Dual Panel1Toronanna Daud padha ban kajuwan se la epoger. Tape dhari bungkella kajuwan se epoger nyelbi’ pole, bariya keya dhari toronanna Daud jareya bakal kalowara settong rato.
2Kobasana PANGERAN bakal nontona rato jareya, andaddiyagi rato jareya alos buddina ban bicaksana, penter nantowagi kapotosan ban ajalannagi kapotosan jareya, ngagali ka kasokanna Allah ban ta’at ka Salerana.
3Se daddi kasokanna ta’at ka PANGERAN. Mon ngadili ta’ adhasar pera’ ka sabarang se eoladi otaba se epeyarsa dhari cacana oreng.
4Oreng mesken eadili sabendherra, oreng se ta’ kowat apa-rapa ebillai sajujurra. Oreng se sala eokom adhasar parentana, oreng se jahat epatompes tadha’ karena.
5Rato jareya adil ban esto e dhalem parkara apa’a bai.
6Pate’ alas bakal ennengnga apolong ban dumba, macan toltol bakal dhung-tedhungana e seddi’na embi’. Budhu’na sape bakal ngakana rebba abareng budhu’na macan, kana’ kene’ bakal agiringa se dhadhuwa’ jareya.
7Sape bakal ngakana rebba abareng ban baruwang, budhu’na kabbi dhung-tedhungan apolong. Macan ngakan darameyan akantha sape.
8La’-mala’ babaji’ ta’ kera apa-rapa mon en-maenan e seddi’na olar se badha opassa.
9E Siyon, Gumo’ soccena Allah, tadha’ se jahat otaba se ararosak. Nagara bakal possa’a ban pangataowan parkara Allah, akantha aeng tase’ se mossa’e sagara.
10E settong bakto bakal badha’a rato toronanna Daud se bakal daddiya bul-ombulla sa-bangsa. Sa-bangsa kabbi bakal akompola ngadhebba ka Salerana, ban kalenggiyanna bakal emolja’agiya.
11E are jareya sakaleyan aggi’ Pangeran bakal ngagemma kakobasa’anna ban mabaliya re-karena ommadda se badha e Asyur ban Messer, e ra-nagara Patros, Sudan ban Elam, e Babil, Hamat ban lo-polo se jau.
12Pangeran bakal ngonjuga bul-ombul kaangguy sa-bangsa menangka tandha ja’ Salerana makompol pole bangsa Isra’il ban Yehuda se ca-kalacer daddi sabume, epamoleya ka kennengngan asalla.
13Karaja’an Isra’il ta’ ere pole ka Yehuda ban Yehuda ta’ amoso ka Isra’il.
14Karaja’an se dhadhuwa’ jareya bakal areng-barengnga alorok bangsa Filistin e bara’ ban arampas dhi’-andhi’na sa-bangsa e temor. Isra’il ban Yehuda bakal matelloga bangsa Edom ban Mo’ab, ban bangsa Amon bakal asojuda ka karaja’an se dhadhuwa’ jareya.
15PANGERAN bakal makerrenga Tellok Suez. Salerana madhatengnga angen panas sampe’ Songay Efrat daddi songay kene’ se nengke’ papetto’, sampe’ saneyap oreng bakal bisa’a alengka e songay jareya ngangguy kasot.
16Kaangguy karena ommadda Pangeran aparenga lorong raja se elebadana kalowar dhari Asyur, akantha e bakto bangatowana kalowar dhari Messer.