Dual Panel1Dhari kottha Sela e ra-ara beddhi, bangsa Mo’ab ngeremmagi budhu’na dumba menangka tor-ator ka se neggu’ kakobasa’an e Yerusalim.
2Reng-oreng Mo’ab anante’e penggirra Songay Arnon sambi ajalan kabingongan ta’ kala ka no’-mano’ se asalebbudan eagga dhari lebunna.
3Ca’na reng-oreng jareya ka bangsa Yehuda, "Tore dhabuwagi ponapa se kodu elakone kaula sadaja. Kaula nyo’ona pangaoban, ngereng parenge pangaoban akadi kajuwan se rampa’ e panassa are. Kaula sadaja paneka oreng ngongse; ngereng kaula sadaja erreppagi, sopaja ta’ kantosa epanggi oreng.
4Nyo’ona edi kaula sadaja ngamponga kennengngan e nagarana sampeyan. Pasalamettagi kaula sadaja paneka dhari reng-oreng se mateyana kaula sadaja." (Ta’ kera badha oreng se enyek-enyek ban epatompes pole, reng-oreng se maancor ban se matompes nagara Isra’il bakal mosna’a.
5Saellana jareya badha settong toronanna Daud se bakal daddiya rato, se bakal marenta’a bangsana kalaban taresna ban esto. Rato jareya bakal majaga’a kaadilan ban gancang alampa’agi barang se bendher.)
6Bangsa Yehuda ngoca’, "Sengko’ la padha ngedhing parkara kasombonganna bangsa Mo’ab. Sengko’ la padha tao ja’ bangsa jareya angko ban angga’. Cacana raja tadha’ essena."
7Daddi dina bangsa Mo’ab me’ olle saleng tangese. Dina me’ olle padha nanges mon enga’ ka kakanan se nyaman se biyasa ekakan e kottha Kir-Hareset. Dina me’ olle padha potos pangarebban ban aserrowan.
8Gal-teggal e seddi’na Hesybon ban bun-kebbun anggur Sibma la epatompes, bun-kebbun se biyasana ngasellaa gi anggur se paleng bagus se biyasana mamabu’ para pangobasana bangsa. Lamba’ bun-kebbun jareya malanjang sampe’ ka kottha Yaezer; ka temor sampe’ ka sagara beddhi, e bara’ sampe’ ka bara’na Tase’ Mate.
9Sateya sengko’ nangese bungkana anggur Sibma akantha se nangese Yaezer. Tang aeng mata agili polana Hesybon ban Eleyale, sabab hasella bumena ekakan moso sampe’ tadha’ karena.
10Tadha’ oreng se agumbira’an e gal-teggal se landhu rowa. Tadha’ se rak-soragan otaba anyanye e kebbun anggur. Tadha’ se merressa anggur kaangguy agabaya anggur. Sengko’ la maambu soragga reng-oreng jareya se kaperagen.
11Tang ate acerreng ancor sampe’ lessa nangale’e kabadha’anna Mo’ab ban Kir-Hareset.
12Oreng Mo’ab amba’ pate ongga ka gumo’ pangurbanan entara ka kennengnganna kabakteyan kaangguy adu’a, tape tadha’ hasella.
13Jareya pessen se lamba’ edhabuwagi PANGERAN parkara Mo’ab.
14Ban sateya PANGERAN adhabu, "Teppa’ tello taon aggi’, sakabbinna kasogiyanna Mo’ab se edir-edirragi rowa bakal mosna’a. Ra’yadda se bannya’ bakal kareya sakone’ ban ta’ kowat."