Dual Panel1Ya ALLAH, Junandalem Allah se apareng babales, ngereng duduwagi babalessepon Junandalem, Guste.
2Ngereng ngadek, hakimma manossa sabume, okommagi oreng se angga’ satembang sareng tengkana.
3Adhu PANGERAN, kantos bilaepon oreng jahat anga’-bunga’a? Kantos bilaepon, GUSTE?
4Reng-oreng jahat gapaneka makalowar ca’-oca’ se kasar, sareng ngedirragi kajahadanna.
5Ommattepon Junandalem etendhes sareng reng-oreng gapaneka, GUSTE, reng-oreng peleyanna Junandalem eparemmok.
6Dha-randha sareng na’-kana’ jatim epate’e, sapaneka jugan reng-oreng manca se badha e nagara paneka.
7Oca’na reng-oreng gapaneka, "PANGERAN ta’ ngoladi, Allahna Yakub ta’ parduli."
8He tang bangsa, ja’ budhu kantha jareya, mara ajar ngangguy akkalla!
9Allah reya se abadhi kopeng, masa’ ta’ meyarsa’a? Allah se abadhi mata, masa’ ta’ ngoladana?
10Allah jareya se ngajar sa-bangsa, masa’ ta’ ngokoma? Allah jareya guruna oreng sadunnya, masa’ ta’ kaagunganna pangataowan?
11PANGERAN ngagali ka pekkeranna manossa, ngagali ja’ jareya kabbi tadha’ gunana.
12Pojur onggu oreng se eajar Junandalem, GUSTE, oreng se eajari kom-hokommepon Junandalem.
13E re-are se ngeba balai oreng gapaneka sareng Junandalem eparenge taremtem, kantos ekale lobang kaangguy nangkep oreng jahat.
14Sabab PANGERAN ta’ kera adinggallagi ommadda; ta’ kera ngenthengngagi se daddi kaagunganna.
15Daddi hokom epasodegga pole e pangadilan, reng-oreng se jujur kabbi bakal nolongana.
16Sapa se abillai sengko’ ngadhebbi reng-oreng daraka? Sapa se nolong sengko’ ngadhebbi reng-oreng se alako jahat?
17Ja’ sakenga PANGERAN ta’ nolong sengko’, sengko’ para’ ngalleya ka dunnyana oreng mate.
18E bakto abdidalem apekker ja’ abdidalem labuwa, kataresna’annepon Junandalem, GUSTE andaddiyagi abdidalem terros manjeng koko.
19Manabi ate abdidalem ketter sareng ngalengsang, Junandalem alepor sareng maperak abdidalem.
20Junandalem ta’ asakongkel sareng kim-hakim se jahat, se gadhuwan sajja jahat adhasar hokom.
21Reng-oreng gapaneka asakongkel amoso sareng reng-oreng jujur, sareng ngokom mate oreng se tadha’ salana.
22Tape PANGERAN reya se abillai sengko’, tang Allah jareya se ngaobi sengko’.
23PANGERAN ngokom oreng jahat satembang ban kajahadanna, matompessa reng-oreng jareya polana sa-dusana, PANGERAN, Allahna sengko’ ban ba’na bakal matompessa reng-oreng jareya.