Dual Panel1Karaeng Hiram battu ri pa’rasangang Tirus, akkiringi siapa are tunisuro battu mange ri Daud. Kammayatompa akkiringi kayu camara battu ri Libanon siagang tukang-tukang kayu, tukang-tukang batu, untu’ ambangung balla’ napammantangia karaeng.
2Lanri kammana tappa’mi Daud angkanaya nipakajarre’mi ri Batara untu’ a’jari karaeng Israel, siagang nipakajarre’mi kakaraenganna untu’ kaparalluang Umma’Na Batara.
3Ri Yerusalem angngallemi pole siapa are baine na nabaineang, sa’genna anggappamo pole siapa are ana’.
4Ana’-ana’ bura’nena ia lassuka ri Yerusalem, iamintu: Syamua, Sobab, Natan, Salomo (biasai nitappu Suleman),
5Yibhar, Elisua, Elpelet,
6Nogah, Nefeg, Yafia,
7Elisama, Beelyada, siagang Elifelet.
8Ri wattunna nalangngere’ tu Filistin angkanaya le’ba’mi niangka’ Daud a’jari karaeng ri sikontu Israel, battumi ke’nanga ero’ anjakkalaki Daud. Lanri kammana assulu’mi Daud untu’ a’bundu’ siagang ke’nanga.
9Na lalanna anjo wattua battumi tu Filistin ri Lappara’ Refaim siagang narampo’mi anjo tampaka.
10Nalangngere’na Daud anjo kabaraka akkuta’nammi ri Allata’ala angkana, "O Batara, mustika a’lampa’ mange ambunduki anjo tu Filistin? Maka laKisarea’ pammetang?" Appialimi Batara angkana, "Iyo, bundukimi! LaKusareko pammetang!"
11Jari mangemi Daud siagang pasukanna ambunduki anjo tu Filistin ri Baal-Perasim na nabetamo ke’nanga. Nakanamo Daud, "Napakema’ Allata’ala untu’ allappoi tampa’ attahanna musua sanrapang a’ba allappariai yangasenna apa-apaya, lalang wattu sinampe’ji bawang." Iaminjo saba’na naniaremmo anjo tampaka "Baal-Perasim".
12Ri wattunna larimo pasukang Filistin, tenamo nasawe ke’nanga angngerangi patung-patung barhalana ke’nanga. Naparentakammi Daud sollanna nitunu ngaseng anjo patung-patunga.
13Tena nasallo battumi pole tu Filistin siagang anrampoki taua ri Lappara’ Refaim.
14Sikalipi pole appala’ pitunju’ Daud mae ri Allata’ala. Nappialimo Allata’ala angkana, "Teako bunduki ke’nanga battu anrinni, mingka a’jappamako numminro nampa nubunduki ke’nanga battu ba’leang, ri ampi’na tampa’ niaka poko’-poko’ murbei.
15Punna nia’ nulangngere’ sa’ra bangkeng tau a’barrisi’ irate ri cappa’na anjo poko’-pokoka, maju mako, nasaba’ iNakke la’jappa ri dallekannu untu’ ambetai tantarana Filistin."
16Nagaukammi Daud anjo apa Napassuroanga Allata’ala mae ri ia. Nabundukimi Daud siagang pasukanna anjo tantara Filistinga, sa’genna napaunduru’ appakkaramula battu ri Gibeon sa’genna ri Gezer.
17Jari masahoro’mi arenna Daud ri kere-keremae, siagang nipa’jari malla’ ngasemmi anjo sikontu bansaya ri Batara mae ri Daud.