ kaula sampeyan eatorana pesse salaka sapolo sabban taon, jugan rasogan sareng dha’ar."
11Oreng ngodha suku Lewi jareya narema pamentana Mikha jareya, bi’ Mikha laju epadaddi imamma. Oreng jareya apolong e bengkona Mikha sarta eanggep akantha ana’na dibi’.
12(17:11)
13Oca’na Mikha, "Sateya sengko’ yakin tanto PANGERAN bakal saeya ka sengko’ sabab sengko’ la andhi’ imam oreng Lewi."