Dual Panel1PANGERAN Se Mahakobasa adhabu, "E are jareya bakal badha’a somber se nancel kaangguy nyocce’e toronanna Daud ban pandhudhu’ Yerusalim dhari dusana ban dhari pamojja’anna brahala se elakone reng-oreng jareya.
2E are jareya nyamana la-brahala jareya bi’ Sengko’ ekosoda dhari tana reya, sampe’ tadha’ oreng settonga se gi’ enga’a ka nyama jareya. Sakabbinna oreng se ngako nabbi bi’ Sengko’ eojuga, bariya keya reng-oreng se kasosoban erroh najjis.
3Ban mon gi’ badha oreng se ngako nabbi sambi manapa’ sen-pessen, eppa’ ban ebuna dibi’ se ngoca’a ka oreng jareya ja’ aba’na kodu eokom mate, sabab se ekoca’agi oreng jareya lecek kabbi. Mon oreng jareya gi’ paggun ngako nabbi keya, oreng jareya bakal ecocowa bi’ eppa’ tor ebuna dibi’.
4E are jareya para nabbi bakal arassa’a malo ngalakonana apa’a bai akantha nabbi. Reng-oreng jareya bakal ta’ nganggguya kalambina nabbi pole kaanguy nepo ban ngandellagi ton-pangatonanna.
5Sabaligga, reng-oreng jareya bakal ngoca’a, ‘Sengko’ banne nabbi. Sengko’ pera’ oreng tane se saomorra alako e teggal.’
6Ban mon badha oreng se atanya, ‘Arapa dhadhana ba’na me’ loka?’ oreng jareya bakal nyaoda, ‘Loka e bengkona tang kanca.’"
7PANGERAN Se Mahakobasa adhabu, "Mara jaga, peddhang, serrang oreng ngowan se alako ka Sengko’ rowa! Kassa’ pate’e me’ olle dumbana asalebbudan. Sengko’ nyerranga Tang ommat,
8ban sanagara reya dhuwa’ partellon dhari pandhudhuna bakal tebasa.
9Pera’ sapartellon se salamedda. Reng-oreng jareya bi’ Sengko’ esocceyana akantha salaka se epamorne bi’ apoy; eojiya akantha oreng se ngoji emmas. Saellana jareya reng-oreng jareya bakal adu’a ka Sengko’ ban Sengko’ bakal ajawaba du’ana jareya. Sengko’ ngoca’a ka reng-oreng jareya ja’ aba’na Tang ommat, ban reng-oreng jareya bakal ngakowa ja’ Sengko’ reya Pangeranna, GUSTE Allahna."