Dual Panel1Ommat Isra’il pas mangkat dhari ra-ara Sin, le-ngalle dhari kennengngan se settong ka settonganna, menorot petoduna PANGERAN. Sampe’ napa’ ka Rafidim, pas akemah e jadhiya, tape e jadhiya tadha’ aengnga se ekennenga enom.
2Reng-oreng jareya ango’ngo’an pole ka Mosa, oca’na, "Tore parenge aeng, kaula padha ngenoma." Dhabuna Mosa, "Ba’na me’ ango’ngo’an ka sengko’? Ba’na me’ ba’-nyoba’ PANGERAN?"
3Tape reng-oreng jareya ce’ pelka’na, daddi terros ango’ngo’an ka Mosa. Oca’na, "Aponapa kaula bi’ sampeyan me’ egiba ondur dhari Messer? Kaula ban na’-ana’, dumba ban sape kaula, epamateya kapelka’an cara paneka?"
4Mosa pas aserro ka PANGERAN, dhabuna, "Epakadiya ponapa bangsa ka’dhinto sareng abdidalem, Guste? Ka’dhissa’ padha agarujuga abdidalem, tanto abdidalem mate."
5Dhabuna PANGERAN ka Mosa, "Kassa’ ajak sabagiyan dhari para pamimpinna bangsa Isra’il; pas kabareng ajalan e adha’anna bangsa Isra’il laenna. Tongkedda ba’na se epokollagi ka Songay Nil rowa giba keya.
6Sengko’ manjengnga e adha’anna ba’na e attassa bato se raja e Gunong Sinay. Pokollagi tongkedda jareya ka gunong jareya, bato jareya tanto pas kalowar aeng, se ekenneng enom bangsa Isra’il." Mosa alampa’agi dhabuna PANGERAN jareya e adha’anna para pamimpinna ommat Isra’il.
7Kennengngan jareya enyamae Masa ban Meriba sabab oreng Isra’il padha ango’ngo’an ban ba’-nyoba’ PANGERAN e bakto padha atanya, "PANGERAN ba’ ongguwana asarengnge sengko’ ban tang bangsa reya?"
8Saellana jareya pas dhateng oreng Amalek nyerrang oreng Isra’il e Rafidim.
9Dhabuna Mosa ka Yusak, "Kassa’ mele oreng se epalabana ka oreng Amalek. Lagguna sengko’ manjengnga e konco’na gunong sambi neggu’a tongket se bi’ PANGERAN epakon giba ka sengko’ rowa."
10Yusak laju mele oreng Isra’il, akantha se edhabuwagi Mosa jareya, pas mangkat aperrang ban oreng Amalek. Mosa, Harun ban Hur ongga ka gunong, napa’ ka konco’na.
11Mon Mosa teppa’na ngangka’ astana adu’a, oreng Isra’il mennang, tape mon astana epatoron, oreng Amalek mennang.
12Daddi Mosa sampe’ lesso, Harun ban Hur laju mondhut bato egabay kalenggiyanna Mosa, Harun ban Hur manjeng e kangan kacerra Mosa, nagenne lengngenna Mosa salaja ebang, daddi lengngen jareya paggun eangka’ sampe’ compet are.
13Kalaban cara se kantha jareya oreng Amalek epakala bi’ Yusak.
14Dhabuna PANGERAN ka Mosa, "Cathet kamennangan jareya me’ olle terros ekaenga’e. Kabala ka Yusak ja’ oreng Amalek bi’ Sengko’ epatompessa."
15Mosa pas abadhi mezba se enyamae "PANGERAN reya tang Bul-ombul".
16Dhabuna Mosa, "Mara teggu’ patenggi bul-ombulla PANGERAN reya! PANGERAN bakal aperranga ros-terrosan ban oreng Amalek!"