Dual Panel1E settong are Allah adhabu ka Yakub, "Sengko’ reya Allah se ngaton ka ba’na e bakto ba’na buru dhari kaka’na, Esau. Kassa’ ba’na duliyan entar ka Betel. Pas enneng e jadhiya, ban Sengko’ maddeggagi mezba."
2Yakub laju ngoca’ ka ana’ binena ban ka reng-oreng se abareng ban aba’na, "Sengko’ ban ba’na kabbi mangkada dhari dhinna’, entara ka Betel. E dhissa’ sengko’ maddegga mezba se eatorragiya ka Allah se nolong sengko’ e bakto sengko’ ngadhebbi kasossa’an, ban se ajaga sengko’ dha’ emma’a bai sengko’ ajalan. Daddi mara buwang kabbi sakabbinna ba-dibana bangsa manca se esempen ba’na; mara kabbi padha ababerse, ban ngangguy kalambi se berse."
3(35:2)
4Reng-oreng jareya laju massra’agi ka Yakub ca-arcana diba manca se esempen e jadhiya sarta teng-anteng andhi’na. Jareya kabbi bi’ Yakub ebendhem e baba’anna kajuwan raja e seddi’anna kottha Sikhem.
5E bakto Yakub ban ana’ binena mangkat, reng-oreng kottha e ma’-semma’na jareya bi’ Allah padha epaandhi’ rassa katako’an, daddi kabbi padha tadha’ se nyerser Yakub ban rombonganna.
6Yakub ban reng-oreng laenna laju padha napa’ ka tana Kana’an e kottha Betel se lamba’ enyamae Lus.
7E jadhiya Yakub maddek mezba ban kennengngan jareya enyamae "El-Betel," sabab Allah ngaton ka aba’na e jadhiya e bakto buru dhari kaka’na.
8E kennengngan jareya keya Debora, anjuna Ribka, mate, laju ebendhem e babana kajuwan raja e lao’na kottha. Daddi kajuwan jareya enyamae "Kajuwan Tanges".
9Saellana Yakub abali dhari Mesopotamia, Allah ngaton pole ka aba’na ban apareng berkadda.
10Dhabuna Allah, "Ba’na ta’ enyama’ana Yakub pole; sateya ba’na enyama’ana Isra’il." Daddi bi’ Allah Yakub enyamae Isra’il.
11Allah laju adhabu pole, "Sengko’ reya Allah Se Mahakobasa. Pabannya’ na’ potona ba’na! Ba’na bakal noronnagiya sa-bangsa ban daddi bangatowana to-rato.
12Nagara se bi’ Sengko’ ebagi ka Ibrahim ban Ishak, bi’ Sengko’ ebagiya ka ba’na ban ka na’ potona ba’na."
13Saellana jareya Allah laju adinggallagi Yakub.
14E kennengnganna Allah se abu-dhabu jareya, Yakub maddek bato parengeddan. Bato jareya eatorragi ka Allah sambi eselene anggur ban mennya’ jaitun e attassa.
15Kennengngan jareya enyamae "Betel".
16Saellana jareya Yakub ban rombonganna ngalle dhari Betel. E bakto gi’ abak jau dhari Efrata, Rahel napa’ baktona se rembi’a. Tape parembi’na malarat.
17E bakto sake’na la ce’ talebadda, dhukon rana’na ngoca’, "Pakowat, Rahel, pottrana sampeyan lalake’ pole."
18Tape Rahel la para’ napa’a ka ajalla, ban e bakto laresa ana’na laju enyamae Ben-Oni, tape bi’ eppa’na kana’ jareya enyamae Benyamin.
19Jinazana Rahel jareya laju ekoburragi e penggirra lorong ka Efrata, se sateya anyama Betlehem.
20Yakub maddek bato parengeddan e jadhiya, ban sampe’ sateya koburanna Rahel jareya gi’ etandhai ban bato jareya.
21Saellana jareya Yakub nerrossagi parjalananna, pas masang kemah e settong kennengngan se ngadhep ka manara Eder.
22Sabatara badha e kennengngan jareya, Ruben tedhung apolong ban Bilha, sellerra eppa’na. Yakub ngedhing parkara jareya, laju talebat peggella. Yakub andhi’ ana’ dhubellas oreng.
23Ana’ ollena ban Liya iya areya Ruben (ana’ sareyangnga Yakub), Simeyon, Lewi, Yehuda, Isakhar ban Zebulon.
24Ana’ ollena ban Rahel iya areya Yusup ban Benyamin.
25Ollena ban Bilha, dunorra Rahel, iya areya Dan ban Naftali.
26Ollena ban Zilpa, dunorra Liya, iya areya Gad ban Asyer. Na’-kana’ jareya kabbi lahir e Mesopotamia.
27Yakub laju napa’ ka kalenggiyanna eppa’na, Ishak, neng e Mamre e seddi’na Hebron. (Gi’ lamba’ Ibrahim, embana, alenggi e jadhiya keya.)
28E bakto jareya Ishak la ce’ seppona, yuswana saratos ballung polo taon,
29laju seda, pas esareyagi bi’ tra-pottrana, iya areya Esau ban Yakub.