Alkitab Mobile SABDA
[VER] : [MADURA]     [PL]  [PB] 
 <<  Keluaran 30 >> 

1Dhabuna PANGERAN ka Mosa, "Agabay mezba dhari kaju akasia, gabay kennengnganna pangobbaranna dupa.

2Mezba jareya kodu masagi empa’, lanjang ban lebarra padha pa’ polo lema’ sentimeter, ban tenggina sangang polo sentimeter. E padduna se pa’-empa’ pobuwi dhu’-tandhu’ se asambung manyettong ban mezba jareya.

3Bagiyan attassa, tamaso’ penggirra se pa’-empa’ ban dhu’-tandhu’na kodu ekole’e emmas morne ban e sakalenglengnga pobuwi palepet emmas.

4Agabay long-kolong dhadhuwa’ pobu e baba’anna palepedda penggirra se dhadhuwa’ kaangguy panyekka’anna kaju kol-pekolla mezba jareya.

5Kol-pekol jareya kodu kagabay dhari kaju akasia ban kodu ekole’e emmas.

6Mezba jareya saba’ e bagiyan lowarra kaen se badha e adha’anna Petthe Parjanjiyan. E jadhiya kennengnganna Sengko’ mon atemmowa ban ba’na.

7Sabban gi’ laggu, mon Harun entar aberseyana damar, kodu ngobbar dupa se ro’om e attassa mezba jareya.

8Bariya keya mon ngodhi’ana damar e baja malem. Tor-ator se aropa dupa jareya kodu ejalannagi ron-temoron salanjangnga.

9Ja’ nyaba’ tor-ator e mezba jareya se aropa dupa larangan, kurban keban otaba kurban sasajin; bariya keya ja’ nyelen kurban aeng anggur e jadhiya.

10Sataon sakaleyan Harun kodu mabadha opacara masocce mezba kalaban cara ngetesse tandhu’na se pa’-empa’ ban dharana ebin se ekurbannagi kaangguy pangamponanna dusa. Se kantha jareya kodu ejalannagi sabban taon salanjangnga. Mezba jareya kodu socce kabbi ban ekusussagi ka Sengko’."

11Dhabuna PANGERAN ka Mosa,

12"Mon ba’na mabadha caca jiwana bangsa Isra’il, saneyap lalake’an kodu majar ka Sengko’ pesse tebbusanna aba’na me’ olle ta’ ekenneng balai e bakto caca jiwa jareya ebadha’agi.

13Saneyap oreng se noro’ ebitong e dhalem caca jiwa jareya kodu majar pesse se bannya’na la etantowagi menorot arga neng e Tang Kemah, menangka tor-ator ka Sengko’.

14Saneyap oreng se ebitong e dhalem caca jiwa jareya, iya areya lalake’an se aomor dhu polo taon ka attas kodu massra’agi pesse tor-ator jareya.

15Se sogi ta’ osa aberri’ lebbi, ban se mesken ta’ olle aberri’ korang e bakto majar pesse panebbussa aba’na.

16Penta pesse jareya dhari bangsa Isra’il, pakompol, pas angguy kagabay kaparlowanna kabakteyan e dhalem Tang Kemah. Jareya kabbi pesse panebbussa reng-oreng jareya, ban Sengko’ bakal enga’a terros kaangguy ajaga kasalameddanna reng-oreng jareya."

17Dhabuna PANGERAN ka Mosa,

18"Agabay cemmong dhari paronggu se langganna dhari paronggu keya. Cemmong jareya saba’ e antarana Kemah ban mezba, pas esse’e aeng.

19Aeng jareya kaangguy Harun ban na’-ana’na mon maccowana tanang ban sokona

20sabellunna maso’ ka Kemah otabana entara ka mezba ngeba’a kurban obbaran. Harun ban na’-ana’na kodu maccowe tanang ban sokona me’ olle ta’ mate. Jareya atoran se kodu etoro’ bi’ Harun ban na’-ana’na sarta na’ potona salanjangnga."

21(30:20)

22Dhabuna PANGERAN ka Mosa,

23"Ngala’ racegan se paleng bagus, emmor se ancar nem kilo, manes jangan tello kilo, tebbu ro’om tello kilo, kaju teja nem kilo.

24Jareya kabbi tembang menorot tembangan se eangguy e Tang Kemah. Tamba’agi mennya’ jaitun pa’ liter,

25laju agabay mennya’na upacara, se ecampor akantha mennya’ ro’om.

26Camporan jareya angguy amennya’e Tang Kemah, Petthe Parjanjiyan,

27meja ban sakabbinna parlengkabanna, ko’-tongko’na damar ban parlengkabanna, mezba kennengnganna pangobbaranna dupa,

28mezba kennengnganna kurban obbaran ban sakabbinna parlengkabanna, sarta cemmong baddhana aeng ban panongko’anna.

29Kalaban cara se kantha jareya rang-barang jareya bi’ ba’na ekusussagi kaangguy Sengko’, sopaja kabbi daddiya socce. Apa’a bai se tasedding ka mezba jareya kodu epassra’agi ka Pangeran, ban sapa’a bai se nyedding ka meja jareya bakal calaka’a polana kakowadanna kasocceyanna.

30Harun ban na’-ana’na mennya’e keya, ban tahbissagi padaddi imam se aladinana Sengko’.

31Kabala ka bangsa Isra’il ja’ mennya’ opacara jareya salanjangnga pera’ eangguy e dhalem aladine Sengko’ malolo.

32Mennya’ jareya ta’ olle selen ka reng-oreng biyasa. Ja’ agabay mennya’ se ngangguy camporan kantha jareya keya. Mennya’ jareya socce ban kodu eanggep barang se socce.

33Oreng se agabay mennya’ kantha jareya, otabana ngangguy mennya’ jareya kaangguy oreng se banne imam, ta’ eanggep anggotana Tang ommat pole."

34Dhabuna PANGERAN ka Mosa, "Ngala’ racegan acem-macem papadha bannya’na, iya areya gettana karet, kole’na lokan, gettana rasamala ban dupa se morne.

35Jareya campor kabbi, kagabay dupa se ro’om. Tambai buja sopaja dupa jareya pagguna morne ban socce.

36Sabagiyan dhari dupa jareya kodu etoto paalos. Giba ka Tang Kemah, laju tabur e adha’anna Petthe Parjanjiyan. Dupa jareya kodu eanggep barang se socce se malolo eangguy e dhalem aladine Sengko’.

37Ja’ agabay dupa se camporanna padha ban jareya kaangguy kaparlowanna ba’na dibi’.

38Sapa se agabay dupa kantha jareya kaangguy om-ro’om, ta’ eanggep anggotana Tang ommat pole."


  Share Facebook  |  Share Twitter

 <<  Keluaran 30 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran