Dual Panel1Ommat Isra’il agabay dusa pole ka PANGERAN, daddi bi’ PANGERAN epanneng maske ekobasae bangsa Midian sampe’ pettong taon abidda.
2Oreng Isra’il ce’ tako’na ka oreng Midian, daddi padha ngetek e wa-guwa ban e ngan-kennengngan laen se aman e nong-gunong.
3Ban pole sabban oreng tane Isra’il men-namen, oreng Midian dhateng abareng ban oreng Amalek sarta reng-oreng laenna dhari sagara beddhi nyerrang oreng Isra’il.
4Reng-oreng jareya akemah e tanana bangsa Isra’il ban arosak men-tamennanna e jadhiya sampe’ ka dhaera e sabingkerra Gaza bagiyan lao’. Dumba, sape ban hemar peyara’anna padha egiba buru kabbi; bangsa Isra’il ta’ edinae pa-apa sakale sampe’ tadha’ se ekakana.
5Reng-oreng jareya dhateng bal-ambalan ngeba ebin ban kemah se ce’ bannya’na. Reng-oreng jareya ban ta-ontana ce’ bannya’na sampe’ ta’ ekenneng bitong. Reng-oreng jareya dhateng arosak nagarana bangsa Isra’il,
6ban bangsa Isra’il ta’ bisa apa-rapa ngadhebbi reng-oreng jareya.
7Reng-oreng Isra’il pas aserro nyo’on tolong ka PANGERAN kaangguy alaban ka bangsa Midian.
8PANGERAN ngotos nabbi ka bangsa Isra’il. Dhabuna nabbi jareya, "Reya’ dhabuna PANGERAN, Allahna Isra’il, ‘Bi’ Sengko’ ba’na la epabebas dhari se ekadunor oreng e Messer.
9Bi’ Sengko’ ba’na epasalamet dhari reng-oreng Messer ban reng-oreng e nagara reya se merrange ba’na. E bakto ba’na nyerrang reng-oreng e nagara reya, bi’ Sengko’ reng-oreng jareya eojuk, ban nagara reya bi’ Sengko’ ebagi ka ba’na.
10Sengko’ la ngoca’ ka ba’na ja’ Sengko’ reya GUSTE Allahna ba’na, ban ja’ ba’na ta’ olle nyemba ka ba-dibana bangsa Amori se nagarana sateya la ekennengnge ba’na. Tape ba’na ta’ atoro’ ka Tang parenta.’"
11E settong are malaekadda PANGERAN rabu ka disa Ofra, pas alenggi e baba’anna bungkana terpentin andhi’na Yowas, oreng dhari kaomma Abiyezer. Ana’na se anyama Gideyon, teppa’na agebba gandum e pamerressanna anggur, se alako jareya tek-ngetek, tako’ etemmo oreng Midian.
12Malaekadda PANGERAN gella’ ngaton ka Gideyon e jadhiya, dhabuna malaekat jareya, "He, kana’ kowat ban bangalan, PANGERAN asarengnge ba’na!"
13Saodda Gideyon, "Ta’ langkong, guste, aponapa bangsa abdina me’ kodu nanggung sadajana kadaddiyan ka’dhinto manabi pajat lerres PANGERAN asarengnge bangsa abdina? Ka’dhimma sadajana kaajiban se ebadha’agi sareng PANGERAN gi’ dhimen se ecareta’agi sareng para bangatowa abdina sadaja parkara PANGERAN se makalowar bangsa Isra’il dhari nagara Messer? Samangken abdina sadaja ampon edinggallagi sareng PANGERAN, ampon epanneng sanare ekobasae reng-oreng Midian."
14PANGERAN pas apareng papakon kantha reya ka Gideyon, "Sateya kassa’ ba’na mangkat, mabebas bangsa Isra’il dhari kakobasa’anna bangsa Midian kalaban ngangguy kakowadanna ba’na. Sengko’ dibi’ se nyoro ba’na."
15Saodda Gideyon, "Me’ abdidalem, Guste? Kadi ponapa abdidalem se mabebasa bangsa Isra’il dhari bangsa Midian? E dhalem suku Manasye, kaom abdidalem se paleng ta’ kowat. Sarengngan pole e antarana sabala’an, abdidalem se paleng tadha’ argana."
16Dhabuna PANGERAN, "Ba’na tanto bisa, sabab Sengko’ se nolongana ba’na. Ba’na bakal bisa’a mate’e reng-oreng Midian kalaban gampang, akantha mon ba’na pera’ ngadhebbi oreng kasorang."
17Gideyon nyaot, "Manabi Junandalem lerres kasokan ka abdidalem, ngereng abdidalem nyo’ona tandha ja’ pajat lerres Junandalem se makon abdidalem.
18Ta’ langkong, Guste, kasokana Junandalem anante’ e ka’dhinto dhimen, kantos abdidalem lastare nyadhiya’agi dha’ar kaangguy Junandalem." Dhabuna Pangeran, "Iya, mara, Sengko’ anante’a sampe’ ba’na abali."
19Daddi Gideyon mole ka kemahna, pas aola embi’ se gi’ ngodha settong, pas ngala’ teppong sapolo kilo, ekagabay roti se ta’ eragi’i. Dagingnga ebaddhai budhak, kowana ebaddhai kattha, kabbi jareya pas eatorragi ka malaekadda Allah se anante’ e baba’anna bungkana terpentin gella’.
20Malaekat jareya adhabu, "Daging ban roti jareya saba’ e attassa bato jareya, kowana dagingnga totta’ ka attassa." Gideyon ajalannagi papakon jareya.
21Malaekadda PANGERAN jareya mangenceng lengngenna pas nyedding daging ban roti gella’ bi’ konco’na tongket se e astana. Bato jareya laju rabbang, daging ban roti gella’ ekello’ apoy jareya sampe’ tadha’. Malaekat jareya pas elang.
22Gideyon pas apangrasa ja’ se etangale jareya malaekadda PANGERAN, daddi Gideyon pas tako’ sarta ngoca’ bariya, "Palang, abdidalem, Guste ALLAH Se Mahatenggi! Abdidalem ampon dhep-adhebban sareng malaekattepon Junandalem!"
23Tape PANGERAN adhabu ka Gideyon, "Ella, ja’ pagupo, ja’ tako’. Ba’na ta’ kera mate."
24Gideyon pas maddek mezba e jadhiya, mezba jareya enyamae "PANGERAN Somberra Kataremtemman ban Kama’moran." Sampe’ sateya bato jareya gi’ badha e Ofra, kotthana oreng Abiyezer.
25E malem jareya PANGERAN apareng papakon reya ka Gideyon, "Kala’ sape lake’na eppa’na ba’na, sape se paleng bagus se aomor pettong taon. Bungkar mezba se ekagabay eppa’na ba’na kaangguy Ba’al, parobbu cangga lambangnga Dewi Asyera se badha e erenganna mezba jareya.
26E attassa tombuganna jur-gujuran jareya paddeggi mezba se la erancang epabagus. Sape lake’ gella’ pas obbar kol-bungkol kabbi menangka kurban ka PANGERAN. Cangga lambangnga Dewi Asyera se la eparobbu rowa kagabay kajuna."
27Gideyon mele dunorra sapolo oreng, pas entar ajalannagi apa se edhabuwagi PANGERAN jareya. Tape sarrena Gideyon jareya ce’ tako’na ka la-balana ban ka reng-oreng e disana jareya, daddi aba’na ta’ bangal ajalannagi jareya yang-seyang. Daddi jareya elakone e bakto malem.
28E bakto pandhudhu’ kottha jareya jaga kalagguwanna gu-laggu, mezba Ba’al ban cangga lambangnga Dewi Asyera rowa la etemmo robbu. Reng-oreng jareya nangale’e keya ja’ e jadhiya la epaddeggi mezba ban la badha sape lake’ se eobbar menangka kurban e jadhiya.
29Reng-oreng jareya padha saleng atanya, "Lalakonna sapa reya?" Saellana eoros, pas etemmo ja’ jareya lalakonna Gideyon ana’na Yowas.
30Ca’na reng-oreng jareya ka Yowas, "Ana’na sampeyan abungkar mezba Ba’al sareng cangga lambangnga Dewi Asyera se badha e erenganna mezba ganeka. Daddi, tore pakalowar ka’anja ana’na sampeyan ganeka; kana’ ganeka kodu epate’e!"
31Tape Yowas nyaot ka reng-oreng se nangtang jareya, "Sampeyan paneka ponapa noro’ ka Ba’al ban abillai Ba’al? Pasera se apiha’ ka Ba’al epateyana are mangken! Mon Ba’al pajat Allah, dinggal me’ olle abillai aba’na dibi’, sabab se ebungkar ganeka mezbana Ba’al."
32Sarrena Yowas ngoca’, "Dina me’ olle Ba’al dibi’ se alaban ka Gideyon, sabab Gideyon se abungkar mezba," daddi sajjegga jareya Gideyon bi’ oreng enyamae "Yeruba’al".
33E bakto jareya reng-oreng Midian, Amalek ban ku-suku bangsa laen e sagara beddhi e temorra Yordan la padha akompol. Reng-oreng jareya alengka Songay Yordan, pas akemah e Cora Yizre’el.
34Tape Gideyon ekobasae Errohna PANGERAN, daddi pas nope tarompet ngolok reng-oreng dhari kaom Abiyezer sopaja padha agabung ban aba’na.
35Laen dhari jareya Gideyon ngerem otosan ka suku Asyer, Zebulon, Naftali ban suku Manasye se badha e temorra ban e bara’na Songay Yordan, eajak agabung ban aba’na. Reng-oreng jareya dhateng kabbi nolongana Gideyon.
36Atorra Gideyon ka Allah, "Guste, Junandalem ampon adhabu ja’ Junandalem ngagemma abdidalem epamabebasa ommat Isra’il.
37Manabi lerres saka’dhinto, abdidalem nyaba’a teng-guntenganna buluna dumba e tana ka’dhinto, e kennengngan se biyasana ebadhi kennengnganna oreng agebba gandum. Manabi lagguna buluna dumba ka’dhinto bacca polana ebbun, tape tanana bunten, gapaneka sareng abdidalem eanggebba tandha ja’ Junandalem lerres ngagemma abdidalem badhi mabebas ommat Isra’il."
38Apa se ekoca’agi Gideyon jareya kalakon onggu. E bakto Gideyon jaga kalagguwanna gu-laggu pas merres buluna dumbana, dhari buluna dumba jareya kalowar aeng ebbun bannya’na satobung.
39Atorra Gideyon ka Allah, "Guste, ta’ langkong ja’ duka ka abdidalem, manabi abdidalem mator sakaleyan aggi’. Edine abdidalem nyo’on bukte pole ngangguy teng-guntenganna buluna dumba ka’dhinto. Namong samangken buluna dumbana se pakerreng, tanana papaggun bacca."
40E malem jareya Allah ngabbuli apa se eso’on Gideyon jareya. Kalagguwanna gu-laggu buluna dumbana kerreng, tanana se bacca ekenneng ebbun.