Dual Panel1PANGERAN apareng atoran-atoran reya ka Mosa.
2Oreng kodu ngatorragi kurban mon agabay dusa ka PANGERAN lantaran ta’ endha’ mabali barang patoro’anna sasamana, otabana nepo oreng, ngeco’ barangnga sasamana,
3otabana barangnga se elang la etemmo tape asompa ngoca’ ta’ etemmo.
4Oreng se sala jareya kodu majar, mabali sabarang se ekaolle aba’na kalaban jalan se ta’ jujur. E bakto oreng jareya etemmo ja’ sala, e bakto jareya aba’na kodu majar gantena karogiyan ka se andhi’, etambai dhu polo persenna.
5(6:4)
6Menangka kurban tebbusanna kasala’an oreng jareya kodu ngatorragi dumba otabana embi’ lake’ se tadha’ calena. Argana dumba otaba embi’ jareya eetong menorot arga se etantowagi e Kemah Socce.
7Imam ngatorragi kurban jareya kaangguy dusana oreng jareya, sopaja dusana jareya esapora’a bi’ PANGERAN.
8PANGERAN makon Mosa
9apareng ka Harun ban tra-pottrana atoran se acem-macem parkara kurban obbaran. Kurban obbaran jareya kodu esaba’ e mezba samalem benteng, ban apoyya kodu terros epaodhi’.
10Saellana kurban jareya daddi abu, imam se ngangguy calana pendha’ ban juba dhari kaen linen, kodu ngangko’ abu se acampor mennya’na gaji jareya dhari attassa mezba, sarta nyaba’ abu jareya e erenganna mezba.
11Saellana jareya imam buru kodu asalen sarta laju ngeba abu jareya ka lowarra parkemahan, ka kennengngan se pajat egabay kaparlowan jareya malolo.
12Sabban gi’ laggu imam kodu nyaba’ kaju e attassa mezba, nata kurban obbaran e attassa meja jareya, sarta ngobbar gajina kurban salameddan e jadhiya. Apoy e attassa mezba jareya kodu odhi’ terros, ta’ olle sampe’ mate.
13(6:12)
14Areya’ atoran-atoranna kurban sasajin ka PANGERAN. Kurban jareya kodu egiba ka adha’anna mezba bi’ sala settong dhari toronanna Harun.
15Imam jareya kodu ngala’ teppong alos sapergem ban mennya’na sarta ban mennyanna, pas ngobbar jareya kabbi e attassa mezba menangka tandha ja’ kurban jareya kabbi eatorragi ka PANGERAN. Bauna kurban jareya masenneng panggaliyanna PANGERAN.
16Lebbina teppongnga kodu ekagabay roti se ta’ eragi’i ban kodu ekakan bi’ mam-imam e kennengngan se eangguy kaparlowan jareya, iya areya e taneyanna Kemah Socce. Jareya bagiyanna para imam paparengnga PANGERAN dhari kurban kakanan. Kakanan jareya talebat soccena, padha ban kurban pangamponanna dusa ban kurban tebbusanna kasala’an.
17(6:16)
18Saneyap toronanna Harun se lalake’ olle ngakan roti jareya, menangka bagiyanna se teptep dhari kakanan se eatorragi ka PANGERAN. Oreng laen se nyedding kakanan se la ekurbannagi jareya, bakal nemmowa calaka’ lantaran kakowadanna kasocceyanna.
19Dhabuna PANGERAN ka Mosa, "Areya’ atoran-atoran
20kaangguy pantahbisanna imam toronanna Harun. E are pantahbisanna, imam toronanna Harun jareya kodu ngatorragi teppong gandum sakilo ka PANGERAN. Se saparo kodu eatorragi e bakto gu-laggu, ban saparona e bakto ri’-bari’.
21Teppong jareya kodu ecampore mennya’, pas panggang e pamanggangan, samarena epanggang pas thok-ketthok sarta atorragi menangka kurban sasajin. Bauna kurban jareya masenneng panggaliyanna PANGERAN.
22Saneyap toronanna Harun se etahbissagi epadaddi Imam Agung salanjangnga kodu ros-terrosan ngatorragi kurban jareya. Kabbi kodu eobbar kaangguy kurban ka PANGERAN.
23Saneyap kurban sasajin se eatorragi imam ta’ olle kakan maske sakone’a, kabbi kodu eobbar."
24PANGERAN makon Mosa
25marenge oneng Harun ban tra-pottrana atoran-atoran parkara kurban pangamponanna dusa. Keban se egabaya kurban pangamponanna dusa kodu esambelli e panyambelliyanna keban kaangguy kurban obbaran. Kurban jareya talebat soccena.
26Kurban jareya kodu ekakan bi’ imam se ngatorragi kurban jareya, neng e kennengngan se ekagabay kennengnganna kaparlowan jareya malolo, iya areya e taneyanna Kemah Socce.
27Sapa’a bai se nyedding ka dagingnga keban jareya bakal calaka’a lantaran kakowadanna kasocceyanna. Mon kalambi elette’e dharana keban jareya, kodu esassa e kennengngan se egabay kennengnganna kaparlowan jareya malolo.
28Polo’ tana se eangguy ngola daging kurban jareya kodu pabella. Mon polo’na dhari dimbaga, kodu eossowe pas berse’e ban aeng.
29Saneyap oreng lalake’ balana mam-imam olle ngakan kurban se ce’ soccena jareya.
30Tape kurban pangamponanna dusa, se sabagiyan dharana egiba ka dhalem Kemah Socce kaangguy opacara pangamponanna dusa, kodu eobbar, ta’ olle kakan.