Dual Panel1Kaangguy pamimpinna koor. Menorot nyanyeyan: Gitit. Dhari Asaf. (81-2) Mara anyanye ji-pojiyan amolja’agi Allah kakowadanna sengko’ ban ba’na, mara padha asorak pagumbira ngagungngagi Allahna Yakub.
2(81-3) Tabbu terbangnga, pamonye sowarana, toro’e gambus ban calempong, panyaman monyena.
3(81-4) Tope tarompedda e are raja, e bakto pesta bulan anyar ban bulan pornama.
4(81-5) Sabab jareya atoran neng e Isra’il, papakon dhari Allahna Yakub.
5(81-6) Atoran jareya eteptebbagi kaangguy bangsa Isra’il, e bakto Salerana maju ngadhebbi Messer. Sengko’ ngedhing sowara se sengko’ ta’ kennal,
6(81-7) "Ban-giban e bauna ba’na bi’ sengko’ la ekala’. Budhak kol-pekol la epatoron dhari tanangnga.
7(81-8) E dhalem kasossa’an ba’na aserro, ba’na laju epasalamet bi’ Sengko’. Sengko’ nyaodi ba’na dhari galudhuk Tang pangeteggan, bi’ Sengko’ ba’na eoji e somber Meriba.
8(81-9) Edhingngagi Tang parengeddan, Tang ommat kabbi; Isra’il, ja’ sakenga ba’na endha’ ngedhingngagi!
9(81-10) Ja’ sampe’ badha illah e antarana ba’na, ja’ sampe’ ba’na nyemba dibana oreng manca.
10(81-11) Sengko’ PANGERAN, Allahna ba’na, se nonton ba’na kalowar dhari Messer. E bakto ba’na lapar bi’ Sengko’ eberri’ ngakan.
11(81-12) Tape Tang ommat ta’ endha’ ngedhingngagi Sengko’, Isra’il ta’ endha’ atoro’ ka Sengko’.
12(81-13) Daddi bi’ Sengko’ reng-oreng jareya epanneng paggun cengkal; dina me’ olle noro’ karebba atena dibi’.
13(81-14) Ja’ sakenga Tang ommat endha’ ngedhingngagi Tang oca’, ja’ sakenga Tang ommat atoro’ ka Tang parenta,
14(81-15) Sengko’ duliya matelloga so-mosona, mosona kabbi epakala’a.
15(81-16) Oreng se baji’ ka Sengko’ bi’ Sengko’ epatelloga, kabbi padha eokoma salanjangnga.
16(81-17) Tape Tang ommat eberri’ana gandum peleyan, epakennyanga ban maddu alas."