Alkitab Mobile SABDA
[VER] : [MAKASAR]     [PL]  [PB] 
 <<  2 Raja-raja 25 >> 

1Nampa angngewa Zedekia mae ri Nebukadnezar karaeng Babel. Lanri kammana anjo battumi Nebukadnezar siagang sikontu tantarana nampa nabunduki Yerusalem ri tanggala’ 10 bulang 10 ri taung makasalapang ammarentana Zedekia. Appaentengi ke’nanga pa’ballakang ri pantaranganna kotaya, siagang ambangungi tembo’ pakkurung,

2siagang nakurung tulusuki anjo kotaya sa’genna taung makasampulo asse’re ammarentana Zedekia.

3Ri wattu tanggala’ 9 bulang 4 anjo todong taunga, iamintu ri wattu sanna’ dudunamo bala kacipuranga sa’genna tena sikalimo lanakanre ra’yaka,

4nirumbammi tembo’na kotaya ri musua. Anjo bangngia, manna pole sitabangi nikurung anjo kotaya ri tu Babel, lari kabusu’mi tantara Yehuda mange ri Lappara’na Yordan. Anjorengi ammalo ke’nanga ri koko balla’ karaenga, nampa assulu’ battu ri pakke’bu’ lompo ampasisambungai anjo ruaya tembo’ ri anjo tampaka.

5Mingka niondangi Zedekia ri tantara Babel, nampa nijakkala’ ri lappara’na Yerikho. Sikontu ana’ buana lari kabusuki ambokoi.

6Nampa nierang Karaeng Zedekia mange ri Karaeng Nebukadnezar ri kota Ribla, nampa nitappu’ hukkungang mate.

7Sikamma ana’na nibunoi ri dallekanna. Le’baki anjo nioke’mi matanna, nampa nisikko’ siagang nierang mange ri Babel.

8Ri tanggala’ 7 bulang 5 ri taung makasampulo assalapang ammarentana Nebukadnezar ri Babel, nia’mo tau niareng Nebuzaradan battu mange ri Yerusalem. Anjo taua tubiasa napappalakki pappitangara’ Nebukadnezar siagang panglimana tongi Nebukadnezar.

9Natunui Nebuzaradan Balla’Na Batara, balla’ karaenga siagang balla’na sikontu pamimpinga ri Yerusalem.

10Nampa sikontu ana’ buana naruntungi tembo’-tembo’ kotaya.

11Nampa ra’ya’ niaka ija ri kotaya, iamintu sesa-sesa tau cara’deka anjama, tau kasi-asia siagang tau laria mae ri tu Babel, niengka’ kabusuki ri Nebuzaradan mange ri Babel.

12Mingka sipa’gang battu ri ra’ya’ kaminang kasi-asia siagang tenaya apa-apanna naboliki ri Yehuda siagang nasuroi anjama koko anggoro’, siagang pakkokoang maraengannaya.

13Sikamma benteng tambaga siagang kareta-kareta niaka ri Balla’Na Batara kammayatompa guci tambagaya nireppe’-reppeki ri tu Babel, nampa naerang kabusu’ anjo tambagaya mange ri pa’rasanganna ke’nanga.

14Naengka’ tongi ke’nanga barang-barang kammaya anne: sikopang-sikopang, pammoneang aua ri tampa’ pakkoro’bangnganga, pakkakasa’ kanjoli, mangko’-mangko’ untu’ pammoneang cera’ olo’-olo’ nisamballea untu’ koro’bang, siagang sikontu barang tambaga maraeng nipakea untu’ anynyomba.

15Barang-barang bulaeng, pera’, kammaya mangko’-mangko’ ca’di siagang panne-panne untu’ bara pepe’, kalenna Nebuzaradan angngallei.

16Barang-barang tambaga napareka Karaeng Salomo untu’ Balla’Na Batara, iamintu rua benteng, kareta-kareta, siagang gumbang lompo, sanna’ ngaseng battala’na sa’genna takkulleai nitimbang.

17Anjo ruaya benteng tambaga sangkamma-kammai; tinggina massing 8 metere’ siagang se’re ulu benteng 1,3 metere’ tinggina. Ri tammulilina anjo tunggala’ ulu bentenga nianyangi siagang rappo delima battu ri tambaga.

18Pantaranganna anjo najakkala’ tongi Nebuzaradan iamintu Imang Lompo Seraya, Zefanya imang pambantuna, tallu tau pajaga pakke’bu’ Balla’Na Batara, lima tau biasaya napappalakki pappitangara’ karaenga niaka ija ri kotaya, panglima, wakkele’ panglima pangurusu’na sura’-sura’na tantaraya, siagang 60 tumalompo maraengannaya.

19(25:18)

20Kabusu’na anjo taua nierangi mange ri Karaeng Nebukadnezar ri kota Ribla,

21ri daera Hamat. Anjorengi ke’nanga nisessa nampa nibuno. Kammami anjo batena tu Yehuda niengka’ battu ri pa’rasanganna ke’nanga nampa nierang mange ri butta pammelakkanga.

22Le’baki anjo naangka’mi Karaeng Nebukadnezar tu niarenga Gedalya ana’na Ahikam cucunna Safan, a’jari guburnur ri Yehuda untu’ ammarenta mae ri sikontu tau niaka ija ammantang anjoreng.

23Ri wattunna nalangngere’ sikamma perwira tantarana Yehuda siagang tantara Yehuda tenaya napassareangi kalenna mae ri tu Babel anjo kabaraka, battu ngasemmi ke’nanga mange ri Gedalya ri Mizpa. Anjo perwira-perwiraya iamintu Ismael ana’na Netanya, Yohanan ana’na Kareah, Seraya ana’na Tanhumet battu ri kota Netofa, siagang Yazanya battu ri kota Maakha.

24Nakanamo Gedalya ri ke’nanga, "Tena nuparallu malla’ ri pamarentana tu Babel. Ammantang mako anrinni ri pa’rasanganta siagang pa’jarimi ata kalennu mae ri karaeng Babel. Kutanggongi kasalamakkannu."

25Mingka ri bulang 7 anjo taunga, Ismael ana’na Netanya cucunna Elisama, sisambung bijaya ija siagang karaenga, a’lampai siagang 10 tau mange ri Mizpa. Nabakkai siagang nabunoi ke’nanga anjo Gedalya siagang tu Yehuda na tu Babel niaka naagang.

26Jari lari kabusu’mi mange ri Mesir sikontu ra’ya’ Yehuda, kasi-asi yareka kalumanynyang, siagang sikamma perwiraya, napakamma malla’ mae ri tu Babel.

27Ri tanggala’ 27 bulang 12 lalang ri taung makatallumpulo antuju le’ba’na niengka’ Yoyakhin mange ri pammelakkanga, Ewil-Merodakh a’jari karaeng ri Babel. Ia memang anjo taunga namangngamaseang mae ri Yoyakhin na nalappassang battu ri tarungkua,

28na nabaji’-bajiki Yoyakhin. Nasarei empoang tinggiangngang nasikamma karaeng maraeng nipelaka todong mange ri Babel.

29Tenamo nammakeang tunitarungku Yoyakhin, siagang biasai angnganre ri balla’ karaenga, kammayatompa nisarei doe’ untu’ kaparalluang katallassanna.

30(25:29)


  Share Facebook  |  Share Twitter

 <<  2 Raja-raja 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel