Dual Panel1Dhabuna PANGERAN ka Yusak, "Pakompol tantarana ba’na kabbi, giba ka kottha Ai. Ja’ kene’ ate ban ja’ tako’! Bi’ Sengko’ ba’na epamennanga ka rato Ai. Ra’yadda, kotthana ban nagarana bakal ekaandhi’a ba’na.
2Ai ban ratona bi’ ba’na kodu epapadha ban Yerikho ban ratona sabbanna rowa. Tape sateya rang-barangnga ban ebinna olle kala’. Mara aya-sadhiya se nyerrang kottha jareya dak-dadak dhari budhi."
3Daddi Yusak aya-sadhiya meyosa ka Ai ban sakabbinna tantarana. Dhari tantarana se paleng bagus epele tello polo ebu oreng, laju eotos epamangkat e bakto malem,
4sambi epessen kantha reya, "Ngetek e dhissa’anna kottha jareya, tape ja’ u-jau; pas aya-sadhiya se nyerrang.
5Sengko’ ban tang reng-oreng nyanderra ka seddi’anna kottha jareya. Mon reng-oreng Ai kalowar alabana ka reng-oreng se egiba sengko’, reng-oreng jareya bi’ sengko’ egiba’a abali terros buruwa akantha sabbanna rowa.
6Reng-oreng Ai jareya tanto pas nyerser sengko’ kabbi terros sampe’ jau dhari kottha jareya, ban nyangka sengko’ kabbi buru akantha sabbanna rowa.
7E bakto jareya ba’na kodu kalowar dhari pangetegganna; kottha jareya pas rebbu’. Bi’ GUSTE Allah kottha jareya epassra’agiya ka ba’na.
8Saellana ekenneng rebbu’, kottha jareya pas obbar, menorot se epakonnagi bi’ PANGERAN. Jareya tugassa ba’na."
9Saellana jareya reng-oreng jareya epamangkat, reng-oreng jareya ngetek, pas anante’ e jadhiya, e bara’anna Ai, e antarana Ai ban Betel. Tape Yusak asaren e parkemahanna ommat Isra’il.
10Gi’ petteng Yusak abungo, makompol pasukanna. Saellana jareya salerana ban para pamimpinna ommat Isra’il abakta pasukan jareya ka Ai.
11Pasukan jareya ajalan ka labang sakethengnga kottha Ai, abareng ban Yusak, pas akemah e bagiyan dhaja; e antarana reng-oreng jareya ban kottha Ai badha corana.
12Tantarana se bannya’na ra-kera lema ebu oreng epangetek e bara’anna kottha jareya, e antarana Ai ban Betel.
13Daddi, sosonanna pasukan tempur jareya eator kantha reya: markas otama esaba’ e dhaja’anna kottha jareya ban pasukan laenna esaba’ e bara’anna, dineng Yusak meyos ka cora e malem jareya.
14E bakto rato Ai buru ngoladi reng-orengnga Yusak, pas duli kalowar ban reng-orengnga nojju ka Cora Yordan nyerranga oreng Isra’il e kennengnganna se dullu. Rato jareya ta’ ngagali ja’ sakejja’ aggi’ salerana eserranga dhari budhi.
15Yusak ban reng-orengnga tha-kantha nyorot, buru ka tana kajal.
16Lalake’an e kottha Ai padha epakompol epanyerser Yusak ban pasukanna jareya. Tape sajan jau se nyerser Yusak, sajan jau reng-oreng jareya dhari kotthana.
17Lalake’an e Ai kalowar kabbi nyerser oreng Isra’il, daddi kotthana edina, tadha’ se ajaga.
18PANGERAN pas adhabu ka Yusak, "Angka’ tombagga ba’na pas acongngagi ka kottha Ai; kottha jareya sateya bi’ Sengko’ epassra’agiya ka ba’na." Yusak alampa’agi papakonna Pangeran jareya.
19Yusak gi’ buru ngacongngagi astana, pasukan se ngetek gella’ duli jaga. Kottha Ai eserrang, terros erebbu’, sarta terros eobbar e bakto jareya keya.
20Reng-oreng Ai atole ka budhi, pas nangale’e okos ngebbul sampe’ ka langnge’. Yusak ban pasukanna nangale’e keya ka okos jareya ban ngarte ja’ pasukan settonganna la ahasel arebbu’ kottha jarowa. Daddi Yusak ban pasukanna laju abalik nyerrang ban mate’e reng-oreng Ai. Reng-oreng Isra’il se badha e kottha Ai nyander ban noro’ nyerrang keya, daddi reng-oreng Ai tajebbak ban ta’ ngenneng buru. Tadha’ settonga se lolos, kabbi padha mate epate’e oreng Isra’il,
21(8:20)
22(8:20)
23kajabana rato Ai. Rato jareya etangkep, pas egiba ngadhep ka Yusak.
24Saellana mate’e sakabbinna tantarana moso se nyerser e tana kajal gella’, pasukan Isra’il laju abali ka Ai, mate’e sakabbinna oreng se badha e jadhiya.
25Yusak terros ngacongngagi tombagga ka kottha Ai, ban tombak jareya ta’ epatoron sampe’ reng-oreng Ai mate kabbi. E are jareya keya reng-oreng kottha Ai mate kabbi, bannya’na dhubellas ebu, lalake’ ban babine’.
26(8:25)
27Ebin ban rang-barang se erebbu’ dhari kottha jareya, ekala’ bi’ reng-oreng Isra’il dibi’, menorot se edhabuwagi PANGERAN ka Yusak.
28Yusak ngobbar kottha Ai, se pas epanneng daddi jur-gujuran sampe’ sateya reya.
29Ratona kottha jareya egantong e cangga, pas edina e jadhiya sampe’ malem. E bakto are la compet, Yusak makon oreng ngala’ mayyit jareya, sarta pas epakon buwang ka adha’anna labang sakethengnga kottha. Saellana jareya kennengngan buru etombugi bato ce’ bannya’na. To-bato jareya gi’ badha e jadhiya sampe’ sateya.
30Saellana jareya Yusak maddek mezba e Gunong Ebal se eatorragi ka PANGERAN, Allahna Isra’il.
31Mezba jareya ekagabay menorot du-petodu se badha e dhalem Ketab Mosa, abdina PANGERAN rowa, ka reng-oreng Isra’il: "Settong mezba dhari to-bato se gi’ ta’ tao eketthok bi’ pakakas dhari besse." E attassa mezba jareya oreng Isra’il ngatorragi ka PANGERAN: kurban obbaran ban kurban karokonan.
32E jadhiya, kalaban esakse’e bi’ reng-oreng Isra’il, Yusak nyerrat e to-batona mezba jareya salenanna kom-hokomma Pangeran se badha e dhalem Ketab Mosa.
33Reng-oreng Isra’il ban pin-pamimpinna, ra-parwirana, kim-hakimma, ban bariya keya reng-oreng manca se badha e antarana reng-oreng jareya, manjeng e kangan kacerra Petthe Parjanjiyanna PANGERAN, ngadhep ka para imam Lewi se mekol Petthe Parjanjiyan jareya. Saparona reng-oreng jareya ngadhep ka Gunong Gerizim, ban saparona pole ngadhep ka Gunong Ebal. Mosa, abdina PANGERAN rowa, la makon sopaja reng-oreng Isra’il ngalakone kantha jareya mon la napa’ baktona narema’a berkat se ejanjiyagi PANGERAN.
34Saellana jareya Yusak maos epakaja sakabbinna hokom menorot se etoles e dhalem Ketab Hokom, tamaso’ kat-berkat ban ton-babaston.
35Saneyap papakonna Mosa bi’ Yusak emaossagi ka sakabbinna ommat Isra’il se akompol e jadhiya, tamaso’ babine’an, na’-kana’, ban reng-oreng manca se badha e antarana ommat Isra’il.