Dual Panel1Ri wattunna matemo Ahab iamintu karaenna tu Israel, angngewami tu Moab mae ri tu Israel.
2Ri se’reang allo tu’guruki Karaeng Ahazia iamintu karaeng Israel battu ri baruga bageang ratena balla’ kakaraenganga ri Samaria, sa’genna loko’ sanna’. Jari assuromi tau untu’ a’lampa akkuta’nang ri Baal-Zebub, rewata ri kota Ekron ri Filistin, apaka akkullei a’jari baji’ yareka tena.
3Mingka nasuroi malaeka’Na Batara Na’bi Elia, iamintu na’bi battua ri Tisbe, a’lampa angngagangi sibuntulu’ anjo sikamma tau nasuroa Karaeng Ahazia untu’ angkana, "Apaka tena Allata’ala ri Israel sa’gennu ero’ a’lampa appala’ pitunju’ mae ri Baal-Zebub, anjo rewatana kota Ekron?
4Pauangi karaenga angkana akkana kammai anne Batara, ‘Tena nukkulle la’jari baji’, mingka lamateko!’" Le’ba’na nagaukang Elia anjo parentaNa Batara,
5ammotere’mi anjo sikamma tau nasuroa mae ri karaenga; nampa akkuta’nang karaenga angkana, "Angngapa nummotere’ ngaseng?"
6Appialimi ke’nanga angkana, "Nia’ sitau bura’ne battu mae ri kambe nampa nasuro ikambe ammotere’ untu’ ampabattui mae ri karaenga angkanaya akkana kammai anne Batara mae ri karaenga, ‘Apaka tena Allata’ala ri Israel, sa’gennu assuro appala’ pitunju’ mae ri Baal-Zebub, rewatana kota Ekron? Tena nukkulle la’jari baji’, mingka lamateko!’"
7Akkuta’nammi karaenga angkana, "Antekamma tanja’na anjo taua?"
8Appialimi ke’nanga angkana, "Jubana siagang passikko’ aya’na battu ri kukkulu’ nipare’." Angkanami karaenga angkana, "O, anjo Elia!"
9Nampa nasuromo se’re perwira tantara siagang limampulo ana’ buana a’lampa mange anjakkalaki Elia. A’lampami anjo perwiraya, nanagappamo Elia sitabang ammempo rate ri se’reang bonto. Nakanamo anjo perwiraya, "He, atanNa Allata’ala, naparentakangko karaeng naung!"
10Appialimi Elia angkana, "Punna padeng atanNa’ Allata’ala, poro naung laloi pepeka battu ri langika na nakanre ngasengko siagang sikontu ana’ buanu!" Anjo memang wattua nia’mo pepe’ naung angkanrei anjo perwiraya siagang limampuloa ana’ buana.
11Nampa nasuro pole karaenga sitau perwira maraenga siagang limampulo ana’ buana. A’lampami ke’nanga nampa nakana ri Elia, "He, atanNa Allata’ala naparentakangko karaenga naung kamma-kamma memang anne!"
12Appialimi Elia angkana, "Punna padeng atanNa’ Allata’ala, poro naung laloi pepeka battu ri langika na nakanre ngasengko siagang sikontu ana’ buanu!" Anjo memang wattua nia’mo pepe’ naung angkanrei anjo perwiraya siagang limampuloa ana’ buana.
13Sikalipi pole assuro karaenga sitau perwira siagang limampulo ana’ buana. Anjo perwiraya naiki ri bontoa siagang ri wattunna battu ri dallekanna Elia akkulantu’mi nampa angkana, "Pammopporanga’, o, atanNa Allata’ala! Kikamaseanga’ siagang anne limampuloa ana’ buaku. Teaki’ bunoi ikambe!
14Rua perwira maraeng siagang ana’ buana mate kabusu’mi nakanre pepe’ battu ratea ri langika, mingka inakke kupalaki nakikamaseanga’!"
15Anjo memang wattua nakanamo malaeka’Na Batara ri Elia, "Teako mallakki! Amminawang mako naung battu ri anne bontoa." Lanri kammana anjo a’lampami Elia siagang anjo perwiraya mange ri karaenga.
16Nampa nakanamo Elia ri karaenga, "Nakana Batara, ‘Nusuroi taua mange appala’ pitunju’ ri Baal-Zebub rewatana kota Ekron, rapang angkana tena Allata’ala ri Israel akkullea nipakkuta’nangngi. Lanri kammana anjo takkulleako la’jari baji’, mingka lamateko!’"
17Namatemo Ahazia sangkamma kananNa Batara tete ri Na’bi Elia. Lanri tenana ana’na Ahazia bura’ne, jari Yoram sari’battanna ansambeangi a’jari karaeng. Anjo sikammaya kajariangi ri taung makarua ammarentana Yehoram ana’na Yosafat, karaeng Yehuda.
18Carita maraengannaya ri passala’na apa nagaukanga Karaeng Ahazia niaki nitulisi’ lalang ri kitta’ Riwaya’na sikamma karaeng Israel.