Dual Panel1E bakto bangsa Isra’il nangale ja’ Mosa ce’ abidda ta’ gellem toron dhari gunong, kabbi laju padha agaribbung e seddi’na Harun, pas ngoca’ kantha reya, "Ba’ badha ponapa ba’nengan, me’ Mosa se mimpin bangsa kaula kalowar dhari Messer ka’issa’ tadha’ abali; daddi tore kaula sadaja badhiyagi illah me’ olle bangsa kaula paneka badha se mimpin."
2Dhabuna Harun, "Mara bukka’ teng-anteng emmassa binena, ban anteng se eangguy na’-ana’na ba’na kabbi, pakompol dha’ enna’."
3Reng-oreng jareya laju padha mokka’ teng-anteng emmassa, pas eatorragi ka Harun.
4Bi’ Harun emmas jareya elejjur, pas etotta’ ka dhalem pajitha’an, ekagabay pe-sapeyan emmas. Ca’na reng-oreng jareya, "Isra’il, areya’ allahna ba’na ban sengko’, se ngeba bangsa Isra’il kalowar dhari Messer!"
5Harun pas maddek mezba e adha’anna pe-sapeyan emmas jareya, pas adhabu, "Lagguna badha paraya’an kaangguy abakte ka PANGERAN."
6Kalagguwanna gu-laggu reng-oreng Isra’il ngeba ban-keban se egabaya kurban obbaran ban se egabaya kurban salameddan. Reng-oreng jareya pas ju’-toju’ kan-ngakan ban nom-ngenoman, saellana pas padha jaga neng-sennengngan.
7Dhabuna PANGERAN ka Mosa, "Kassa’ ba’na duli toron abali ka kennengnganna, sabab Tang ommat se bi’ ba’na egiba kalowar dhari Messer rowa alako jahat.
8Reng-oreng jareya la ta’ endha’ atoro’ ka Tang parenta; agabay pe-sapeyan dhari emmas se elejjur; pe-sapeyan jareya esemba ban engeba’agi ban-kurban. Pe-sapeyan emmas jareya eako allahna se nolong makalowar aba’na dhari nagara Messer.
9Sengko’ tao ja’ reng-oreng jareya ce’ cengkalla.
10Sateya ba’na ta’ osa ngoddi lang-ngalange Sengko’. Sengko’ peggel, bi’ Sengko’ reng-oreng jareya epatompessa kabbi. Tape ba’na ban na’ potona bi’ Sengko’ epadaddiya bangsa se raja."
11Tape Mosa nyo’on ka GUSTE Allahna, atorra, "GUSTE, aponapa Junandalem me’ kantos duka sapaneka ka ommadda? Ommat ka’dhinto sareng Junandalem gu ta’ etolong epakalowar dhari Messer kalaban kakowadanna sareng kakobasa’anna Junandalem?
12Manabi sareng Junandalem ommat Isra’il ka’dhinto epamate sadaja, tanto bangsa Messer padha ngoca’ ja’ bangsa Isra’il ka’dhinto sareng Junandalem ebakta kalowar dhari Messer namong parlo epamateya sadaja neng e gunong ka’dhinto? Ampon ja’ duka, GUSTE; ngereng oba neyattepon Junandalem, ja’ kantos bangsa ka’dhinto epacalaka’.
13Kaemodi abdiepon Junandalem Ibrahim, Ishak sareng Yakub. Kaemodi Junandalem ampon asompa marengana se katello gapaneka na’ poto se bannya’na padha sareng bannya’na bintang e langnge’. Junandalem asompa jugan tana se ejanjiyagi Junandalem ka’dhissa’ bakal ekaandhi’a na’ potona Ibrahim, Ishak sareng Yakub salanjangnga."
14Daddi PANGERAN pas ngoba neyadda ban burung se alampa’agiya ancamanna kaangguy neba’agi balai ka bangsa jareya.
15Mosa toron abali dhari gunong jareya abakta bato se dhadhuwa’ se la badha tolesanna e adha’ budhina, tolesan jareya aesse papakonna Allah.
16Allah dibi’ se abadhi papan bato jareya ban se ngokerragi papakonna e papan jareya.
17E bakto toron dhari gunong jareya Yusak meyarsa oreng Isra’il rat-tharadan ce’ rammena. Ca’na Yusak ka Mosa, "Kadiya badha paperrangan e parkemahan."
18Dhabuna Mosa, "Katonna banne sowarana oreng se mennang otabana kala perrang; arowa sowarana oreng anyanye."
19Sanapa’na ka seddi’anna parkemahan Mosa ngoladi pe-sapeyan emmas rowa ban reng-oreng se teppa’na padha atari. Mosa pas ce’ dukana, sampe’ papan bato se dhadhuwa’ se ebakta dhari attas gunong gella’ ebantengngagi e babana gunong jareya sampe’ lejjar.
20Pe-sapeyan emmas gabayanna reng-oreng Isra’il rowa epondhut, eobbar, pas etette sampe’ alos akantha bubu’. Bubu’ jareya ecampor ban aeng, pas epakon enom ka reng-oreng Isra’il.
21Dhabuna Mosa ka Harun, "Ba’na epabaramma bi’ reng-oreng rowa me’ sampe’ reng-oreng jareya bi’ ba’na epanneng alako dusa se kantha jareya rajana?"
22Ca’na Harun, "Ella ba’na ja’ gigir ka sengko’; ba’na tao dibi’ reng-oreng reya talebat jahadda.
23Ca’na reng-oreng jareya ka sengko’, ‘Ba’ badha ponapa ba’nengan, me’ Mosa se mimpin bangsa kaula kalowar dhari Messer ka’issa’ tadha’ abali; daddi tore kaula sadaja badhiyagi illah me’ olle bangsa kaula paneka badha se mimpin.’
24Daddi bi’ sengko’ reng-oreng jareya esoro makompol angguyya se dhari emmas, kabbi padha massra’agi angguyya se dhari emmas jareya ka sengko’. Bi’ sengko’ pas elejjur e apoy ekagabay pe-sapeyan."
25Mosa ngagali ja’ reng-oreng Isra’il jareya bi’ Harun etorot sakarebba, sampe’ kabbi padha ekala’-gella’ bi’ so-mosona.
26Daddi Mosa pas ngadek e labangnga parkemahan jareya, laju aera’, "Pa-sapa se gi’ ngabdiya ka PANGERAN, akompol dha’ enna’ kabbi!" Suku Lewi padha nyander ka seddi’na Mosa kabbi.
27Dhabuna Mosa ka reng-oreng jareya, "Badha dhabuna PANGERAN, Allahna Isra’il, ba’na epakon ngala’ peddhangnga bang-sebang, pas ajalan sabalattrana e parkemahan reya, molae dhari labang reya ka labang laenna, sambi mate’e tan-taretanna, ca-kancana ban ga-tatanggana."
28Suku Lewi ajalannagi papakon jareya, pas mate’e oreng bannya’na ra-kera tello ebu oreng e dhalem saare jareya.
29Dhabuna Mosa ka reng-oreng Lewi, "Are teya ba’na massra’agi aba’ malolo daddi imam se ngabdi ka PANGERAN kalaban mate’e na’-ana’ lalake’anna ban tan-taretan lalake’anna dibi’, daddi bi’ PANGERAN ba’na padha eparenge berkadda kabbi."
30Kalagguwanna Mosa adhabu ka reng-oreng Isra’il, "Ba’na padha ngalakone dusa se ce’ rajana. Tape sateya sengko’ ongga’a ka gunong pole ngadhebba PANGERAN; pola sengko’ me’ olle nyo’onnagi sopaja dusana ba’na jareya esapora’a."
31Mosa laju ngadhep pole ka PANGERAN, pas mator, "Reng-oreng Isra’il ampon abadhi dusa se ce’ rajana, abadhi illah dhari emmas se esemba.
32Moga Junandalem kasokana nyapora dusana reng-oreng ka’dhinto, manabi bunten, langkong sae kosot saos nyama abdidalem dhari bukuepon reng-oreng se odhi’."
33Dhabuna PANGERAN, "Se ekosoda nyamana dhari ketab jareya coma oreng se dusa ka Sengko’.
34Sateya kassa’ mangkat, pimpin bangsa Isra’il jareya ka kennengngan se bi’ Sengko’ la ekoca’agi ka ba’na. Tang malaekat abarengngana ba’na terros, tape e settong bakto reng-oreng se dusa jareya bi’ Sengko’ eokoma."
35Daddi reng-oreng Isra’il bi’ PANGERAN epakenneng panyaket polana maksa Harun agabay pe-sapeyan emmas.