Dual Panel1Napaui Saul mae ri ana’na Yonatan, siagang sikontu pagawena angkana eroki nabuno Daud. Mingka Yonatan sanna’ nasayanna Daud.
2Jari nakanamo ri Daud, "Nausahakangi manggeku ambunoko, jari tutuko. Accokko mako ammuko bari’basa’ ri se’reang tampa’ tenaya niassengi, siagang ammantang mako anjoreng.
3La’lampa’ mange ri paranga siagang manggeku siagang ammenteng ri ampi’na tampa’ nupaccokkoia anjo. Nampa la’bicara’ siagang manggeku ri passala’na anjo usahana ero’ ambunoko. Lakupabattuangko sallang anjo wassele’ pambicaraangku siagang ia."
4Nampa nabicaramo Yonatan kabajikanna Daud mae ri Saul, angkana, "Bapa’, teaki panraki anjo atanta Daud. Nasaba’ tena apa-apa kasalang le’ba’ nagaukang mae ri katte. Ba’lalo jai sikalimi jasana mae ri katte.
5Le’ba’mi nasaung nyawana wattunna nabuno Goliat, na nisaremo pammetang lompo tu Israel tete ri ia. Kalenta anciniki anjo apa le’baka kajariang, siagang rannumi pa’maitta anjo wattua. Jari angngapa nakiero’ kamma-kamma anne ansessai tau tenaya kasalanna siagang ambunoi anjo Daud natena apa-apa saba’na?"
6Sadara’mi Saul lanri kana-kananna Yonatan, nampa assumpamo lalang arenNa Batara angkanaya tena nalanabuno Daud.
7Le’baki anjo nakio’mi Yonatan anjo Daud, nampa nacarita ngaseng sikamma pambicaranga sumpaeng. Nampa nierang Daud ri Yonatan mange ri Saul, siagang nalayanimi Saul ammotere’ kamma riolo.
8Tena nasallo a’jarimi pole pa’bundukanga siagang tu Filistin. Mangemi Daud ambunduki ke’nanga nampa nabeta ngaseng ke’nanga, sa’genna lari ke’nanga.
9Ri se’reang allo sitabangi Saul ammempo ri balla’na, na anna’gala’ poke. Ti’ring nibattuimi pole Saul ri roh ja’dala’ Nasuroa Batara. Anjo wattua sitabangi napasa’ra Daud kacapinna.
10Nampa nausahakammo Saul ampatintingi pokena ri kalenna Daud ia niaka ri ampi’na rinringa. Mingka a’lili Daud, sa’genna tattinting anjo pokea ri rinringa. Larimi Daud untu’ ampasalamaki kalenna.
11Anjo memang bangngia nasuromi Saul siapa are tau mange angngodoki Daud ri balla’na siagang ambunoi punna bari’basamo. Mingka nakanamo Mikhal bainenna ri ia, "Punna tena nulari anne bangngia, ammuko bari’basa’ tena tanibunonu."
12Nampa nipanaummo Daud ri Mikhal battu ri jandelaya, siagang larimi Daud sa’genna ta’lappasa’.
13Le’baki anjo angngallemi Mikhal patung rewata niaka ri balla’na nampa napadongko’ ri katinroanna Daud. Nampa nasare pa’lungang bulu bembea nipare’ ri tuju ulunna Daud, nampa nakalimbuki anjo patunga.
14Ri wattunna battu ngaseng surona Saul untu’ anjakkalaki Daud, nakanamo Mikhal, "Garringi Daud."
15Mingka Saul nasuromi ke’nanga a’lampa pole mange anjoreng untu’ anciniki Daud siagang mata kalenna ke’nanga. Naparentakangi angkana, "Erangi mae anrinni siagang katinroanna, nampa kubuno."
16Antama’mi sikamma anjo tunisuroa ri kamara’. Nampa naassemmo ke’nanga angkanaya anjo ta’dongkoka ri katinroanga iamintu patung siagang pa’lungang bulu bembe ri tuju ulunna.
17Nakanamo Saul ri Mikhal, "Ero’na pa’mai’nu antipua’ kamma anne! Nubantui musungku lari!" Appialimi Mikhal angkana, "Erokka’ nabuno punna tena nakubantui sollanna akkulle lari."
18Lappasa’namo Daud, a’lampami mange ri balla’na Samuel ri Rama, nampa napauang ngaseng anjo apa nagaukanga Saul mae ri kalenna. Nampa a’lampami Daud siagang Samuel mange ri Nayot nammantang anjoreng.
19Mingka nia’mo ampauangi Saul angkana niaki Daud ri Nayot ri ampi’na Rama.
20Lanri kammana anjo, akkirimmi Saul siapa are tau untu’ a’lampa anjakkalaki Daud. Mingka narapikammi ke’nanga sipa’rappungang na’bi sitabang a’joge’-joge’ siagang akkiok-kio’, nipimping ri Samuel. Nampa nikoasaimo ri RohNa Allata’ala anjo sikamma tunisuroa ri Saul, sa’genna appakkaramulamo ke’nanga amminawang todong a’joge’-joge’ siagang akkiok-kio’.
21Ri wattunna battu anjo kabaraka mange ri Saul, akkirimmi tau maraeng. Mingka amminawang tommi anjo ke’nanga a’joge’-joge’ siagang akkiok-kio’. Makapintallunna akkirimmi pole Saul, mingka kamma tomminjo kajariang mae ri ke’nanga.
22Lanri kammana anjo, a’lampami kalenna Saul mange ri Rama. Anrapi’na ri bungung lompoa ri Sekhu, akkuta’nammi angkanaya kemaei Samuel siagang Daud. Na nipauammo ri taua anjoreng angkanaya niaki ke’nanga ri Nayot.
23Jari tulusu’mi mange anjoreng, mingka nikoasai tommi ri RohNa Allata’ala, sa’genna a’joge’-joge’ siagang akkiok-kio’mi ri aganga sa’genna mange ri Nayot.
24Battui mange anjoreng, napasulu’mi pakeanna nampa a’joge’-joge’ siagang akkiok-kio’ ri dallekanna Samuel, nampa anra’ba naung ri buttaya assolara’ sila’busu’ allo siagang bangngi. (Iaminne assala’na paruntu’ kana angkanaya, "Apaka a’jari na’bi tongi Saul?")