Alkitab Mobile SABDA
[VER] : [MAKASAR]     [PL]  [PB] 
 <<  1 Tawarikh 12 >> 

1Ri wattunna lari Daud alliliangi kalenna battu ri Karaeng Saul, a’lampami mange ri Ziklag. Jaimi pejuang tammamminraya ri Daud siagang tuniakamo pangalamanna battu a’gabung mae ri Daud.

2Anjo ke’nanga tu battu ri suku Benyamin sangkammaya Saul. Cara’deki ke’nanga ammake sanjata pana siagang anynyambila — lima kananna siagang lima kairinna cara’de’ ngaseng.

3Ia pamimpinna ke’nanga iamintu Ahiezer siagang Yoas, ana’-ana’na Semaa battua ri Gibea. Iaminne areng-arenna anjo pejuanga: Yeziel siagang Pelet ana’-ana’na Azmawet, Berakha siagang Yehu, tu Anatot, Yismaya, tu Gibeon, pejuang masahoroka, a’jaria kalase’renna perwira lalang anjo nikanaya "Tallumpuloa Perwira". Yeremia, Yehaziel, Yohanan, siagang Yozabad, tu Gedera, Eluzai, Yerimot, Bealya, Semarya, siagang Sefaca, tu Harufi, Elkana, Yisia, Azareel, Yoëzer, siagang Yasobam, battu ri bija-bijanna Korah, Yoëla siagang Zebaja ana’-ana’na Yeroham, tu Gedor.

4(12:3)

5(12:3)

6(12:3)

7(12:3)

8Ri wattu nia’na Daud ri pattampakkanna ri parang lompoa, jai pejuang masahoro’ siagang niaka pangalamanna battu ri suku Gad battu a’gabung mae ri ia. Iami ke’nanga pejuang-pejuang sannaka cara’de’na ammake sanjata poke siagang pa’lapa’ barambang; sanna’ ngaseng baranina ke’nanga sanrapang singa, siagang lacciri’ sikali ke’nanga sanrapang jonga.

9Iaminne areng-arenna ke’nanga, nisusunga situru’ pangka’na: Ezer, Obaja, Eliab, Mismana, Yeremia, Atai, Eliel, Yohanan, Elzabad, Yeremia, siagang Makhbanai.

10(12:9)

11(12:9)

12(12:9)

13(12:9)

14Sipa’gang battu ri anjo tu Gad, iami perwira-perwira tinggia pangka’na, ammimpinga 1.000 tantara; sipa’gang pole, iami ammimping 100 tantara.

15Le’baki kajariang ri bulang se’re, ri wattunna a’ba battu ri Binanga Yordan, na’limbang anjo komandang-komandanga mange ambongkai tuniaka anjoreng ri sikamma lappara’, baji’ naniaka ri bageang rayangang kammayatompa niaka ri bageang laukanna anjo binangaya.

16Ri se’reang wattu nia’ siapa are tau battu ri suku Benyamin siagang Yehuda a’lampa mange ri pattampakkanna Daud.

17Nibuntulimi ke’nanga ri Daud na nakana, "Punna battuko mae salaku agang untu’ ambantua’, a’gabung mako siagang inakke. Rannui pa’maikku antarima ngasengko. Mingka punna ero’ ngasengko ambalianga’ untu’ musungku, manna tena kasalangku mae ri kau ngaseng, Allata’ala nasombaya boe-boeta angngassengi, Iami langhukkung ngasengko."

18Kalase’renna ke’nanga, iamintu Amasai, a’jaria sallang pamimping ri anjo nikanaya "Tallumpuloa Perwira," nikoasai ri RohNa Allata’ala, angkana, "O Daud, ana’na Isai! Ikambe anne erokki’ ambantuko! Poro ikau siagang sikamma ke’nanga ambantuako nisarei pammetang. Niaki Allata’ala angngagangangko!" Jari nitarimami ke’nanga ri Daud siagang niangka’mi ke’nanga a’jari perwira lalang ri tantarana.

19Ri wattunna Daud siagang tu Filistin ambunduki Karaeng Saul, nia’ sipa’gang battu ri tantara suku Manasye a’limbang mange a’jari agang ri Daud. Sikontutojenna tena nabantui Daud anjo tu Filistin. Nisuroi ri sikamma pamimpinna tu Filistin ammotere’ mange ri Ziklag lanri nakamallakkangi ke’nanga angkana laagang mangei ri Karaeng Saul anjo Daud siagang a’jari bali mae ri ke’nanga.

20Iaminne areng-arenna sikamma pejuang battua ri suku Manasye, a’jari aganga mae ri Daud ri wattunna lalang pa’jappang Daud mange ri Ziklag: Adnah, Yozabad, Yediael, Mikhael, Yozabad, Elihu siagang Ziletai. Massing a’jari pamimpingi ke’nanga ri 1.000 tantara.

21Ke’nangami pejuang barania siagang ambantuai Daud angngewai garombolanga. Allo ribokoanganna iami ke’nanga a’jari perwira-perwira lalang ri tantarana Israel.

22La’biringi allo-allona nia’ tau beru a’gabung mae ri Daud, sa’genna a’jari sanna’mi jaina pasukanna Daud.

23Ri wattunna nia’ Daud ri Hebron, jai pejuang le’baka nilati a’gabung siagang Daud. Nabantumi ke’nanga Daud sollanna akkulle a’jari karaeng assambeangi Saul, situru’ janjinNa Batara. Ia jaina ke’nanga, iamintu: Battu ri suku Yehuda: 6.800 tau, langka’ siagang poke na pa’lapa’ barambang. Battu ri suku Simeon: 7.100 tau le’baka nilati. Battu ri suku Lewi: 4.600 tau. Ana’ buana Yoyada pamimping battua ri turunganna Harun: 3.700 tau. Bija pammanakanna Zadok, iamintu sitau pejuang rungka barania: 22 tau, yangasenna kapala kaluarga. Battu ri suku Benyamin (sukuna Karaeng Saul): 3.000 tau; jaiangangi suku Benyamin tamaminrayai mae ri Saul. Battu ri suku Efraim: 20.800 tau masahoroka lalang ri massing-massing bijanna. Battu ri suku Manasye niaka ri laukanna Binanga Yordan: 18.000 tau, ia nijo’joka untu’ allantiki Daud a’jari karaeng. Battu ri suku Isakhar: 200 pamimping siagang ana’ buana ke’nanga; anne pamimping-pamimpinga cara’deki ampattantui apa mustia nagaukang bansa Israel ri wattu bajika. Battu ri suku Zebulon: 50.000 tau, ia cara’deka ampakei sangka’ rupaya sanjata, siagang tuli sadiaya untu’ a’bundu’; iami ke’nanga kaminang tamamminraya siagang kaminang nipatappaka. Battu ri suku Naftali: 1.000 pamimping siagang 37.000 tantara kompeleka siagang poke na pa’lapa’ barambang. Battu ri suku Dan: 28.600 tau le’baka nilati. Battu ri suku Asyer: 40.000 tau, ia sadiaya untu’ a’bundu’. Battu ri suku-suku niaka ri bageang rayanganna Binanga Yordan, iamintu Ruben, Gad, siagang sipa’gang suku Manasye: 120.000 tau, ia cara’deka ammake sangka’ rupa sanjata.

24(12:23)

25(12:23)

26(12:23)

27(12:23)

28(12:23)

29(12:23)

30(12:23)

31(12:23)

32(12:23)

33(12:23)

34(12:23)

35(12:23)

36(12:23)

37(12:23)

38Sikontu anjo pejuanga a’lampai mange ri Hebron, sadia untu’ a’bundu’ siagang eroka angngangkaki Daud a’jari karaeng untu’ sikontu bansa Israel. Na sikontu tu Israel maraengannaya a’julu ati ngaseng tommi untu’ anggaukangi anjo passalaka.

39Tallungalloi sallona anjo sikamma pejuanga ammantang siagang Daud anjoreng, siagang assua’-suara’mi ke’nanga angnganre siagang angnginung battu ri kanre siagang inungang napasadiaya tu Israel maraenganga.

40Manna suku-suku battu bellaya bageang wara’ iamintu: suku Isakhar, Zebulon, siagang Naftali, para battumi siagang keledai, unta, bagal, siagang sapi, massing atteke’ angngerang apa-apa nikanre, iamintu: labu’, rappo ara, kismis, anggoro’, siagang minynya’ zaitun. Angngerang tongi ke’nanga sapi siagang gimbala’ untu’ nipolong siagang nikanre. Yangasenna anjo anjari pammatei antekamma rannuna ngaseng sikontu ra’yaka ri Israel.


  Share Facebook  |  Share Twitter

 <<  1 Tawarikh 12 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran