Dual Panel1Yakub nerrossagi parjalananna entar ka tana e temorranna Kana’an.
2Se ajalan pas napa’ ka settong somor se badha e tengnga teggal. E seddi’na somor jareya badha dumba tello ambalan padha arendhu, ba-dumba jareya biyasana eenome e somor jareya. Somor jareya ekodhunge bato se raja.
3Mon ba-dumba se eenomana la padha napa’ ka jadhiya, reng-oreng ngowanna pas magulu’ kodhungnga somorra, epakapenggir. Ba-dumbana pas padha eenome. Mon la mare, kodhungnga somor jareya pas epobu pole areng-bareng.
4Yakub atanya ka reng-oreng ngowan gella’, "Sampeyan dhari ka’imma?" "Dhari Haran," saodda reng-oreng jareya.
5Yakub atanya pole, "Sampeyan ponapa kennal ka Laban, pottrana Nahor?" "Enggi, kennal," ca’na reng-oreng ngowan jareya.
6"Kadi ponapa kabadha’anna Laban?" ca’na Yakub. "Sae," ca’na reng-oreng ngowan gella’. "Ka’issa’ pottrana, Rahel, ngenomana embi’ sareng dumbana."
7Ca’na Yakub, "Samangken gi’ aban, gi’ banne baktona dumba epamaso’ ka kandhang. Aponapa me’ ta’ eenome gallu, pas ocol pole me’ olle ngamba?"
8Saodda reng-oreng ngowan jareya, "Mon samangken gi’ ta’ bisa. Dhaggi’ mon reng-oreng ngowan pon padha dhateng ban dumbana, buru kodhungnga somor ka’issa’ epagulu’ ekambuli’i. Buru ba-dumba eenome."
9Teppa’na Yakub acaca bi’ reng-oreng ngowan gella’, Rahel napa’ ka jadhiya ban ba-dumbana.
10E baktona nangale’e Rahel dhateng ngeba ba-dumbana majadhi’na se anyama Laban, Yakub laju entar ka somor gella’, magulu’ batona sarta pas ngenome ba-dumbana Rahel.
11Saellana jareya Yakub pas nyeyom Rahel, sarta laju nanges dhari peragga.
12Ca’na Yakub, "Sengko’ reya balana eppa’na ba’na, ana’na Ribka." Rahel berka’ abala ka eppa’na.
13Ban e bakto eppa’na ngedhing kabar parkara ponakanna jareya, laju berka’ ngone’e Yakub. Yakub egellu’ tor eseyom, laju egiba ka bengkona. Saellana Yakub mare acareta dhari adha’ sampe’ mare parkara apa se la kadaddiyan,
14Laban laju ngoca’, "Pajat bendher, ba’na reya gi’ tang dhara dibi’." Yakub apolong e jadhiya sabulan abidda.
15Ca’na Laban ka Yakub, "Ba’na ta’ olle alako ka sengko’ ta’ kalaban olle bajaran maske ba’na reya tang bala. Ba’na menta’a bajaran barampa?"
16Laban andhi’ ana’ babine’ kadhuwa, se towa’an nyamana Liya, se ngodha’an nyamana Rahel.
17Liya orem matana, tape Rahel bagus badanna tor raddin robana.
18Yakub terro ka Rahel, daddi laju ngoca’, "Kaula poron alako pettong taon manabi kaula eedine abine Rahel."
19Sambidda Laban, "Lebbi becce’ Rahel bi’ sengko’ ebagi ka ba’na etembang ka oreng laen. Ba’na la enneng dhinna’ ban sengko’."
20Yakub alako pettong taon abidda polana terro ka Rahel; bakto se pettong taon jareya ekarassa pera’ pan-barampan are amarga kataresna’anna ka Rahel.
21Yakub laju ngoca’ ka Laban, "Baktona ampon napa’. Samangken kaula nyo’ona edi akabina sareng pottrana sampeyan."
22Daddi Laban pas ajang-onjang ce’ bannya’na. Oreng padha eonjang kabbi.
23Tape se egiba ka Yakub e malem jareya Liya, banne Rahel. Daddi Yakub apolong tedhung ban Liya.
24(Bi’ Laban Liya eberri’i dunor bine’na se anyama Zilpa,esoro gabay pangladinna.)
25Buru kalagguwanna Yakub tao ja’ se ekapolong tedhung jareya Liya. Yakub laju entar ka Laban sarta ngoca’, "Aponapa kaula me’ epacara paneka bi’ sampeyan? Kaula alako polana terro abineya Rahel. Aponapa sampeyan me’ co-ngoco?"
26Sambidda Laban, "Noro’ adad e dhinna’ ana’ se ngodha’an ta’ olle alake ajangadha’i se towa’an.
27Nante’ gallu sampe’ jang-onjangan se samenggu abidda reya la mare. Rahel bi’ sengko’ ebagiya ka ba’na mon ba’na endha’ alako pettong taon aggi’."
28Yakub ngenggi’i, ban saellana jang-onjangan se samenggu abidda jareya la mare, bi’ Laban Rahel ebagi ka Yakub menangka binena.
29(Bi’ Laban Rahel eberri’i dunor bine’na se anyama Bilhah,esoro gabay pangladinna.)
30Yakub tedhung apolong ban Rahel keya, ban kataresna’anna ka Rahel alebbiyan dhari kataresna’anna ka Liya. Saellana jareya Yakub alako ka Laban pettong taon aggi’.
31E bakto PANGERAN ngoladi ja’ Liya ta’ pate ekataresnae bi’ Yakub etembang Rahel, bi’ PANGERAN Liya epaandhi’ ana’, tape Rahel paggun ta’ andhi’ ana’.
32Liya ngandhung laju rembi’ lalake’. Ca’na Liya, "PANGERAN ngoladi ka tang kasossa’an, ban sateya tang lake tanto neser ka sengko’." Daddi ana’na pas enyamae Ruben.
33Liya ngandhung pole laju rembi’ lalake’ keya. Ca’na Liya, "PANGERAN apareng ana’ reya ka sengko’ polana PANGERAN meyarsa ja’ sengko’ ta’ ekataresnae tang lake." Daddi ana’na jareya enyamae Simeyon.
34Liya gi’ ngandhung pole ban rembi’ lalake’ keya. Ca’na Liya, "Sateya tang lake tanto acekka’an ka sengko’ sabab sengko’ la ngalahirragi ana’ lalake’ katello." Daddi ana’na jareya enyamae Lewi.
35Saellana jareya Liya gi’ ngandhung pole sarta rembi’ lalake’ pole. Ca’na Liya, "Sateya sengko’ asokkora ka PANGERAN." Daddi ana’na jareya enyamae Yehuda. Saellana jareya Liya pas ta’ andhi’ ana’ pole.