Dual Panel1Ri wattunna toamo Samuel, naangka’mi ana’-ana’na a’jari haking ri Israel.
2Ana’na toaya niarengi Yoël, na makaruaya niarengi Abia. A’jari hakingi ke’nanga ri Bersyeba.
3Mingka tena naturuki panggaukanna manggena ke’nanga, passangalinna kaparalluang kalennaji bawang tuli naondang. Annarimai ke’nanga doe’ pacoco’, siagang tena naadele’ ke’nanga angngadeli ra’yaka.
4Lanri kammana a’rappungang ngasemmi sikontu pamimpinna tu Israel, nampa mange andallekang ri Samuel ri Rama,
5nampa nakana ri ia, "Pilangngeri bapa’. Ikatte toa maki’, nampa ana’-anatta tena naturuki panggaukanta. Jari bajikangngang angngangka’ maki’ sitau karaeng, sollanna nia’ karaenna ikambe kamma bansa-bansa maraenga."
6Mingka tena nasannang pa’mai’na Samuel ri anjo pappala’na ke’nanga. Jari appala’ doammi mae ri Batara.
7Na Nakanamo Batara, "Turukiammi sikontu pappala’na anjo bansaya mae ri kau. Nasaba’ teai ikau nasorongboko ke’nanga, mingka iNakke. Tenamo naero’ punna iNakke a’jari karaenna ke’nanga.
8Ri Kueranna ke’nanga assulu’ battu ri Mesir, nabokoiMa’ ke’nanga nampa anynyomba ri rewata-rewataya. Na apa anjo nagaukanga ke’nanga mae ri kau, iatommi anjo le’ba’ nagaukang ke’nanga mae ri Nakke.
9Lanri kammana anjo, turukiammi pappala’na ke’nanga; mingka pakainga’ tojeng-tojengi ke’nanga, siagang pauangi angkanaya antekamma sallang lanigaukangi ri karaenga."
10Sikontu anjo kananNa Batara napabattu ngasengi Samuel mae ri anjo tau appalaka sitau karaeng ri ia, angkana,
11"Kamma anne sallang batena karaenga anggaukang mae ri kau. Lanapassai ana’-ana’nu antama’ tantara; sipa’gang ke’nanga a’jari tantara ri karetaya, sipa’gang a’jari tantara a’jarang, na maraengannaya a’jari tantara a’jappa bangkeng.
12Sipa’gang naangka’ a’jari perwira mae ri sisa’bu tau, na sipa’gang maraenganga mae ri limampulo tau. Anjo karaenga lanapassai ana’-ana’nu appa’jeko ri koko-kokonna, ampasse’rei wassele’ kattoanna, appare’ sanjata-sanjata siagang pakkakasa’-pakkakasa’ untu’ kareta pa’bundukanna.
13Ana’-ana’nu bainea lanasuroi appare’ minynya’ bau’ siagang anjama a’jari tukang appallu kammayatompa tukang appare’ roti.
14Lanaallei kokonnu, koko anggoro’nu, siagang koko zaitunnu kaminang bajika, nampa napassareang mae ri sikamma pagawena.
15Kokonnu siagang koko anggoro’nu lanapitabai sima, iamintu bage sampulona battu ri wassele’na, nampa napassareang mange ri sikamma perwira tantarana siagang sikamma pagawena.
16Lanaallei atannu, olo’-olo’nu kaminang bajika siagang keledainu na napake untu’ anjamai jamanna.
17Bage sampulona battu ri yangasenna bembenu siagang gimbala’nu lanaallei. Nampa ikau ngaseng kalennu la’jari atannako.
18Punna narapi’mo wattunna anjo kammaya, lakkunrareng mako lanri anjo karaeng nupilea, mingka taerokai Batara ampilangngeri kunrarennu."
19Mingka taerokai anjo bansaya anjampangi kananna Samuel. Ba’lalo nakana ke’nanga, "Boli’mi kamma! Manna pole antekamma eroki ikambe karaeng.
20Eroki ikambe sangkamma bansa-bansa maraenga. Karaenna ikambe musti ammarentai siagang napimpingi ikambe lalang ri pa’bundukanga."
21Nalangngere’na Samuel anjo kananna ngaseng ke’nanga, napabattumi anjo passalaka mae ri Batara.
22Appialimi Batara Angkana, "Pinawang mami ero’na ke’nanga. Angngangka’mako sitau karaeng untu’ ke’nanga." Jari nasuromi Samuel anjo tu Israel massing ammotere’ mange ri balla’na.