Dual Panel1E tanggal sapolo bulan lema’, e taon se kapeng petto’ jaman pambuwanganna sengko’ ban reng-oreng Isra’il laenna, badha pin-pamimpinna Isra’il se entar ka sengko’ menta’a petoduna PANGERAN. Saellana padha toju’ e adha’anna sengko’,
2Sengko’ ngedhing Pangeran adhabu ka sengko’,
3"He, manossa se ta’ langgeng, kabala ka pin-pamimpin jareya ja’ Sengko’, GUSTE Allah Se Mahatenggi, ngoca’ kantha reya, ‘Me’ ce’ bangalla ba’na menta petodu ka Sengko’! Bit nyamana Sengko’, Allah se odhi’, Sengko’ ta’ endha’ epentae petodu bi’ ba’na! Sengko’, GUSTE Allah Se Mahatenggi la ngoca’.’
4He, manossa se ta’ langgeng, apa ba’na la asadhiya ahakimana reng-oreng jareya? Mon ella, mara jalannagi! Paenga’ reng-oreng jareya ka sakabbinna kajahadanna bangatowana.
5Kabala Tang oca’ reya. Sengko’ la mele Isra’il ban la asompa kaangguy bangsa jareya. E Messer Sengko’ anyata’agi Tang aba’ sarta ngoca’ ka reng-oreng jareya, ‘Sengko’ PANGERAN, Allahna ba’na.’
6E bakto jareya Sengko’ asompa ngeba’a reng-oreng jareya kalowar dhari Messer, egiba’a ka nagara se bi’ Sengko’ epele ebagiya ka reng-oreng jareya. Nagara jareya sogi ban landhu, tana se paleng bagus e dunnya.
7Bi’ Sengko’ reng-oreng jareya esoro mowang ca-arcana se majitjit ate se ekaleburi bi’ reng-oreng jareya, sarta elarang manajjis aba’na kalaban nyemba la-brahala dhari Messer, sabab Sengko’ GUSTE Allahna.
8Tape reng-oreng jareya alaban ka Sengko’ ban ta’ endha’ atoro’ ka Tang oca’. Reng-oreng jareya ta’ endha’ mowang ca-arcana se majitjit ate ban ta’ endha’ ambu nyemba la-brahalana Messer. E bakto reng-oreng jareya gi’ badha e dhissa’, Sengko’ la para’ norodana peggella Tang ate ka reng-oreng jareya.
9Tape bi’ Sengko’ ta’ ejalannagi, sopaja Tang nyama ta’ eya-seya bi’ sa-bangsa se apolong bi’ reng-oreng jareya. Sabab e adha’na sa-bangsa jareya, Sengko’ la ngoca’ ja’ bi’ Sengko’ bangsa Isra’il egiba’a kalowar dhari Messer.
10Bi’ Sengko’ reng-oreng jareya laju egiba kalowar dhari Messer nojju ka sagara beddhi.
11E jadhiya bi’ Sengko’ reng-oreng jareya eberri’i ta-parenta ban eajari Tang kom-hokom se kodu eta’adi, sabab oreng se ta’at ka ta-parenta ban ka kom-hokom jareya bakal teptebba odhi’.
12Bi’ Sengko’ reng-oreng jareya esoro ngormat are Sabat menangka tandhana Tang parjanjiyan bi’ reng-oreng jareya, kaangguy maenga’ ka reng-oreng jareya ja’ Sengko’, PANGERAN, neptebbagi reng-oreng jareya kaangguy Sengko’ malolo.
13Tape gi’ badha e sagara beddhi bai reng-oreng jareya la alaban ka Sengko’. Reng-oreng jareya ta’ atoro’ ka Tang ta-parenta ban nolak Tang kom-hokom se nanggung ja’ oreng se atoro’ masthe teptep odhi’. Are Sabat epacemmer ce’ sarana. Lantaran jareya, e sagara beddhi jareya Sengko’ la para’ neba’agiya peggella Tang ate ka reng-oreng jareya ban mateyana reng-oreng jareya kabbi.
14Tape burung, bit kahormadanna Tang nyama, sopaja Tang nyama ta’ eya-seya bi’ sa-bangsa se nangale’e Sengko’ ngeba reng-oreng Isra’il jareya kalowar dhari Messer.
15E sagara beddhi jareya keya Sengko’ la ngoca’ ja’ bangsa Isra’il bi’ Sengko’ ta’ egiba’a maso’ ka tana se bi’ Sengko’ la esadhiya’agi ka reng-oreng jareya, tana se sogi ban landhu ban se paleng bagus e dunnya reya.
16Sengko’ ngoca’ kantha jareya polana reng-oreng jareya ngenthengngagi Tang ta-parenta, nerrak Tang kom-hokom ban manajjis are Sabat; reng-oreng jareya asoka’an nyemba ka la-brahalana.
17Tape Sengko’ pas neser, daddi reng-oreng jareya bi’ Sengko’ burung ta’ epate’e e sagara beddhi jareya.
18Sabaligga, ngangodhadanna bi’ Sengko’ ebalai kantha reya, ‘Ba’na ja’ sampe’ atoro’ ka sakabbinna atoran gabayanna bangatowana, ja’ nerowe kabiyasa’anna ban ja’ sampe’ manajjis aba’na kalaban nyemba la-brahalana.
19Sengko’ reya PANGERAN, Allahna ba’na.
20Hormadi are Sabat sopaja daddiya tandhana parjanjiyan e antarana Sengko’ ban ba’na, kaangguy maenga’ ba’na ja’ Sengko’ reya PANGERAN, Allahna ba’na.’
21Tape ngangodhadan jareya ta’ atoro’ keya ka Sengko’. Tang kom-hokom eterrak, Tang ta-parenta ta’ eparduli, maske ta-parenta jareya daddi tanggungan ja’ oreng se ngalakone jareya tanto teptep odhi’. Are Sabat epanajjis. Daddi Sengko’ la para’ neba’agiya peggella Tang ate ka reng-oreng jareya e sagara beddhi, ban mateyana reng-oreng jareya kabbi.
22Tape burung, sopaja Tang nyama ta’ eya-seya bi’ sa-bangsa se nangale’e Sengko’ ngeba Isra’il kalowar dhari Messer.
23E sagara beddhi jareya keya Sengko’ asompa ja’ reng-oreng jareya bi’ Sengko’ epabalessadana daddi sadunnya,
24polana reng-oreng jareya ta’ marduli ka Tang ta-parenta, nerrak Tang kom-hokom, manajjis are Sabat, ban paggun nyemba ba-diba se epojja bangatowana.
25Saellana jareya reng-oreng jareya bi’ Sengko’ eberri’i kom-hokom se ta’ becce’ ban ta-parenta se ta’ bisa aberri’ odhi’.
26Bi’ Sengko’ reng-oreng jareya epanneng manajjis aba’na bi’ ban-kurbanna dibi’, la’-mala’ ngurbannagi ana’ lalake’anna dibi’. Jareya menangka okoman ka reng-oreng jareya, sopaja reng-oreng jareya tao ja’ Sengko’ reya PANGERAN.
27Daddi sateya, e, manossa se ta’ langgeng, kabala ka reng-oreng Isra’il apa se ekoca’agi Sengko’, GUSTE Allah Se Mahatenggi ka reng-oreng jareya: Reya’ conto laenna se noduwagi baramma bangatowana ba’na ya-nyeya Sengko’ ban ta’ esto ka Sengko’.
28Sengko’ ngeba reng-oreng jareya ka tana se la ejanjiyagi ka reng-oreng jareya bi’ Sengko’. E bakto nangale’e mo’-gumo’ se tenggi ban ka’-bungka’an se rampa’, reng-oreng jareya laju ngeba kurban ka ngan-kennengngan jareya. Sengko’ epapeggel, polana ban-kurban obbaranna ban tor-ator anggurra.
29Sengko’ atanya ka reng-oreng jareya, ‘Ngan-kennengngan tenggi apa se eentare ba’na jareya?’ Daddi molae dhari jareya kennengngan jareya enyamae ‘Ngan-kennengngan se tenggi.’
30Daddi kabala ka oreng Isra’il apa se ekoca’agi Sengko’, GUSTE Allah Se Mahatenggi, ka reng-oreng jareya, ‘Arapa ba’na me’ agabay sa-dusa akantha se elakone bangatowana? Ba’na padha ban bangatowana, noro’ la-brahala se majitjit ate rowa.
31La’-mala’ sampe’ are teya ba’na gi’ manajjis aba’na kalaban ngeba tor-ator ban ngobbar na’-ana’na menangka kurban ka la-brahala jareya. Ma’ gi’ bangal ba’na entar menta petodu ka Sengko’? Bit nyamana Sengko’, Allah se odhi’, GUSTE Allah Se Mahatenggi, Sengko’ ta’ ngedine ba’na menta petodu ka Sengko’.
32Ba’na terro padha’a ban sa-bangsa laen ban pandhudhu’na ra-nagara laen se nyemba ka kajuwan ban ka bato. Tape pangaterrona ba’na ta’ kera kalakon.’"
33"Bit nyamana Sengko’, Allah se odhi’, GUSTE Allah Se Mahatenggi, bi’ Sengko’ ba’na eberri’ana parengeddan ja’ polana Sengko’ ce’ peggella, bi’ Sengko’ ba’na eparenta’a epakerrasa sopaja ba’na tao rassana Tang kobasa. Bi’ Sengko’ ba’na epakompola ban epabaliya dhari ra-nagara kennengnganna ba’na epabalessadan.
34(20:33)
35Saellana jareya bi’ Sengko’ ba’na pas egiba’a ka ‘Ra-ara Sa-bangsa’. E jadhiya ba’na bi’ Sengko’ ehakimana kalaban dhep-adhebban,
36akantha e bakto Sengko’ ahakime bangatowana ba’na e Ra-ara Sinay. Sengko’ GUSTE Allah Se Mahatenggi, la ngoca’."
37"Bi’ Sengko’ ba’na ekerrasana sopaja ba’na ta’ada ka Tang parjanjiyan.
38Para pamberonta’ ban panjahat bi’ Sengko’ epanyeseya dhari antarana ba’na. Reng-oreng jareya bi’ Sengko’ epakalowara dhari ra-nagara se ekennengnge sateya, ban ta’ ebagiya abali ka tana Isra’il. Daddi ba’na tao ja’ Sengko’ PANGERAN."
39GUSTE Allah Se Mahatenggi adhabu, "He, reng-oreng Isra’il, sateya baramma ca’na ba’na. Terrossagi se agabay dusa nyemba ka la-brahalana! Tape kaenga’e, saellana jareya ba’na kodu ta’at ka Sengko’ ban ta’ macemmer Tang nyama se socce pole kalaban ngeba tor-ator ka la-brahalana jareya.
40Sabab e tana Isra’il, e konco’na Tang gunong se socce reya, ba’na kabbi, bangsa Isra’il, bakal nyemba’a ka Sengko’. E jadhiya Sengko’ bakal sennengnga ka ba’na ban endha’ narema ban-kurbanna ba’na, tor-atorra ba’na se paleng bagus ban se malolo kaangguy ka Sengko’.
41Saellana ba’na bi’ Sengko’ egiba kalowar dhari ra-nagara kennengnganna ba’na se abalessadan jareya, Sengko’ makompola ba’na ban narema’a sakabbinna kurban obbaranna. Daddi sakabbinna bangsa tanto pas tao ja’ Sengko’ reya Allah Se Maha Socce.
42Mon bi’ Sengko’ ba’na la egiba abali ka tana Isra’il, tana se bi’ Sengko’ ejanjiyagi ka bangatowana ba’na, ba’na tao ja’ Sengko’ reya PANGERAN.
43E jadhiya ba’na bakal enga’a ka sakabbinna tengkana ba’na se majitjit ban se manajjis ba’na rowa. Ba’na bakal arassa’a baji’ enga’ ka sakabbinna kajahadan jareya.
44Mon bi’ Sengko’ ba’na la epakantha jareya bit kahormadanna Tang nyama, ban banne satembang ban tengkana ba’na se juba’ ban lalakonna se jahat, ba’na, oreng Isra’il, tao ja’ Sengko’ reya PANGERAN. Sengko’ GUSTE Allah Se Mahatenggi, la ngoca’."
45PANGERAN adhabu ka sengko’ kantha reya,
46"He, manossa se ta’ langgeng, kodda’ abas ka lao’. Parengeddi tana Lao’, ban koca’e alas e jadhiya.
47Soro alas jareya ngedhingngagi apa se ekoca’agi Sengko’, GUSTE Allah Se Mahatenggi, ka aba’na, ‘Edhingngagi! Sengko’ nyoledda apoy se epangobbara sakabbinna kajuwan se badha e dhalemmanna ba’na, kajuwan se kerreng ban se gi’ cengngar. Apoy se rabak jareya ta’ ekenneng pate’e, bakal alatlada dhari lao’ ka dhaja, ban sakabbinna oreng bakal ngarassa’agiya panassa.
48Reng-oreng jareya bakal apangrasa’a ja’ Sengko’, PANGERAN la ngodhi’i apoy jareya ban tadha’ oreng settonga se bisa’a mate’e.’"
49Tape sengko’, Yehezkiel, anyata’agi kaberradan ka Pangeran, laju mator, "GUSTE Allah Se Mahatenggi, abdidalem ja’ pakon ngoca’ kadi gapaneka! Sadajana oreng ampon aserro sabab abdidalem seggut acaca ngangguy parompama’an, kantos malarat oreng se ngarteya."