Dual Panel1Karaeng Salomo jai baine battu pantara’ nangai. Pantaranganna ana’ bainena karaeng Mesir, a’nikka tongi Salomo siagang baine-baine battua ri Het, Moab, Amon, Edom, siagang Sidon.
2Le’ba’mi Naparentakang Batara angkanaya takkulleai tu Israel assicampuru’ a’bunting siagang anjo bansa-bansaya, nasaba’ ke’nanga sallang a’jari passabakkang nanynyomba tu Israel mae ri rewata-rewata maraenganga. Mingka manna nakamma anjo, a’nikka tonjia Salomo siagang bai’-baine battu pantaraka.
3Nia’ 700 baine karaeng nanikkai Salomo, siagang nia’ 300 baine boli’-boli’na. Ia ngasemmi anjo bainenna a’jari passabakkang nanabokoimo Salomo Allata’ala,
4sa’genna ri wattu toana akkullemi ninyonyo’ ri ke’nanga anynyomba ri rewata-rewata maraenga. Daud, manggena Salomo, majarreki mae ri Batara, Allata’alana. Mingka Salomo tena nasangkamma manggena.
5Salomo anynyombai Asytoret, rewata baine battu ri Amon.
6Kammaminjo nadorakamo Salomo mae ri Batara. Daud, manggena Salomo mannuruki ri Batara situlusu’ atinna, mingka Salomo tena nakamma.
7Irate ri moncong ri bageang rayanganna Yerusalem, appaentengi tampa’ panynyombang untu’ Kamos rewatana tu Moab, siagang Molokh, rewatana tu Amon — rua-ruai rewata appakaringi’-ringi’.
8Appaenteng tongi Salomo tampa’-tampa’ akkullea napake sikamma bai’-baine battu pantara’na untu’ assare koro’bang mae ri rewata-rewata kalenna ke’nanga.
9Pinruammi Batara, Allata’alana Israel Napappicinikang KalenNa mae ri Salomo siagang Napakainga’ angkanaya takkuleai anynyomba mae ri rewata-rewata maraenga. Mingka Salomo tena namappilangngeri ri Batara. Ba’lalo nabokoimi Batara sa’genna larromi Batara mae ri ia.
10(11:9)
11Nakana Batara, "Nasaba’ lalang sadara’nu nanudakkai parjanjiannu siagang iNakke, siagang tena numannuruki ri parenta-parentaKu, jari laKurampasaki kakaraenganga battu ri kau, nampa Kupassareang mae ri sitau pagawenu.
12Mingka manna nakamma, lanri manggenu Daud, tena nalaKugaukang anjo kammaya lalang attallasa’nu ija. Ri wattu pamarentahanna ana’ bura’nenu, nampami Kugaukang.
13Mingka tena nasikontu anjo kakaraenganga laKurampasa’ battu ri ia. Lanri atangKu Daud, siagang lanri Yerusalem anjo kotaKu le’baka Kubangung, nia’ se’re suku laKupatassesa untu’ ana’ bura’nenu."
14Napa’jarimi Batara anjo Hadad, sitau turungang karaeng Edom, ammusui Karaeng Salomo.
15Sallo rioloanganna anjo, le’ba’na Karaeng Daud nabeta Edom, panglima tantarana Karaeng Daud, iamintu Yoab, a’lampai mange ri Edom untu’ antarawangi sikamma taunna matea. Annang bulangi sallona siagang ana’ buana ammantang ri Edom. Na lalang anjo wattua nabunoi ke’nanga sikontu tau bura’ne niaka anjoreng.
16(11:15)
17Mingka Hadad, ia rungkaya ija anjo wattua, lari mange ri Mesir siagang siapa are tu Edom, iamintu palayang-palayanna manggena.
18A’lampai ke’nanga battu ri Midian, nampa mange ri Paran. Anjoreng asse’remi ke’nanga siagang siapa are tau maraengannaya, nampa assiagang ke’nanga a’lampa mange ri Mesir angngagangi assibuntulu’ karaeng Mesir. Anjo karaenga nasaremi Hadad balla’ siagang tampa’ untu’ pammantanganna siagang kaparalluang katallassang.
19Jari a’jarimi Hadad agang baji’na karaenga, sa’genna napassareammi ipara’ kalenna karaenga, iamintu andi’na Tahpenes bainenna karaenga, mae ri Hadad untu’ a’jari bainenna.
20Nampa ammana’mo anjo bainenna Hadad sitau ana’ bura’ne niarenga Genubat. Anne anaka nipakalompoi ri kalenna bainenna karaenga siagang ammantangi siagang ana’-ana’ bura’nena karaenga.
21Ri wattunna anggappa kabara’ Hadad angkanaya matemi Karaeng Daud, siagang Yoab, panglima tantarana Israel mate tommi, nakanamo Hadad ri karaeng Mesir, "Kipa’biamma’ ammotere’ mange ri pa’rasangangku."
22Akkuta’nammi karaenga angkana, "Angngapai? Apaka kakurangangko anrinni, sa’gennu ero’ ammotere’ mange ri pa’rasangannu?" Appialimi Hadad angkana, "Tena nakukakurangang apa-apa, mingka lappassamma’ a’lampa." Jari ammotere’mi mange ri pa’rasanganna.
23Napa’jari tommi Allata’ala anjo Rezon, ana’na Elyada ammusui Salomo. Rezon iamintu ata laria battu ri karaenna iamintu Karaeng Hadadezer battu ri Zoba.
24Le’baki Karaeng Daud ambetai Hadadezer siagang ambunoi agang-aganna Hadadezer battua ri Siria. Anjo wattua lari Rezon battu ri Hadadezer siagang napa’rappungangi taua nampa a’jari kapala garombolang. Ia siagang ana’ buana a’lampai mange ri Damsyik, nampa ammantang anjoreng ri anjo kotaya. Anjoreng niangka’mi ri ana’ buana a’jari karaeng Siria.
25Sangkamma Hadad, Karaeng Rezon namusu tongi Israel ri jammang attallasa’na Salomo, siagang nakacoi anjo pa’rasanganga.
26Tau maraenga, ia angngewayai Salomo, iamintu sitau pagawena niarenga Yerobeam. Ia ana’na Nebat battu ri Zereda ri Efraim. Amma’na jandami, niarenga Zerua.
27Iaminne riwaya’ angngewana Yerobeam. Ri wattu nitambunginna butta niaka ri bageang timboranna Balla’Na Batara, siagang nipakabaji’ temboka,
28anjama tongi Yerobeam anjoreng. Ri wattunna nacini’ Salomo angkanaya cara’deki siagang rajengi anjo Yerobeam anjama, nasaremi tanggong jawa’ untu’ angngawasi tunjama nipassaya ri daera suku Manasye siagang Efraim.
29Ri se’reang allo assulukangi Yerobeam battu ri Yerusalem. Ri tangngana aganga iamintu ri paranga, nibattuimi ri Na’bi Ahia battu ri Silo ammakea juba beru anjo wattua.
30Nampa napasulu’ jubana Ahia, na nakekke’-kekke’ a’jari sampulo anrua polong.
31Nampa nakanamo ri Yerobeam, "Allei sampulo polong untu’ kalennu, nasaba’ Nakana Batara, Allata’alana Israel ri kau, ‘LaKurampasaki anne kakaraenganga battu ri Salomo, nampa Kupassareang sampulo suku mae ri kau.
32Se’re suku lammantang ri Salomo, lanri atangKu Daud, siagang lanri Yerusalem, ia le’baka Kupile battu ri sikontu pa’rasangang Israel a’jari kotaKu.
33LaKugaukangi anjo kammaya lanri nabokoiMa’ Salomo nampa anynyomba ri rewata-rewataya, iamintu: Asytoret, rewata baine battu ri Sidon; Kamos, rewata bansa Moab, siagang Milkom, rewata bansa Amon. Tena naturuki Salomo erokKu. Tena nasangkamma Daud manggena mannurukia ri Nakke siagang anggaukangai parenta-parentaKu.
34Mingka manna nakamma tena nalaKualle ngaseng sikontu anjo kakaraenganga battu ri ia. LaKulappassangi koasa lalang tallasa’na. Kugaukangi anjo kammaya lanri atangKu Daud, le’baka Kupile, siagang mannurukia ri hukkung-hukkungKu siagang parenta-parentaKu.
35Anne kakaraenganga laKuallei battu ri ana’ bura’nena Salomo sampulo suku nampa Kupassareang mae ri kau.
36Mingka se’re suku laKulappassangi ri ia, sollanna tuli nia’ sitau battu ri turunganna atangKu Daud ammarenta untu’ iNakke ri Yerusalem, kota le’baka Kupile a’jari tampa’ passambayangang mae ri Nakke.
37Nampa ikau Yerobeam, laKupa’jariko karaeng ri Israel siagang laKupa’biangko ammarenta ri sikontu daera nukaerokia.
38Punna ikau, sangkamma atangKu Daud, mannuruki tojeng-tojengko ri hukkung-hukkungKu, siagang nupakasannang atingKu, iamintu nugaukangi sikontu apa Kuparentakanga ri kau, tuli laKururungangko. LaKupa’jariko karaeng Israel. LaKutanggongi angkanaya turungannu la’jari karaeng ansambeangko, kamma le’baka Kugaukang mae ri Daud.
39Lanri dorakai Salomo, laKuhukkungi turunganna Daud, mingka tena nasa’genna satunggu-tungguna.’"
40Ri wattunna battu anjo kabaraka mange ri Salomo, usahami ero’ ambunoi Yerobeam. Mingka larimi Yerobeam mange ri Karaeng Sisak ri Mesir, nampa ammantang anjoreng sa’genna mate Salomo.
41Riwaya’ maraengannaya ri sesena Salomo, ri passala’ sikontu apa le’baka najama siagang ri passala’na pangngassenganna, le’ba’mi nicata’ lalang ri kitta’ Riwaya’ Katallassanna Salomo.
42Patampulo taungi sallona ammarenta Salomo ri Yerusalem mange ri sikontu Israel.
43Nampa mate siagang nitarawang ri Kota Daud. Nampa Rehabeam ana’na ansambeangi a’jari karaeng.