Alkitab Mobile SABDA
[VER] : [MAKASAR]     [PL]  [PB] 
 <<  1 Samuel 29 >> 

1Tu Filistin napa’rappungammi sikontu tantarana ri Afek, nampa tu Israel akkemai ri ampi’na timbuseng je’neka ri Lappara’ Yizreel.

2Majumi anjo limaya karaeng Filistin a’barrisi’ siagang massing pasukanna ke’nanga, nia’ tassibilangngang, nia’ tassisa’bu tau jaina. Daud siagang ana’ buana a’barrisiki ri boko siagang Karaeng Akhis.

3Sikamma panglimana tu Filistin naciniki ke’nanga nampa akkuta’nang angkana, "Untu’ apa nania’ anjo tu Ibrania anrinni?" Appialimi Akhis angkana, "Anne Daud, le’ba’ pagawena Karaeng Saul battu ri Israel. Sallo-sallomi ammantang ri nakke. Baku’ battuna mae ri nakke sa’genna kamma-kamma anne, tenale’bakapi kugappa a’gau’ kasalang."

4Mingka larromi anjo sikamma panglimana tu Filistin mae ri Akhis na nakana ri ia, "Suroi anjo taua ammotere’ mange ri kota le’baka nusareangi. Takkulleai amminawang a’bundu’ siagang ikatte. Gassingka naalle battu ri bokojaki’ lalang ri pa’bundukanga. Sai iaminne kasampatang sannaka baji’na ri ia untu’ angngallei pa’mai’na karaenna punna nabuno ana’ buata?

5Sai iaminjo Daud? Untu’ iami na’joge’-joge’ pirangalloang sikamma bai’-bainea nakkelong angkana, ‘Saul ammunomi musu assa’bu-sa’bu tau, mingka Daud appulo-pulo sa’bu.’"

6Jari Akhis nakio’mi Daud nampa nakana ri ia, "Tappaka’ lanri Batara mattallasaka, angkanaya tamamminrayako mae ri nakke. Rannua’ punna nururunganga’ lalang ri anne pa’bundukanga. Nasaba’ baku’ battunu mae ri nakke sa’genna kamma-kamma anne, tenapa kasalannu kugappa. Mingka sikamma karaeng maraenga tena nangaia’.

7Lanri kammana anjo, ammotere’ mako siagang salama’, siagang teako anggaukangi apa-apa akkullea ampakanassui ke’nanga."

8Appialimi Daud angkana, "Kasalang apa nagaukang atanta, karaeng? Situru’ kananta, tena apa-apa kasalang ri atanta baku’ appakkaramulana atanta allayaniki’ sa’genna kamma-kamma anne. Mingka angngapa natena nikellai atanta amminawang a’bundu’ angngewai musunta?"

9Appialimi Akhis angkana, "Nuassengi angkanaya inakke kukanako tena pamminranu sangkamma malaeka’Na Allata’ala. Mingka sikamma panglimaya anjo, le’baki natappuki angkanaya tena nukkulle amminawang a’bundu’ siagang ikambe.

10Lanri kammana anjo Daud, ammuko ikau ngaseng le’bakamo ambokoi Saul nampa battu mae ri nakke, musti bari’basakko ambangung nunampa a’lampa linta’ punna ammumbamo alloa."

11Lanri kammana anjo, ammukona bari’basa’, a’lampami Daud siagang ana’ buana ammotere’ mange ri pa’rasangang Filistin, nampa anjo tantarana tu Filistin a’lampami mange ri Yizreel.


  Share Facebook  |  Share Twitter

 <<  1 Samuel 29 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel