Alkitab Mobile SABDA
[VER] : [MADURA]     [PL]  [PB] 
 <<  Mazmur 106 >> 

1Molja’agi PANGERAN! Mara asokkor ka PANGERAN, sabab Pangeran reya sae; kataresna’anna langgeng saterrossa.

2Sapa se bisa aberta’agi kakowadanna PANGERAN, ban amolja’agi Salerana sapantessa?

3Pojur oreng se atoro’ ka kon-papakonna, sarta se ros-terrosan teppa’ tengka gulina.

4Kaemodi abdidalem, GUSTE, lantaran kabecce’annepon Junandalem ka ommadda, abdidalem jugan nyo’ona tolong manabi Junandalem masalamet reng-oreng ka’dhissa’.

5Moga abdidalem nengalana kama’moranna reng-oreng peleyannepon Junandalem tor anga-bunga asareng ommattepon Junandalem. Moga abdidalem noro’a perak tor gumbira asareng reng-oreng kaagungannepon Junandalem.

6Abdidalem sadaja padha dusa akadi para bangatowa; abdidalem sadaja ampon padha alako jahat sareng daraka.

7E bakto badha e Messer bangatowa abdidalem sadaja padha ta’ ngarte; padha tadha’ se pahama ka karyaepon Junandalem se makasambu’ ate. Reng-oreng gapaneka loppa ka kataresna’annepon Junandalem se tadha’ batessa, ban e seddi’anna Tase’ Galagas reng-oreng gapaneka aberonta’ ka Se Mahatenggi.

8Tape PANGERAN masalamet reng-oreng jareya bit Salerana dibi’, sopaja kaparjuga’anna daddiya nyata.

9Kalaban dhabuna Tase’ Galagas daddi kerreng, Pangeran abakta ommadda epajalan lebat e tase’ se dhasarra kerreng akantha sagara beddhi.

10Kalaban cara se kantha jareya Allah masalamet reng-oreng jareya dhari mosona, epalopot dhari kobasana reng-oreng se baji’ ka aba’na.

11Tape e dhalem aeng para mosona epatasellem, settonga tadha’ karena.

12Ommadda laju parcaja ka janjina, pas anyanye amolja’agi asmana.

13Tape ta’ abit dhari jareya reng-oreng jareya la loppa ka se elampa’agi PANGERAN, pas ngala’ karebba dibi’na ta’ kalaban nyo’on babala’anna.

14E sagara beddhi reng-oreng jareya ta’ kellar ngampet napsona laju ba’-nyoba’ Allah.

15Allah marenge reng-oreng jareya sabarang se epenta etambai wabah panyaket se ce’ berra’na.

16E sagara beddhi reng-oreng jareya ere ka Mosa ban ka Harun abdina se socce atena.

17Bume pas maroka ngoldek Datan, notobi Abiram ban la-balana.

18Apoy toron ngolap e kennengnganna reng-oreng jareya, potthon katonon reng-oreng se padha daraka.

19E Gunong Sinay reng-oreng jareya agabay budhu’na pe-sapeyan dhari emmas, pas nyemba arca gabayanna tanangnga.

20Reng-oreng jareya morobi Allahna se agung molja egante’e arcana sape se ngakanan rebba.

21Reng-oreng jareya loppa ka Allah panyalamedda aba’na se alampa’agi sabarang lalakon raja e Messer rowa.

22Nako’e onggu se elampa’agi Allah e jadhiya, makasambu’ ate kadaddiyan e Tase’ Galagas.

23Daddi Allah aneyat mateyana ommadda, tape elanglang bi’ Mosa, oreng peleyanna. Mosa daddi panengnga e antarana Allah ban ommadda, daddi Allah pas terep dukana.

24Saellana jareya reng-oreng buru nolak nagara se bagus rowa polana ta’ parcaja ka janjina Allah.

25Reng-oreng jareya aseddhiyan e dhalem kemahna, ta’ endha’ ngedhingngagi dhabuna PANGERAN.

26Allah laju asompa ban ajanji mateyana reng-oreng jareya e sagara beddhi.

27Toronanna reng-oreng jareya ebuwanga e antarana sa-bangsa, epabalessudana e ra-nagara manca.

28Saellana jareya e Peyor reng-oreng jareya nyemba Ba’al, ban ngakan tor-ator se ebagi ka ba-dibana.

29Tengkana reng-oreng jareya andaddiyagi dukana PANGERAN, daddi laju epadhatengnge panyaket se nako’e parana.

30Tape Pinehas kalowar ngokom reng-oreng se sala, daddi panyaket jareya laju ambu.

31Jareya eanggep jasana, se ekaenga’e salanjangnga.

32E mor-somor Meriba reng-oreng jareya mapeggel PANGERAN, masossa Mosa polana tengka polana.

33Reng-oreng jareya mapeggel panggaliyanna Mosa, kantos adhabu ta’ kalaban epekker sabellunna.

34Sa-bangsa laen bi’ reng-oreng jareya ta’ epamosna akantha se epakonnagi PANGERAN.

35Reng-oreng jareya la’-mala’ acampor ban sa-bangsa jareya, nerowe ra-carana oreng se ta’ kennal ka Allah.

36Reng-oreng jareya laju nyemba la-brahala, jareya se daddi lantaranna gaggarra aba’na.

37Na’-ana’na dibi’ ekagabay kurban ka la-brahala Kana’an.

38Reng-oreng jareya magili dharana oreng se ta’ sala, dharana na’-ana’na dibi’, se ekurbannagiya ka la-brahala, sampe’ reng-oreng jareya makocem nagarana.

39Lantaran tengka polana jareya reng-oreng jareya daddi najjis, ban ta’ esto ka Allah.

40PANGERAN laju ce’ dukana ka ommat jareya, ce’ baji’na ka ommat kaagunganna dibi’.

41Daddi reng-oreng jareya eparengngagi ka sa-bangsa, epanneng ekobasae so-mosona.

42Ommat jareya pas etendhes bi’ so-mosona, epatellok e dhalem kakobasa’anna.

43Li-baliyan PANGERAN masalamet reng-oreng jareya, tape reng-oreng jareya asoka’an aberonta’ sampe’ kabbi padha mate e dhalem sa-dusana.

44Tape PANGERAN meyarsa cerrengnga reng-oreng jareya, Salerana ngoladi ka kasossa’anna.

45Kaangguy kaparlowanna reng-oreng jareya Pangeran emot ka parjanjiyanna, arassa neser lantaran kataresna’anna se ce’ rajana.

46Sakabbinna oreng se nawan reng-oreng jareya epaneser kabbi ka ommat jareya.

47Adhu Guste ALLAH, parenge salamet abdidalem sadajana, pakompollagi abdidalem sadajana dhari antarana sa-bangsa sopaja abdidalem sadaja kengenga asokkor sareng amolja’agi asmana Junandalem se socce.

48Molja’agi PANGERAN, Allahna Isra’il, sateya ban salanjangnga. Dina reng-oreng me’ padha ngoca’, "Amin!" Molja’agi PANGERAN!


  Share Facebook  |  Share Twitter

 <<  Mazmur 106 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel