Dual Panel1Kaangguy pamimpinna koor. Jaburra kaom Korah. (85-2) Junandalem kasokan ka tanaepon Junandalem, GUSTE, kabadha’annepon Isra’il sareng Junandalem ampon epabali akadi asalla.
2(85-3) Junandalem ampon nyapora sa-dusana ommadda, nyapora sadajana kasala’anna.
3(85-4) Reng-oreng gapaneka sareng Junandalem ta’ edukane pole, benduepon Junandalem ampon lastare.
4(85-5) Pabaliyagi abdidalem akadi asalla, Allah panyalamet abdidalem, ja’ duka pole ka abdidalem sadaja!
5(85-6) Ponapa Junandalem terrosa duka ka abdidalem sadaja, pagguna bendu kantos ron-temoron?
6(85-7) Pakowattagi pole abdidalem sadaja, sopaja abdidalem sadaja, para ommattepon Junandalem gumbira lantaran partolongannepon Junandalem.
7(85-8) Ngereng duduwagi ka abdidalem sadaja, GUSTE, ja’ Junandalem teptep taresna salanjangnga, parenge abdidalem sadaja kasalameddan dhari Junandalem.
8(85-9) Sengko’ ngedhingngagiya dhabuna GUSTE Allah; Allah ajanji aparenga kaamanan ban kasalameddan ka sengko’ ban ba’na, para ommadda, sokor sengko’ ban ba’na ambu se alako dusa.
9(85-10) Pajat ongguwan, Allah asadhiya masalamedda oreng se alem, Allah se agung alenggiya e nagarana sengko’ ban ba’na.
10(85-11) Kataresna’an ban kaestowan bakal atemmowa, kaadilan ban kataremtemman bakal alu’-gellu’a.
11(85-12) Kaestowanna manossa bakal tombuwa dhari bume, ban kaadilanna Allah bakal nyongngo’a dhari langnge’.
12(85-13) PANGERAN apareng sabarang se becce’ daddi tanana sengko’ ban ba’na bakal madhatengnga hasel.
13(85-14) Kaadilan bakal ajangadha’ana PANGERAN ban nyadhiya’agi jalan kaangguy Salerana.