Dual Panel1Napakaramulai Salomo ambangungi Balla’Na Batara ri bulang Ziw, iamintu bulang makarua, lalang taung makaappa’na ammarenta, yareka 480 taung le’ba’na bansa Israel ambokoi Mesir.
2Ukkuranna anjo Balla’Na Batara, ia bageang lalanna iamintu: la’buna 27 metere’, sangkara’na 9 metere’, siagang tinggina 13,5 metere’.
3Ri bageang dallekanna anjo Balla’Na Batara nia’ kamara’ luara’, iamintu la’buna 4,5 metere’ na sangkara’na 9 metere’, sangkammai sangkara’na anjo ballaka.
4Ri tembo’na anjo ballaka nia’ so’bolo’-so’bolo’ jandela luara’ bageang antamakkanga.
5Ri tammulili bageang ri bokona anjo ballaka, ri tembo’ bageang pantara’na nibangungi kamara’-kamara’ a’lonjoka. Nia’ tallung lonjo’, massing-massing tinggina 2,2 metere’.
6Ri lonjo’ makase’rea, sangkara’na massing kamaraka 2,2 metere’, ri lonjo’ makaruaya 2,7 metere’, na ri lonjo’ makatallua 3,1 metere’. Tembo’na lonjo’ la’bi rawangnganga la’bi kapallangngangi natembo’na lonjo’ rateanga, sa’genna balo’-balo’na anjo kamara’ pannambaia akkullei nipasisambung siagang tembo’ Balla’Na Batara, manna tena niso’boloki anjo temboka.
7Untu’ anjo balo’-baloka, kayu camara Libanon nipake. Pakke’bu’ mangea ri kamara’-kamara’ pannambai ri lonjo’ rawaya niaki ri bageang timborang. Untu’ lonjo’ makaruaya nia’ tallu tuka’. Nampa nasarei Salomo palapong anjo ballaka. Papang cenrana battu ri Libanon napake. Siapa sallona nibangung anjo Balla’Na Batara, tena le’bakai nia’ kalangngerang sa’ra palu-palu, pangkulu’, yareka pakkakasa’ bassi, nasaba’ anjo batu-batu eroka nipake untu’ ambangungi anjo ballaka le’ba’ nipasadia memammi la’bi riolo ri wattunna nia’ ija ri papparekanna. Kammaminjo batena Salomo ambangungi anjo Balla’Na Batara sa’genna le’ba’.
8(6:7)
9(6:7)
10(6:7)
11Nakanamo Karaeng Allata’ala ri Salomo,
12"Punna nuturuki sikontu hukkungKu siagang parentaKu, laKupa’rupai mae ri kau apa le’baka Kupa’janjiang mae ri Daud manggenu.
13LammantangA’ lalang anrinni ri balla’ nubangunga ri tangnga-tangngana ummakKu Israel. Tena nalaKubokoi ke’nanga."
14Kammaminne batena Salomo ampakale’baki pambangunanna anjo Balla’Na Batara:
15Sikontu tembo’ bageang lalanna nilapisi siagang kayu camara Libanon, appakkaramula battu ri dapara’na sa’genna ri palaponna. Dapara’na battu ri kayu camara biasa nipare’.
16Ilalang ri anjo ballaka, nipareki kamara’ bageang ri bokona iamintu nisarei rinring passimbang battu ri kayu camara, appakkaramula battu ri dapara’na sa’genna ri palaponna. Anjo kamaraka niarengi Kamara’ Kaminang Matangkasa’; la’buna salapang metere’.
17Kamara’ ri dallekanna anjo Kamara’ Kaminang Matangkasaka, niarengi Kamara’ Lompo, ia la’buna 18 metere’.
18Sikontu tembo’ bageang lalanna anjo ballaka, nilapisi siagang kayu camara Libanon, sa’genna tena sikalimo nakacinikang batu-batu tembo’na. Anjo lapisanga nibelo-beloi siagang ukiri’-ukiri’ rappo boyo’ siagang bunga-bunga ta’bakkaraka.
19Anjo Kamara’ Kaminang Matangkasa’ nipareka lalang ri anjo Balla’Na Batara, nipasadiai untu’ napammantangngi Patti ParjanjianNa Batara.
20Anjo kamaraka sangkammai la’buna, sangkara’na, siagang tinggina, iamintu salapang metere’. Tampa’ pakkoro’bangngang, ia niaka ri dallekanna anjo Kamara’ Kaminang Matangkasaka, kayu camara Libanon nipare’. Ri pakke’bu’ antamana ri anjo kamaraka, nia’ rante bulaeng nibantang. Sikontu bageang lalanna anjo Balla’Na Batara kammayami Kamara’ Kaminang Matangkasaka siagang tampa’ pakkoro’bangnganga nilapisi siagang bulaeng ti’no’.
21(6:20)
22(6:20)
23Ilalang ri anjo Kamara’ Kaminang Matangkasaka, nia’ todong niboli’ rua patung malaeka’ akka’nyika, ia nipareka battu ri kayu zaitun. Tinggina anjo ruaya patung massing 4,4 metere’;
24ukkurang modele’na sangkammai. Massing nia’ ka’nyi’na rua, na massing-massing anjo ka’nyika 2,2 metere’ la’buna. Bellana alla’na anjo cappa’na ka’nyi’na massing anjo ruaya patung, iamintu 4,4 metere’.
25(6:24)
26(6:24)
27Anjo ruaya patung niboliki a’remba lalang ri anjo Kamara’ Kaminang Matangkasaka, siali ka’nyi’na anjo massing patunga naberoi rinringa, nampa massing ka’nyi’na sialia assiberoi ri tangnga-tangngana anjo kamaraka.
28Anjo ruaya patung nilapisi siagang bulaeng.
29Sikontu bageang lalanna anjo Balla’Na Batara nibelo-beloi siagang ukirang gambara’ malaeka’ akka’nyi’ siagang poko’-poko’ palem, siagang bunga-bunga ta’bakkaraka.
30Sikontu daparaka lalang ri anjo Balla’Na Batara nilapisi’ ngasengi bulaeng.
31Ri pakke’bu’ antamaya ri anjo Kamara’ Kaminang Matangkasaka, nibonei ruallawara’ pakke’bu’ battu ri kayu zaitun. Bageang ratena anjo pakke’buka appakkoki na cidu’ ri tangnga-tangngana.
32Anjo ruaya pakke’bu’ nibelo-beloi siagang ukirang malaeka’ akka’nyi’, poko’-poko’ palem, siagang bunga-bunga ta’bakkara’. Papang pakke’bu’, patung malaeka’ akka’nyi’ siagang ukirang poko’-poko’ palem, yangasenna nilapisi siagang bulaeng.
33Ri pakke’bu’ antamaya mange ri kamara’ dallekang, iamintu kamara’ lompoa, nibonei les pakke’bu’ battu ri kayu zaitun, modele’na appa’ pasagi la’buna.
34Nampa nipare’ todong ruallawara’ pakke’bu’ battu ri kayu camara biasa, massing akkullea nilappa’.
35Papang-papanna anjo pakke’buka nibelo-beloi ukirang malaeka’ akka’nyi’, poko’-poko’ palem, siagang bunga ta’bakkara’. Yangasenna anjo ukiranga nilapisi siagang bulaeng.
36Ri dallekanna anjo Balla’Na Batara, niparekimi paranglakkeng bageang lalang. Anjo paranglakkenga nikulilingi ri tembo’ a’lapisi’-lapisika: irateanna tattallung lapisika batu, nia’ silapisi’ kayu camara Libanon.
37Bulang Ziw nanipasangi pondasina anjo Balla’Na Batara, iamintu bulang makarua, lalang taung makaappa’na pamarentahanna Salomo.
38Na lalang bulang Bul, iamintu bulang makasagantuju, lalang taung makasampulo asse’re ri pamarentahanna Salomo, le’ba’mi nabangung Salomo anjo Balla’Na Batara, coco’ sikali siagang apa le’baka nirancana. Tuju taungi wattu nipake untu’ ambangungi anjo ballaka.