Dual Panel1Kaangguy pamimpinna koor. Eerenge calempong. Menorot lagu se nomer ballu’. Jaburra Daud. (6-2) Adhu GUSTE, abdidalem ja’ ajar sanare Junandalem duka, abdidalem ja’ okom sanare Junandalem ce’ benduna.
2(6-3) Kabellasi abdidalem, PANGERAN, sabab abdidalem ampon ce’ lempona; parenge abdidalem kakowadan, sabab abdidalem ampon ce’ lessona.
3(6-4) Abdidalem ce’ bingongnga; kantos bilaepon abdidalem edinggallagiya sapaneka?
4(6-5) Ngereng abali, GUSTE, palopottagi abdidalem, pasalamettagi abdidalem lantaran kataresna’annepon Junandalem.
5(6-6) Sabab e alam maot Junandalem ta’ ekaemodi oreng; tadha’ se moji Junandalem e dunnyaepon oreng mate.
6(6-7) Sengko’ ce’ lessona se aserrowan; seyang malem aeng mata agili tadha’ ambuna sampe’ tang ranjang bacca.
7(6-8) Tang mata rabeng lantaran sossa terros, bureng polana tang so-moso.
8(6-9) Reng-oreng se jahat, mara padha nyese, sabab Guste ALLAH la meyarsa tang tanges.
9(6-10) PANGERAN meyarsa tang parnyo’onan, ban narema tang du’a.
10(6-11) Tanto takerjat ban todhus kabbi tang moso, sarta pas nyorot lantaran malo.