Dual Panel1"Ba’na pataresna ka GUSTE Allahna, ban estowagi sakabbinna papakonna.
2Kaenga’e sateya apa se la ekataowe ba’na parkara Pangeran dhari pangalamanna ba’na. Na’-ana’na ba’na ta’ andhi’ pangalaman jareya. Ba’na se la nangale’e kaagunganna GUSTE Allahna, kakowaddanna ban kakobasa’anna
3ban kaajiban-kaajiban se elampa’agi Salerana. Ba’na nangale’e dibi’ apa se elampa’agi Salerana ka rato Messer ban nagarana.
4Ba’na nangale’e baramma PANGERAN mamosna tantara Messer ban sakabbinna jaranna sarta kareta perrangnga, kabbi epatasellem e Tase’ Galagas e bakto teppa’na nyerser ba’na.
5Ba’na tao apa se elampa’agi Pangeran ka ba’na e ra-ara beddhi sabellunna ba’na napa’ dha’ enna’.
6Ba’na enga’ keya apa se elampa’agi Pangeran ka Datan ban Abiram, na’-ana’na Eliyab dhari suku Ruben. E adha’anna ba’na kabbi, bume melka, reng-oreng jareya kabbi ban la-balana, kemahna, nor-dunorra ban ebinna kabbi padha edalgep bume jareya.
7Onggu, ba’na se nangale’e ban matana dibi’ sakabbinna kaajiban se elampa’agi PANGERAN."
8"Estowagi sakabbinna hokom se bi’ sengko’ eajarragi ka ba’na sateya reya, me’ olle ba’na bisa alengka songay, pas maso’ ka nagara se sakejja’ aggi’ ekennengngana ba’na rowa.
9Ban ba’na bakal abida odhi’ e nagara se sogi tor landhu se bi’ PANGERAN ejanjiyagi ka bangatowana ba’na ban ka na’ potona.
10Nagara se ekennengngana ba’na rowa ta’ akantha tana Messer se ekennengnge ba’na lamba’ rowa. E dhissa’ ba’na kodu alako berra’ mon magiliya aeng ka gal-teggalla se etabura ne-bine.
11Tape nagara se emaso’ana ba’na rowa tana pagunongan ban ra-cora, se eaenge ojan.
12Nagara jareya ejaga bi’ GUSTE Allahna ba’na sataon benteng.
13Daddi estowagi kon-papakon se bi’ sengko’ la eajarragi ka ba’na sateya reya; pataresna ka GUSTE Allahna ban abakte ka Salerana, banne pera’ ban badanna malolo, tape ban atena keya.
14Mon kantha jareya, Pangeran bakal matorona ojan ka tanana ba’na teppa’ baktona, samarena ba’na anye otaba molong hasella tanana ban e bakto namen, sopaja ba’na andhi’a gandum, anggur, ban mennya’ jaitun sacokobba,
15ban ebinna ba’na nemmo rebba sacokobba. Kakanan se ekabuto ba’na bakal badha’a kabbi.
16Ba’na ja’ endha’ epajau dhari Pangeran polana nyemba’a ban ngabdiya ka la’-alla’an.
17Mon papakon jareya bi’ ba’na ta’ etoro’, PANGERAN tanto duka ka ba’na. Ba’na ta’ kera eparenge ojan; tanana ba’na bakal kerrenga daddi tana regga sampe’ ta’ kera tombu mon emen-tamenne. E dhalem bakto sakejja’ bai ba’na bakal mateya maske ba’na odhi’ e tana se landhu paparengnga PANGERAN.
18Kaenga’e ban estowagi kon-papakon jareya. Taleyagi ka lengngenna ban tambellagi e dhaina me’ olle ba’na enga’ terros.
19Ajarragi ka na’-ana’na. Kacaca e dhalem bengkona ban e lowar bengkona, e bakto aistirahat ban e bakto alalakon.
20Toles e canggana labangnga bengkona ban e labangnga pagarra.
21Mon kantha jareya ba’na ban na’-ana’na bakal lanjanga omor e nagara se ejanjiyagi GUSTE Allah ka bangatowana ba’na. Saabidda bandha langnge’ e attassa bume, ba’na bakal teptebba ngennengnge tana jareya.
22Estowagi sakabbinna hokom se bi’ sengko’ epanapa’ ka ba’na reya: Ba’na pataresna ka GUSTE Allahna, lakone sabarang se epakonnagi ka ba’na, ban pateptep ba’na esto ka Salerana.
23Mon ba’na kantha jareya PANGERAN bakal ngojuga sakabbinna bangsa jareya dhari adha’anna ba’na, ban ba’na bakal ngennengngana tana andhi’na sa-bangsa se araja’an ban akowadan dhari ba’na.
24Saneyap kennengngan se edidda’ ba’na bakal daddiya andhi’na ba’na. Tana se ekobasa’ana ba’na malanjang dhari ra-ara beddhi e bagiyan lao’ sampe’ ka Pagunongan Libanon e dhaja, ban dhari Songay Efrat e temor sampe’ ka Tase’ Tengnga e bara’.
25E nagara jareya bi’ GUSTE Allah reng-oreng bakal epatako’a ka ba’na menorot se la edhabuwagi, daddi tadha’ oreng settonga se bisa’a lang-ngalange ba’na.
26Are teya ba’na olle mele antarana berkat ban babaston.
27Ba’na bakal eberkadana mon ngestowagi papakonna GUSTE Allahna, se are teya bi’ sengko’ eajarragi ka ba’na.
28Tape ba’na bakal ebastowa mon ta’ ngestowagi ka papakonna GUSTE Allahna, abalik nyemba ka la’-alla’an se ta’ tao esemba ba’na.
29Mon GUSTE Allah la abakta ba’na maso’ ka nagara se ekennengngana ba’na dhaggi’, ba’na kodu ngoca’agi berkat jareya dhari Gunong Gerizim, ban ngoca’agi babaston jareya dhari Gunong Ebal.
30(Kennengnganna gunong se dhadhuwa’ jareya e bara’annaSongay Yordan e baba kakobasa’anna oreng Kana’an se ngennengnge Cora Yordan, addhep ka bara’ ta’ jau dhari ka’-bungka’an kennengnganna kabakteyan e More e seddi’anna kottha Gilgal.)
31Sakejja’ aggi’ ba’na bakal alengka’a Songay Yordan pas ngobasa’ana tana se eparengngagi ka ba’na bi’ GUSTE Allahna. Saellana ba’na arebbu’ tana jareya ban pas neng e jadhiya,
32ba’na kodu ngestowagi sakabbinna hokom se bi’ sengko’ eajarragi ka ba’na sateya reya."