Dual Panel1"GUSTE Allahna ba’na abakta’a ba’na ka nagara se ekennengngana ba’na, ban bannya’ bangsa se eojuga dhari jadhiya. Ba’na bakal nangaleyana dibi’ Pangeran ngojuga bangsa papetto’ se araja’an ban akowadan dhari ba’na, iya areya reng-oreng Het, Girgasi, Amori, Kana’an, Feris, Hewi ban Yebus.
2Mon GUSTE Allahna ba’na massra’agi sa-bangsa jareya ka dhalem kakobasa’anna ba’na, ban sa-bangsa jareya bi’ ba’na epakala, pate’e kabbi. Ja’ kaneserre, ban ja’ mabadha parjanjiyan bi’ reng-oreng jareya.
3Ba’na ja’ alake otaba abine oreng dhari bangsa jareya, bariya keya na’-ana’na ba’na ja’ bagi alake otaba abine oreng bangsa jareya,
4sabab bi’ reng-oreng jareya na’-ana’na ba’na tanto epajau dhari PANGERAN sarta esoro nyemba la’-alla’an. Mon ba’na ban na’-ana’na sampe’ nyemba ka la’-alla’an, PANGERAN tanto duka, ban ba’na kabbi tanto pas duli epatompes.
5Daddi, pagujur ba-mezbana bangsa jareya, paancor lar-pelar batona se eanggep karamat, parobbu bang-lambangnga dewina se anyama Asyera, obbar ca-arca brahalana se esemba.
6Jalannagi jareya kabbi sabab ba’na kaagunganna GUSTE Allahna ba’na. Dhari sakabbinna bangsa se badha e bume reya, pera’ ba’na se epele menangka ommadda se istimewa.
7Ba’na ekataresnae ban epele PANGERAN, banne polana ba’na araja’an dhari sa-bangsa laenna; sanyatana ba’na reya bangsa se paleng kene’ e bume reya.
8Tape PANGERAN mele ba’na polana PANGERAN taresna ka ba’na ban terro neptebbana janjina ka bangatowana ba’na. Daddi jareya sababba PANGERAN masalamet ba’na kalaban kakobasa’anna se raja, ban mabebas ba’na dhari se ekadunor rato Messer.
9Kaenga’e ja’ GUSTE Allahna ba’na jareya Allah se settong tadha’ tonggalla, ban Allah se esto. Pangeran reya neptebbi janjina ban noduwagi kataresna’anna se ta’ aoba sampe’ saebu toronan ka reng-oreng se taresna ka Salerana ban se atoro’ ka papakonna.
10Tape Pangeran jareya ta’ kera mangmang ngokoma reng-oreng se baji’ ka Salerana.
11Daddi, estowagi kabbi kom-hokom se bi’ sengko’ eajarragi ka ba’na are teya."
12"Mon ba’na agateyagi ban terros ngestowagi ka papakon jareya, GUSTE Allahna ba’na tanto terros esto ka parjanjiyanna se epabadha bi’ ba’na, ban terros noduwagi kataresna’anna ka ba’na, akantha se ejanjiyagi ka bangatowana ba’na.
13Ba’na tanto ekataresnae sarta eberkadi sampe’ ba’na bannya’ ana’na ban ana’na jareya sajan atamba bannya’. Teggal ban sabana ba’na tanto eberkadi, sampe’ ngasaellagi gandum, anggur ban mennya’ jaitun; ba’na bakal eberkadana sampe’ ba’na bannya’ sape ban dumbana. Berkat jareya kabbi bakal etarema’a ba’na neng e nagara se eparengngagi Pangeran ka ba’na, menorot janjina ka bangatowana ba’na.
14Dhari sakabbinna bangsa neng e dunnya reya tadha’ bangsa laen se narema berkat se ce’ bannya’na akantha ba’na. E antarana ba’na, bariya keya e antara ebinna ba’na, ta’ kera badha se jubeng.
15Ba’na bi’ PANGERAN bakal ejauwagiya dhari samacemma panyaket, ban dhari samacemma balai se etangale’e ba’na e Messer, balai jareya bi’ Pangeran bakal eteba’agiya ka so-mosona ba’na.
16Saneyap bangsa se epassra’agi GUSTE Allah ka ba’na kodu pamosna, ta’ osa kaneserre. Ba’na ja’ nyemba la’-alla’anna sa-bangsa jareya, sabab jareya tanto madhateng calaka’ ka ba’na dibi’.
17Olle daddi ba’na apekker ja’ sa-bangsa jareya abannya’an dhari ba’na, daddi ta’ kera ekenneng ojuk bi’ ba’na.
18Tape ta’ osa tako’; kaenga’e bai apa se elampa’agi GUSTE Allahna ba’na ka rato Messer ban sakabbinna ra’yadda.
19Kaenga’e sakabbinna balai se nako’e se etangale’e ba’na dibi’, kaajiban-kaajiban ban kakowadan se raja se eguna’agi GUSTE Allahna ba’na kaangguy mabebasa ba’na. Bariya keya se bakal elampa’agi GUSTE Allah ka sakabbinna bangsa se ekatako’e ba’na.
20La’-mala’ bi’ GUSTE Allahna ba’na sa-bangsa jareya bakal epabaridhuwa sampe’ reng-oreng se ngenneng buru otaba ngetek bakal mateya keya.
21Daddi ba’na ta’ osa tako’ ka sa-bangsa jareya. Ba’na ejaga bi’ GUSTE Allahna. GUSTE Allah reya agung ban nako’e.
22Sa-bangsa jareya bakal eojuga gan sakone’ sopaja ba’na ngennenga materros parjalananna. Moso jareya ta’ olle patadha’ sakaleyan, sopaja burun alas ta’ atamba’a bannya’, babaja ka ba’na.
23Daddi so-mosona ba’na jareya bi’ PANGERAN bakal epassra’agiya ka ba’na, kabbi bakal epasalbuda sampe’ dhi-budhina tompes kabbi.
24To-ratona bakal epassra’agiya ka ba’na. Bi’ ba’na bakal epateyana kabbi, nyamana ta’ kera ekaenga’e oreng pole. Tadha’ oreng settonga se kowadda alaban ngadhebbi ba’na; kabbi bakal epamosna’a bi’ ba’na.
25Obbar ca-arca brahala se esemba sa-bangsa jareya. Emmas ban salaka se cekka’ ka ca-arca jareya ja’ katerrowe, otabana ja’ kala’ ba’na dibi’. Mon parenta jareya ta’ etoro’, ba’na tanto mate, sabab GUSTE Allahna ba’na baji’ ka oreng se nyemba arca brahala.
26Ba’na ja’ nyaba’ arca brahala e bengkona, sopaja babaston se ngenneng ka reng-oreng jareya ta’ ngenneng ka ba’na keya. Ba’na kodu baji’ ban ngapessagi ca-arca jareya, sabab ca-arca jareya ebasto Pangeran."