Dual Panel1PANGERAN adhabu ka sengko’,
2"Arapa ca’-oca’an reya me’ gi’ terros ebut-sebbut e nagara Isra’il? ‘Oreng towa se ngakan buwana anggur se celo’ rassana, tape na’-ana’na se nyelo gigina.’
3Bit nyamana Sengko’, Allah se odhi’, GUSTE Allah Se Mahatenggi, ca’-oca’an jareya ta’ olle ebut-sebbut pole e Isra’il.
4Nyabana saneyap oreng Tang andhi’, nyabana oreng towa ban bariya keya nyabana ana’na. Oreng se dusa, oreng jareya dibi’ se kodu mate.
5Ompamana badha oreng se becce’, adil ban jujur.
6Oreng jareya ta’ nyemba ka brahalana oreng Isra’il ban ta’ ngakan kurban e kennengnganna pamojja’anna ba-diba se e dhimma’a bai. Oreng jareya ta’ tao agudha binena oreng laen ban ta’ tao tedhung apolong ban babine’ se teppa’na dhateng kotorra.
7Ta’ tao nepo ban ta’ tao arampok. Rang-barang tanggunganna reng-oreng se aotang ka aba’na epabali terros. Oreng se kalaparan eberri’i kakanan, ban se ta’ andhi’ kalambi eberri’i angguy.
8Oreng jareya ta’ tao ngala’ budhu’ mon maenjam pesse. Ta’ endha’ atengka juba’, sabban badha tokar masthe aberri’ potosan se jujur.
9Oreng jareya atoro’ ka Tang parenta ban atoro’ ka Tang kom-hokom. Oreng kantha jareya se jujur ban bakal teptebba odhi’. Sengko’, GUSTE Allah Se Mahatenggi la ngoca’.
10Tape saompamana oreng jareya andhi’ ana’ se dujan arampok, mate’e oreng ban ajalannagi kajahadan laenna se
11ta’ tao elakone eppa’na. Oreng jareya ngakan kurban e ngan-kennengnganna panyemba’anna ba-diba; agudha ban tedhung bi’ binena oreng laen.
12Dujan nepo oreng mesken, arampok, ta’ mabali barang tanggunganna oreng se aotang ka aba’na. Entar ka wel-kowella oreng se ta’ kennal ka Pangeran ban nyemba ka brahala se majitjit.
13Maenjam pesse ngangguy budhu’. Apa oreng se kantha jareya bakal odhi’a? Ta’ kera. Oreng jareya ros-terrosan ngalakone sabarang lalakon se majitjit jareya, ban oreng jareya bakal mateya! Ban oreng jareya mate lantaran lalakonna dibi’.
14Saompamana oreng se bannya’ ngalakone kajahadan jareya andhi’ ana’, ban ana’na jareya nangale’e sakabbinna tengkana eppa’na, tape ta’ nerowe.
15Ana’na jareya ta’ endha’ nyemba ka brahalana oreng Isra’il, ban ta’ endha’ ngakan kurban e kennengnganna panyemba’anna ba-diba se e dhimma’a bai. Ta’ tao agudha binena oreng laen,
16ta’ tao nendhes otaba arampok sapa’a bai. Barang tanggunganna oreng se aotang ka aba’na epabali terros. Oreng se kalaparan eberri’i kakanan ban se ta’ andhi’ kalambi eberri’i angguy.
17Ana’na jareya ta’ tao alako jahat ban ta’ tao maenjam pesse budhu’. Ta’at ka Tang kom-hokom ban atoro’ ka Tang ta-parenta. Kana’ jareya bakal teptebba odhi’, ta’ kera mate polana sa-dusana eppa’na.
18Sabaligga, eppa’na se dujan nepo, arampok ban ngalakone kajahadan laenna, bakal mateya polana sa-dusana dibi’.
19Tape olle daddi badha oreng se atanya arapa ana’na jareya me’ ta’ noro’ nanggung sa-dusana eppa’na. Jawabanna iya reya polana ana’na jareya becce’ ban jujur. Ta’at ka Tang kom-hokom ban esto ajalannagi kom-hokom jareya, daddi teptep odhi’.
20Oreng se agabay dusa, jareya se kodu mate. Ana’ ta’ kodu nanggung kasala’anna eppa’na; sabaligga, eppa’ ta’ osa nanggung sa-dusana ana’na. Oreng becce’ bakal olleya ganjaran se becce’ lantaran lalakonna se becce’. Ban oreng jahat bakal nanggunga ollena kajahadanna.
21Mon oreng se jahat ambu ta’ agabay dusa pole, sarta molae ta’at ka Tang kom-hokom, sarta ngalakone lalakon se becce’ ban bendher, oreng jareya ta’ kera mate.
22Sa-dusana bakal esapora’a; oreng jareya bakal odhi’a, polana ajalannagi barang se bendher.
23Apa ba’na nyangka Sengko’, GUSTE Allah Se Mahatenggi senneng mon oreng jahat mate? Enja’! Sengko’ terro sopaja oreng jareya ambu dhari kon-lalakonna se dusa sopaja teptebba odhi’.
24Tape mon oreng se becce’ ta’ alako becce’ pole, la’-mala’ molae ngalakone lalakon jahat ban sakabbinna lalakon se majitjit se biyasana elakone oreng jahat, apa oreng jareya teptebba odhi’? Enja’! Dhari sakabbinna lalakonna se becce’, tadha’ settonga se ekaenga’e pole. Oreng jareya bakal mateya polana agabay dusa ban ta’ esto ka Sengko’.
25Olle daddi badha se ngoca’ kantha reya, ‘PANGERAN reya kalero.’ Mara edhingngagi, oreng Isra’il! Apa Sengko’ reya kalero? Ba’na se kalero.
26Mon oreng becce’ ta’ becce’ pole tengka polana, la’-mala’ alako jahat, oreng jareya kodu mate polana kajahadanna.
27Sabaligga, mon oreng jahat ta’ agabay dusa pole, tape molae ngalakone lalakon se bendher ban becce’, nyabana tanto salamet.
28Oreng jareya la apangrasa ka sakabbinna tengka polana sarta pas ambu se agabay dusa. Kalaban cara se kantha jareya oreng buru ta’ kera mate, tape teptep odhi’.
29Ban ba’na, he, reng-oreng Isra’il, ba’na ngoca’ ja’ Pangeran kalero. Apa Sengko’ kalero, he, oreng Isra’il? Enja’! Ba’na se kalero!"
30GUSTE Allah Se Mahatenggi adhabu, "He, reng-oreng Isra’il, Sengko’ ngadilana saneyap oreng menorot lalakonna. Mara atobat dhari sa-dusana. Ja’ sampe’ ba’na ancor polana sa-dusana dibi’.
31Ambuwi sakabbinna kajahadanna ba’na, anyare ate ban pekkeranna ba’na. Arapa ba’na me’ kodu mate?
32Sengko’ ta’ senneng mon badha oreng se mate. Onduri sa-dusana me’ olle ba’na teptep odhi’. Sengko’ GUSTE Allah Se Mahatenggi la ngoca’."