Dual Panel1Karaeng Salomo napa’jari agammi kalenna siagang Mesir na nabuntingi ana’ tulolonna karaeng Mesir. Naerammi Salomo anjo bainea mange ri Kota Daud untu’ ammantang anjoreng sa’genna le’ba’ balla’ karaenga siagang Balla’Na Batara kammayatompa tembo’ pattahangngang akkuliling kota Yerusalem nibangungi.
2Lanri tenapa nibangungi Balla’Na Batara anjo wattua, ra’yaka assareiji koro’bang ri a’rupa-rupa tampa’.
3Salomo mangngamaseangi ri Batara siagang mannuruki ri pitunju’-pitunju’ battua ri manggena. Mingka tuli anynyamballe iji siagang assare iji koro’bang olo’-olo’ ri tampa’ a’rupa-rupaya.
4Tampa’ sambayang kaminang a’la’banga niasseng iamintu niaka ri Gibeon. Biasai Salomo assare koro’bang anjoreng. Ri se’reang wattu, sangkamma biasa, a’lampami pole mange anjoreng.
5Anjo bangngia napappicinikangi KalenNa Batara mae ri ia lalang so’na siagang nakana, "Salomo, pala’mi apa nukaerokia, nampa Kusareangko anjo apa nupalaka!"
6Appialimi Salomo angkana, "O Batara, le’ba’mi Kipappicinikang angkanaya sanna’ Kikamaseanna manggeku Daud, anjo atanTa. Ia bajiki, lambusuki, kammayatompa tamamminrayai mae ri Katte. Na salaku jaminang, angkanaya latuli Kikamaseanna, Kisaremi sitau ana’ bura’ne ia ammarentaya kamma-kamma anne untu’ ansambeangi.
7O Batara, Allata’alaku, Kiangkaka’ a’jari karaeng ansambeangi manggeku, manna kurungka dudu ija siagang takuassengapi angkanaya antekamma carana ammarenta.
8Niakka’ ri tangnga-tangngana bansaku ia le’baka Kipile untu’ a’jari umma’ KalenTa. Ia ke’nanga se’re bansa lompo tenaya nakkulle nirekeng jaina.
9Lanri kammana anjo Batara, poro Kisare laloa’ pangngassengang mabaji’, ia kuparalluanga untu’ ammarenta ri anne ummatTa siagang adele’, siagang untu’ akkulle angngassengi angkanaya kerea baji’ siagang kerea kodi. Punna tena nakamma, antekamma olona akkulle kuparenta anne ummatTa lompo kammaya?"
10Batara sannangi ri anjo pappala’na Salomo
11siagang Nakanamo ri ia, "Nasaba’ pangngassengang mabaji’ nupala’ untu’ ammarenta siagang adele’, na teai umuru’ sallo yareka kakalumanynyangngang untu’ kalennu yareka kamateanna musu-musunnu,
12jari laKuturukiang mako pappala’nu. LaKupa’jariko la’bi cara’dekangngang siagang la’bi bajikangngang pangngassengannu na manna inai-nai, baji’ ri jammang allaloa, kammayatompa ri jammang labattua.
13Ba’lalo manna tenaya nupalaki lakusare tongko: lalang sikontu tallasa’nu lakkalumanynyangko siagang lanapakala’birikko taua la’biangngang na karaeng maraengannaya.
14Na punna ikau, sangkamma Daud manggenu riolo, nuturukiA’ siagang nupinawangi hukkung-hukkungKu, laKusareko umuru’ sallo."
15Ambangunnamo Salomo, nasadarimi angkanaya le’baki a’bicara Allata’ala mae ri ia lalang so’na. Jari ammotere’mi mange ri Yerusalem nampa ammenteng ri dallekanna Patti ParjanjianNa Batara, siagang assaremi koro’bang nitunu kammayatompa koro’bang pappasiamakkang. Nampa appare’mo passua’-suarrang untu’ sikontu pagawena.
16Ri se’reang allo, nia’ rua baine pasundala’ battu andallekang ri Karaeng Salomo.
17Kalase’renna ri ke’nanga angkana, "Karaeng mala’biri’, inakke siagang anjo bainea siballakka’. Tena tumaraeng naagang ikambe ammantang. Siapa are allo allaloa, allassukanga’ sitau ana’ bura’ne. Ruangallo ribokoangannaya allassukang tommi anne bainea sitau ana’ bura’ne.
18(3:17)
19Ri se’reang bangngi, ri wattu sitabanna attinro ikambe, anne bainea tanasangajakkai nanautungi ana’ lolona sa’genna mate.
20Ri tangngana bangngia, lalang attinroku, ambangummi nampa naalle ana’ loloku battu ri sa’ringku. Nampa naboli’ anjo ana’ loloku ri katinroanna, nampa anjo ana’ lolona mateamo naboli’mi ri katinroangku.
21Ammukona bari’basa’, ri wattungku ambangung naero’ kupasusu anjo ana’ loloku, angngapa namatemo kurapikang. Le’ba’na kuparessa baji’-baji’, a’nassami angkanaya teai ana’ loloku anjo."
22Nakanamo anjo baine se’reanga, "A’balle-ballei! Anne attallasaka ana’ loloku, na anjo matea ana’ lolona!" Appialimi anjo bainea rioloa sumpaeng, "Tena! Anne matea ana’ lolonu, naanjo attallasaka ana’ loloku!" Kammaminjo batena ke’nanga a’gea’ ri dallekanna karaenga.
23Nakanamo Karaeng Salomo, "Massing mangakuko angkanaya anne ana’ lolo attallasaka ana’nu siagang teai anjo matea."
24Le’baki akkana kamma assuro allemi karaenga pa’dang.
25Nampa naparentakang karaenga angkana, "Polong ruami anjo ana’ lolo attallasaka a’jari rua nampa massing nusare tassipolonna anjo bainea."
26Nalangngere’na anjo parentaya, nakanamo amma’ sitojennaya anjo anaka, "Pammopporanga’ karaeng, teaki’ bunoi anjo anaka. Kipassareang mami mae ri ia." Nakkana kamma anjo bainea lanri sanna’ nakarimangnginna anjo anaka. Mingka anjo baine se’reanga nakana, "Iye’, polong mami, lappassammi manna sitau ri kambe tena ngaseng nanggappa!"
27Jari nakanamo Salomo, "Teako bunoi anjo anaka! Sareangi anjo baine rioloa sumpaeng, nasaba’ iami anjo amma’na."
28Nalangngere’na bansa Israel anjo kaputusang le’baka natantukang lalang ri anjo parkaraya, lannasa’mi siagang angngali’mi ke’nanga ri ia. Nasaba’ a’nassami angkanaya nisaremi pangngassengang mabaji’ ri Allata’ala untu’ a’gau’ adele’.