Alkitab Mobile SABDA
[VER] : [MADURA]     [PL]  [PB] 
 <<  Keluaran 11 >> 

1Dhabuna PANGERAN ka Mosa, "Sengko’ ngokoma rato Messer ban ra’yadda sakaleyan aggi’. Samarena jareya ba’na tanto eedine kalowar dhari nagarana. La’-mala’ ba’na bakal eojuga kabbi dhari nagarana jareya.

2Sateya kassa’ balai reng-oreng Isra’il, lalake’an ban babine’an, padha soro entar ka ga-tatanggana, soro menta emmas ban salaka."

3Bi’ PANGERAN bangsa Messer epalamba’ atena ka reng-oreng Isra’il. Apa pole bi’ ba-ponggabana rato sarta ra’yat Messer Mosa talebat ehormadi.

4Atorra Mosa ka rato, "Badha dhabuna PANGERAN, ‘Ra-kera tengnga malem Sengko’ entara ka Messer, epabalattra’a.

5E bakto jareya saneyap ana’ sareyang bakal mateya, molae dhari ana’ sareyangnga rato se bakal aganteya daddi rato, sampe’ ka ana’ sareyangnga nor-dunor babine’an se lakona agilis gandum. Bariya keya budhu’ sareyangnga ebinna.

6Messer bakal rammeya ban tanges, se ta’ tao kadaddiyan sabellunna ban ta’ kera kadaddiyana pole.

7Tape reng-oreng Isra’il sarta ebinna ta’ eli-guliya. Daddi ba’na bakal taowa ja’ bi’ Sengko’ reng-oreng Messer epabida dhari reng-oreng Isra’il.’"

8Dhi-budhina Mosa adhabu, "Ba-ponggabana junandalem bakal nyabisa ka abdidalem sareng asojud e adha’na abdidalem, sareng nyo’on sopaja bangsa abdidalem ebakta’a ondur sadaja dhari nagara ka’dhinto. Saamponna gapaneka abdidalem pas ondura." Samarena jareya Mosa pas nyengla, panggaliyanna ce’ peggella.

9Dhabuna PANGERAN, ka Mosa, "Rato jareya gi’ paggun ta’ kera ngedhingngagi ka ba’na, sopaja kaajiban se epabadha Sengko’ e Messer sajana bannya’."

10Mosa ban Harun terros mabadha kaajiban acem-macem e ajunanna rato, tape bi’ PANGERAN rato jareya paggun epacengkal, daddi rato jareya paggun ta’ marengngagi oreng Isra’il nyengla dhari nagarana.


  Share Facebook  |  Share Twitter

 <<  Keluaran 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel