Alkitab Mobile SABDA
[VER] : [MAKASAR]     [PL]  [PB] 
 <<  1 Samuel 31 >> 

1Lalanna anjo wattua tu Filistin a’bunduki siagang tu Israel ri pa’moncongang Gilboa. Jai tu Israel mate anjoreng, na maraengannaya, kammayatompa Saul siagang ana’-ana’ bura’nena larimi.

2Mingka nipinawangi ke’nanga ri tu Filistin, na tallu battu ri ana’na bura’nena Saul nibunomi, iamintu: Yonatan, Abinadab, siagang Malkisua.

3Teai sipato’ heba’na bunduka ri ampi’na Saul, na ia nitaba tommi ri panana musua sa’genna sanna’mo loko’na.

4Nakanamo Saul mae ri turungka paerang sanjatana, "Bi’bu’mi antu pa’dannu nampa nutoboka’, sollanna tena napare’ karek-karenanga’ siagang nibunoa’ ri anjo tau tenaya naassengi Batara." Mingka taerokai anjo turungkaya antoboki, lanri sannaki napakala’biri’na Saul. Lanri kammana anjo naallemi kalenna Saul anjo pa’danga nampa napara’ba kalenna naung ri matanna anjo pa’danga.

5Ri wattu nacini’na anjo turungkaya angkanaya matemi Saul, napara’ba tommi kalenna naung ri matanna anjo pa’danga nampa mate ri sa’rinna Saul.

6Kammaminjo Saul siagang tallu ana’ bura’nena, siagang sikontu ana’ buana kammayatompa anjo turungkaya mate ngasemmi ri wattu anjo allo se’rea.

7Ri wattu tu Israel niaka ammantang ri ba’leanna Lappara’ Yizreel siagang ri rayanganna Binanga Yordan nalangngereki angkanaya larimi tantara Israel, siagang matemi Saul siagang ana’-ana’ bura’nena, larimi ke’nanga ambokoi kota-kotana ke’nanga. Nampa naempoi tu Filistin anjo kota-kotaya.

8Ammukona, ri wattu battuna tu Filistin untu’ angngallei apa-apa niaka ri kalenna mayaka, nabuntulu’mi ke’nanga Saul siagang tallu ana’-ana’ bura’nena mate ri pa’monconganna Gilboa.

9Naallemi ke’nanga ulunna Saul siagang naalle tommi baju pa’bundu’na, nampa akkiring kabara’ tu Filistin mange ri sikontu pa’rasangang Filistin untu’ ampabattui anjo kabara’ bajika mae ri ra’yaka siagang rewatana ke’nanga.

10Nampa anjo baju pa’bundu’na Saul niboliki lalang ri balla’ rewata baine niarenga Asytoret, siagang kalenna anjo bajua nipakui mae ri tembo’ kota Bet-Sean.

11Mingka pandudu’na Yabesh ri Gilead nalangngereki kabara’na anjo apa nagaukanga tu Filistin mae ri Saul.

12Nia’mo siapa are tu kaminang barani a’lampa battu anjoreng nampa a’jappa sila’busu’ bangngi mange ri Bet-Sean. Napanaummi maya’na Saul siagang maya’-maya’na ana’-ana’ bura’nena battu ri tembo’na anjo kotaya, nampa naerang mange ri Yabesh, na natunu.

13Sikontu buku-bukunna dipasse’rei nampa ditarawang irawanganna se’reang poko’ kayu ri anjo kotaya. Nampa appuasa ke’nanga tuju allo sallona.


  Share Facebook  |  Share Twitter

 <<  1 Samuel 31 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel