Alkitab Mobile SABDA
[VER] : [MADURA]     [PL]  [PB] 
 <<  Imamat 24 >> 

1Dhabuna PANGERAN ka Mosa,

2"Kabala ka bangsa Isra’il, soro ngala’ mennya’ jaitun se morne ban se paleng bagus, esseyagi ka mar-damar e dhalem Kemah Socce, sopaja damar jareya ekennenga odhi’i ros-terrosan.

3Sabban malem Harun kodu ngodhi’i mar-damar jareya ban ngator sopaja mar-damar jareya terrosa odhi’ sampe’ gu-laggu, e lowaranna bir-tabir se notobi Petthe Parjanjiyan e Rowangan Se Mahasocce. Parenta reya kodu ejalannagi bi’ na’ potona ba’na salanjangnga.

4Harun kodu ngoros mar-damar se badha e panongko’anna se ekagabay dhari emmas morne jarowa sopaja mar-damar jareya terrosa odhi’ salanjangnga e dhalem Kemah Socce."

5Ngala’ teppong se paleng bagus dhubellas kilo, kagabay roti se bunter dhubellas meggi’, tong-settongnga sakilo.

6Jajar roti jareya padaddi dhu jijir, jir-sajijirra bannya’na nem-ennem, e attassa meja se akole’ emmas morne se badha e dhalem Kemah Socce.

7Roti se dhu jijir jareya pobuwi mennyan se morne menangka tandha ja’ roti jareya kurban kakanan se eatorragi ka PANGERAN.

8Sabban are Sabat kodu badha roti se esajiyagi e dhalem Kemah Socce. Jareya kawajibanna bangsa Isra’il salanjangnga.

9Roti jareya bagiyanna Harun ban na’ potona, se kodu ngakan roti jareya e kennengngan se etantowagi kaangguy kaparlowan jareya malolo, sabab roti jareya bagiyan se paleng socce dhari kurban kakanan se eatorragi ka PANGERAN kaangguy bagiyanna para imam.

10E parkemahanna oreng Isra’il badha oreng lalake’ kasorang. Oreng jareya eppa’na oreng Messer ban ebuna oreng Isra’il, nyamana Selomit, ana’na Dibri dhari suku Dan. E settong are oreng jareya atokar ban oreng Isra’il e parkemahan. E bakto atokar, oreng jareya abasto Allah. Daddi oreng jareya bi’ reng-oreng Isra’il egiba ka Mosa,

11(24:10)

12ban etahan sambi anante’ potosanna PANGERAN se nantowagiya okomanna.

13Dhabuna PANGERAN ka Mosa,

14"Giba oreng jareya ka lowaranna parkemahan. Saneyap oreng se ngedhing oreng jareya abasto kodu nompangngagi tanangnga ka cethagga oreng jareya kaangguy nyakse’e ja’ oreng jareya sala. Saellana jareya sakabbinna bangsa Isra’il kodu agarujuk oreng jareya ban bato sampe’ mate.

15Saellana jareya kabala ka bangsa Isra’il: pa’-sapa’a abasto Allah kodu nanggung okomanna,

16ban kodu eokom mate. Sapa’a bai se abasto PANGERAN kodu egarujuk ban bato bi’ sakabbinna ommat Isra’il sampe’ mate. Hokom jareya kodu eangguy ka oreng Isra’il ban ka oreng manca se neptep apolong ban oreng Isra’il.

17Pa’-sapa’a se mate’e oreng laen kodu eokom mate.

18Pa’-sapa’a se mate’e ebin andhi’na oreng laen kodu agante’e. Dhasarra iya areya ‘nyaba gante nyaba’.

19Mon oreng maloka oreng laen, oreng jareya kodu ebales epaloka keya.

20Mon mapotong tolangnga oreng, tolangnga dibi’ kodu epapotong keya; mon mabuta matana oreng salaja, matana dibi’ kodu epabuta salaja keya. Mon mokol oreng sampe’ potong gigina, gigina dibi’ kodu epapotong keya. Pandha’na, apa’a bai se ejalannagi oreng jareya sampe’ andaddiyagi oreng laen ena badanna, kodu ebalessagi ka aba’na.

21Pa’-sapa’a se mate’e ebin kodu agante’e, tape pa’-sapa’a mate’e manossa kodu eokom mate.

22Hokom reya kodu eangguy ka ba’na kabbi, reng-oreng Isra’il, bariya keya ka oreng manca se neptep apolong ban ba’na, sabab Sengko’ reya PANGERAN, Allahna ba’na."

23Saellana Mosa manapa’ dhabuna PANGERAN jareya ka bangsa Isra’il, oreng se abasto Allah gella’ laju egiba ka lowarra parkemahan, pas egarujuk ban bato sampe’ mate. Daddi bangsa Isra’il ajalannagi apa se la epakonnagi PANGERAN ka Mosa.


  Share Facebook  |  Share Twitter

 <<  Imamat 24 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel