Alkitab Mobile SABDA
[VER] : [MADURA]     [PL]  [PB] 
 <<  Yehezkiel 26 >> 

1E tanggal settong bulan ano e dhalem taon se kapeng sabellas saellana sengko’ sabangsa egiba ka pambuwangan, PANGERAN adhabu ka sengko’, dhabuna,

2"He, manossa se ta’ langgeng, pandhudhu’ Tirus rak-soragan sambi ngoca’, ‘Yerusalim la ancor! Kakowadanna e dhalem orosan dagang la elang! Sateya la ta’ so-mosowan bi’ sengko’ ban ba’na pole.!’"

3GUSTE Allah Se Mahatenggi adhabu, "He, Tirus, Sengko’ reya mosona ba’na! Sengko’ ngeba’a sa-bangsa sabannya’na epanyerranga ba’na. Sa-bangsa jareya bakal dhatengnga akantha omba’na tase’,

4se ngancora dhung-geddhungnga ban magujura ra-manarana ba’na. Sakabbinna tana se badha e dhissa’ bi’ Sengko’ ekaoda sampe’ berse, sampe’ pera’ kare gunong bato se ta’ ekenneng tamenne pa-apa e tengnga tase’.

5Reng-oreng majang bakal ajemmora jalana e attassa gunong bato jareya. Sengko’, GUSTE Allah Se Mahatenggi, la ngoca’. Tirus bakal daddiya mangsana sa-bangsa sabannya’na.

6Sa-bangsa jareya bakal arampoga ban mateyana pandhudhu’ e tha-kottha e tengganganna Tirus. Daddi pandhudhu’ Tirus pas tao ja’ Sengko’ Pangeran."

7GUSTE Allah Se Mahatenggi adhabu, "Sengko’ ngeba’a Rato Nebukadnezar dhari Babil epanyerranga ba’na, Tirus. Rato se paleng kowat jareya dhatengnga dhari dhaja ngeba’a tantara se raja, ngeba’a jaran sabannya’na ban ta-kareta perrang sarta pasukan jaran.

8Pandhudhu’na tha-kottha e tenggangan bakal epateyana e dhalem paperrangan. Moso bakal ngaleya gan-sellogan partahanan, nombuk dhung-geddhung pangeppongan ban nyoson meng-tameng raja se eangguy menangka binteng ngadhebbi ba’na.

9Reng-oreng jareya bakal magujura dhung-geddhungnga ba’na ngangguy kas-pakakas, sarta magujura ra-manarana kalaban ngangguy besse lonjuran.

10Jaranna talebat bannya’na sampe’ abuna ngerbus notobi ba’na. Monyena jaran se agarudhu’ narek kareta se mowa’ sango se ekaparlo e paperrangan ban se narek ta-kareta perrang bakal magundhegga dhung-geddhungnga ba’na e bakto ta-kareta jareya lebat e bang-labang saketheng ban maso’ ka kottha se la daddi jur-gujuran rowa.

11Pasukan jaranna bakal nyerbuwa e rong-lorongnga ba’na ban bakal mateyana pandhudhu’na ba’na ngangguy dhang-peddhangnga. Gu-tuguna ba’na se bagus ban koko bakal eparobbuwa.

12So-mosona ba’na bakal arampasa sakabbinna dhi’-andhi’na ba’na ban rang-barang daganganna ba’na. Dhung-geddhungnga ba’na bakal eparobbuwa ban ko-bengkona ba’na se bagus ban larang bakal epagujura. To-batona, pan-papanna ban tanana bakal ekala’a bi’ so-mosona ba’na, pas bakal ebuwanga ka dhalem tase’.

13Kejungnga ba’na ban mosik calempongnga bi’ Sengko’ epaambuwa.

14Se edina’a bi’ Sengko’ coma gunong bato se kajal, se eangguya reng-oreng majang ajemmor jalana. Kottha jareya ta’ eanyarana pole. Sengko’, GUSTE Allah Se Mahatenggi, la ngoca’."

15GUSTE Allah Se Mahatenggi adhabu ka kottha Tirus, "Pandhudhu’ paseser bakal ngetterra katako’an ngedhing cerrengnga ba’na se kala, ban cerrengnga reng-oreng se teppa’na ejagal.

16Nangale’e nasibba ba’na jareya to-rato dhari sa-bangsa e penggir tase’ bakal jaga’a dhari tahtana, mokka’ juba kabessaranna se solaman, pas toju’ gujuden e tana. Reng-oreng jareya bakal padha’a katako’an tadha’ ambuna.

17Saellana jareya kabbi bakal ngejunga lagu pangoburan, kantha reya: La ancor kottha se kasohor reya! Kapalla la ekaot epaberse dhari tase’. Pandhudhu’na se asalla kobasa e tase’ matako’ reng-oreng paseser.

18Sateya, e are baktona ba’na epakala, pandhudhu’na lo-polo gujuden. Padha takerjat reng-oreng jareya nangale’e ba’na ancor tadha’ karena."

19GUSTE Allah Se Mahatenggi adhabu, "Bi’ Sengko’ ba’na epaseppeya akantha kottha se tadha’ pandhudhu’na. Bi’ Sengko’ ba’na etopowana ban aeng dhari dhasarra tase’.

20Saellana jareya ba’na bi’ Sengko’ ekerema ka dunnyana oreng mate epakompola ban reng-oreng lamba’na. Bi’ Sengko’ ba’na epaterrosa enneng e dunnyana oreng mate jareya, e nga’-tengnga’anna jur-gujuran se langgeng, epapolonga ban oreng mate. Daddi tanana ba’na bakal ta’ ekennengngana oreng pole, ban ba’na bakal ta’ kaetonga e kalanganna oreng odhi’.

21Bi’ Sengko’ ba’na ekagabaya conto se nako’e, ban jareya menangka aherra odhi’na ba’na. Reng-oreng bakal nyareya ba’na, tape ba’na ta’ kera etemmo. Sengko’ GUSTE Allah Se Mahatenggi la ngoca’."


  Share Facebook  |  Share Twitter

 <<  Yehezkiel 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel