Dual Panel1Malaekadda PANGERAN meyos dhari Gilgal ka Bokhim, pas adhabu ka reng-oreng Isra’il, "Sengko’ la makalowar ba’na dhari Messer, sarta ngeba ba’na ka nagara se ejanjiyagi sengko’ ka bangatowana ba’na. Sengko’ la ngoca’ keya, ‘Ja’ sengko’ ta’ kera maburung tang parjanjiyan ban ba’na.
2Daddi ba’na ta’ olle mabadha parjanjiyan ban pandhudhu’na nagara reya. Ba-mezbana reng-oreng jareya kodu epagujur.’ Tape ba’na ta’ ajalannagi tang parenta jareya. La’-mala’ ba’na ngalakone sabaligga!
3Daddi, mara edhingngagi sateya! Mon ba’na aperrang bi’ reng-oreng nagara reya, reng-oreng jareya bi’ sengko’ ta’ eojuga. Reng-oreng jareya bakal daddiya mosona ba’na, ban ba’na bakal tajira’a, sampe’ ba’na noro’ nyemba ka ba-dibana reng-oreng jareya."
4Saellana malaekat jareya mare se manapa’ pessen jareya, reng-oreng Isra’il jareya padha nanges ce’ kajana.
5Daddi kennengngan jareya enyamae Bokhim. Saellana jareya reng-oreng Isra’il ngatorragi kurban ka PANGERAN.
6Saellana reng-oreng Isra’il epamangkat bi’ Yusak, reng-oreng Isra’il jareya padha mangkat, ngobasa’ana tana bagiyanna bang-sebang.
7Saabidda Yusak gi’ odhi’, ommat Isra’il padha abakte ka PANGERAN. Sasedana Yusak reng-oreng Isra’il jareya gi’ paggun keya abakte ka PANGERAN saabidda epimpin bi’ reng-oreng se nangale’e dibi’ kaajiban-kaajiban se epabadha bi’ PANGERAN kaangguy ommat Isra’il.
8Yusak pottrana Nun, abdina PANGERAN jareya, seda e bakto yuswana saratos sapolo taon.
9Jinazana esareyagi e tana kaagunganna dibi’, iya areya e Timnat-Serah e dhaera Pagunongan Efraim e dhaja’anna Gunong Ga’as.
10Saellana jareya sakabbinna angkadan jareya mate keya. Angkadan samarena jareya ta’ tao ka PANGERAN polana ta’ noro’ nangale’e pa-apa se elampa’agi PANGERAN kaangguy bangsa Isra’il.
11Saellana jareya oreng Isra’il agabay dusa ka PANGERAN. Reng-oreng jareya ta’ nyemba ka PANGERAN, Allah se esemba bangatowana, iya areya Allah se la makalowar ommat Isra’il dhari Messer. Oreng Isra’il pas molae nyemba ka Ba’al ban Asytoret sarta ba-diba laenna se esemba sa-bangsa e sabingkerra. PANGERAN duka ka reng-oreng jareya, ban garombolan se nyerrang sarta arampok reng-oreng Isra’il jareya etorot bi’ Salerana. Reng-oreng Isra’il jareya ta’ bisa apa-rapa ngadhebbi so-moso e sakalenglengnga.
12(2:11)
13(2:11)
14(2:11)
15Sabban entar aperrang, PANGERAN ta’ apareng bantowan sakale, menorot apa se la edhabuwagi ka reng-oreng jareya. Daddi ommat Isra’il nanggung kasossa’an se talebat rajana.
16PANGERAN li-baliyan apareng pamimpin se aehteyar mabebasa ommat jareya dhari rampok.
17Tape reng-oreng Isra’il jareya ta’ marduli ka pamimpinna. Nyemba ka ba-diba ban ta’ esto ka PANGERAN. Reng-oreng jareya ta’ nerowe bangatowana se paggun ta’at ka kon-papakonna PANGERAN.
18Mon PANGERAN apareng pamimpin ka bangsa Isra’il, pamimpin jareya terros ebanto bi’ PANGERAN. Ban saabidda pamimpin jareya gi’ odhi’, bi’ PANGERAN ommat jareya epabebas dhari so-mosona. PANGERAN neser mon meyarsa serrona ommat Isra’il jareya mon teppa’na ekaneyaja ban eseksa.
19Tape mon pamimpin jareya la mate, bangsa jareya tengkana ajuba’an pole dhari angkadan sabellunna. Ommat Isra’il jareya nyemba ban ngabdi ka ba-diba, abali ngalakone kabiyasa’anna se hat-jahat ban ta’ endha’ ngoba tengkana se juba’.
20Daddi PANGERAN ce’ dukana ka ommat Isra’il, pas adhabu, "Sengko’ la marenta’agi ka bangatowana bangsa Isra’il reya sopaja pagguna neptebbi parjanjiyanna bi’ Sengko’. Tape bangsa reya la ta’ neptebbi parjanjiyan jareya sarta ta’ atoro’ ka Tang parenta.
21Sateya Sengko’ ta’ nolongana ngojuk bangsa se kemma’a bai se gi’ badha e nagara reya e bakto Yusak mate.
22Sa-bangsa jareya bi’ Sengko’ eangguya ngoji bangsa Isra’il reya, sopaja Sengko’ tao apa bangsa Isra’il reya atoro’a ka Tang parenta akantha bangatowana apa enja’."
23Jareya sababba arapa bi’ PANGERAN Yusak me’ ta’ epamennang ka sa-bangsa jareya. Sabaligga, bi’ PANGERAN sa-bangsa jareya epanneng aenggun neng e nagara jareya, ta’ duli eojuk.